Ua Fesili Mai le ʻAufaitau

Pe e Mai le Atua Faamālōlōga Faavavega Uma?

E lē fesiligia le mea moni o loo iai iā Ieova le Atua le mana e faamālōlō ai tagata. E mautinoa foʻi e mafai ona ia tuuina atu le mana i ona tagata tapuaʻi. O se faataʻitaʻiga, i vaitaimi o le ʻauaposetolo, o faamālōlōga faavavega o se tasi lea o meaalofa faapitoa a le agaga paia o le Atua. Na tusi le aposetolo o Paulo: “O le faaaliga o le agaga, ua foaʻiina atu i tagata taʻitoʻatasi mo se fuafuaga aogā. Auā ua foaʻiina atu i le tasi le agaga e tautala ai ma le poto, . . . a o le isi o le meaalofa e faamālōlō ai maʻi, e ala i le agaga lava lea e tasi, . . . , a o le isi e faia valoaga, . . . , a o le tasi e tautala ai i gagana eseese.”—1 Korinito 12:4-11.

Peitaʻi, na tusia foʻi e Paulo i lenā tusi i Korinito, o le a faalēaogāina ia meaalofa faavavega o le agaga paia o le Atua. Na ia faapea mai: “Afai e iai meaalofa e fai ai valoaga, pe e tautala i gagana eseese, pe maua le malamalama, e faalēaogāina lea.”—1 Korinito 13:8.

A o faagasolo le uluaʻi senituri, sa faia e Iesu Keriso ma ona aposetolo faamālōlōga faavavega. I lenā taimi a o faatoʻā amata le faapotopotoga fou faa-Kerisiano, sa avea meaalofa o le agaga, lea e aofia ai le faia o faamālōlōga faavavega, o ni mea na faamamaluina ai le Atua, ma o se faailoga o le finagalo malie o Ieova ma lana faamanuia i le faapotopotoga fou Kerisiano. Peitaʻi, ina ua mautū le faapotopotoga Kerisiano, nai lo le toe faaaogā la o faamālōlōga faavavega, na latou taulaʻi atu i le faaalia o le faatuatua malosi, le faamoemoe, ma le alofa e avea ma faamaoniga o le finagalo malie o le Atua. (Ioane 13:35; 1 Korinito 13:13) O lea la, i le tausaga e 100 T.A., sa lē toe tuuina ai e le Atua i tagata le mana e fai ai faamālōlōga faavavega e avea o se faailoga o lona finagalo malie. *

Ae atonu e te tomānatu, ‘Aiseā ou te faalogo ai pea i lipoti e uiga i faamālōlōga faavavega?’ O se faaaʻoaʻoga, sa taʻua i se nusipepa se tamāloa na matuā aafia i le kanesa. Na iai patu po o tuma i lona ulu, o ona fatugaʻo, ma totonu o ona ponaivi. Na foliga mai na leai sona faamoemoe, seʻia oo ina “fetalai” ane le Atua iā te ia. Na faapea mai le lipoti, i ni nai aso mulimuli ane ai, ua leai se kanesa.

Pe a e faalogo i se lipoti faapena, o se mea lelei pe a fesili ifo iā te oe lava, ‘Pe e iai ni faamaoniga o lenei lipoti? Po o iai ni tusitusiga po o ni faamaoniga faafomaʻi e lagolagoina ai? E tusa foʻi pe foliga mai ua faamālōlō, ae po o aʻoaʻoina e le Tusi Paia o faamālōlōga uma e mai le Atua?’

E tāua tele le tali i le fesili mulimuli. Na lapataʻia e Iesu ona soo e faapea: “Ia mataala pea i perofeta pepelo . . . E toʻatele e fai mai iā te aʻu i lea aso, ‘Le Alii e, le Alii e, pe matou te leʻi faia ea ni valoaga ma tutuli temoni, ma faia le tele o galuega mamana [vavega] i lou suafa?’ Ona ou taʻutino atu lea iā i latou: Ou te leʻi iloa lava outou! Inā ō ese ia iā te aʻu, o outou o ē faia mea leaga.”—Mataio 7:15, 21-23.

Ua manino mai i lenā mau, e mafai ona tupuga mai faamālōlōga faavavega mai i se isi mea nai lo le Atua. Ina ia ʻalofia le faasesēina e i latou o loo faaaogā le suafa o le Atua e fai ai faamālōlōga, e manaʻomia ona tatou iloa lelei le Atua, ma faaaogā lelei le tomai mai le Atua e fefulifulisaʻi ai, ma iloa le auala e mātauina ai ē o loo faia lona finagalo.—Mataio 7:16-19; Ioane 17:3; Roma 12:1, 2.

[Faaopoopoga i lalo]