Faigāmalaga Anamua na Sopoʻia ai le Metitirani

I aso nei, o se meanoa lava i tagata le oso i se vaalele ma lele mai le tasi konetineta i le isi. Po o se mea e faateʻia ai oe le iloa e oo lava i taimi o le Tusi Paia, sa faimalaga tagata i nuu mamao?

E TUSA ma le afe tausaga a o leʻi afio mai Keriso na fausia ai e le tupu o Solomona se fuāvaa, na malaga faatasi ma le fuāvaa a le tupu o Turo i nuu mamao, e aumaia mea matagofie i Isaraelu. (1 Tupu 9:26-28; 10:22) I le senituri lona iva T.L.M., i le taulaga o Iopa i Isaraelu e faasaga i le Metitirani, na malaga ai Iona i se vaa e alu i Tasesa. * (Iona 1:3) I le senituri muamua T.A., na malaga ai Paulo mai i Kaisareia i Isaraelu agaʻi i Puteoli, lea ua taʻua i aso nei o Pozzuoli, o loo i le Fagaloa o Naples i Italia.—Galuega 27:1; 28:13.

Na iloa e tusitala o talafaasolopito e faapea, e oo ane i aso o Paulo sa masani ona malaga le au faatauʻoa mai i vaipanoa o le Metitirani e ui atu i le Sami Ulaula agaʻi i Initia, ma i le taulotoaʻiga o le senituri lona lua, na oo atu ai nisi i Saina. * O le ā la ua tatou iloa e uiga i malaga na sopoʻia ai le  Metitirani agaʻi i sisifo? O le ā le mamao na oo i ai tagata folau anamua i lenā itulagi?

Malaga a Tagata Foinie Anamua

I le tele o senituri a o leʻi oo i le taimi o Paulo, na faamautū e tagata ni nofoaga e fai ai fefaatauaʻiga i vaipanoa i Sisifo. O le talitonuga e faapea, o tagata Foinie mai i le nuu lea ua taʻua o Lepanona, na taunuu i le Atalani i le 1200 T.L.M. I le tusa ma le 1100 T.L.M., i tala atu o le vainuu o Gibraltar, na latou faatūina le nuu o Gadir i Sepania, lea ua taʻua nei o Cádiz, o se taulaga e tuta ai vaai. O oloa na maua ai i inā, o le siliva ma le apa, na aumaia e tagata faatauʻoa o le Atalani.

E tusa ai o faamaumauga a le tusitala Eleni o Herodotus i le senituri lona fitu T.L.M., na faamaopoopo ai e Farao Neko se fuāvaa o vaa Foinie, i le mea e amata ai le Sami Ulaula ma na faaʻauvaaina e tagata Foinie. O le fuafuaga, ia malaga taamilo i Aferika mai i le itu i sasae agaʻi i sisifo.

E oo ane i lenā taimi, e faitau senituri o malaga suʻesuʻe tagata Foinie i talafatai o Aferika. Talu ai le malolosi o matagi ma le āu, sa leʻi faigofie taumafaiga a seila ina ia mafai ona malaga atu i le talafatai o Aferika o loo fesagaʻi ma le Vasa Atalani. E tusa ai ma faamatalaga a Herodotus, na amata suʻesuʻega fou a tagata Foinie mai le Sami Ulaula ma folau atu ai i le talafatai i sasae o Aferika, ma agaʻi atu i saute i le vasa Initia. Pe tusa o le ogatotonu o le tausaga, na ō ai i uta, ma totō fatu, ma nonofo seʻia oo i le seleselega, ona toe folau foʻi lea. Na fai mai Herodotus, na soo le konetineta atoa i le tausaga lona tolu, ma oo atu i le Metitirani ma toe foʻi ai i Aikupito.

Na faaiʻu le tala a Herodotus i lona faapea mai, na lipoti mai e tagata Foinie mea sa faigatā ona ia talitonuina, e aofia ai a latou faamatalaga e faapea, i le folau atu i le faatausiʻusiʻuga o Aferika na latou vaaia ai le lā i lo latou itu taumatau. Sa faigatā i se tagata Eleni anamua ona talitonu i lenei mea. O tagata uma sa nonofo i o latou olaga atoa i le itu i matu o le ekueta, sa masani ona latou vaaia le lā i le itu i saute. O lea, ina ua agaʻi atu o ia i sisifo, sa iai le lā i lona itu tauagavale. Ae, i le Tolotolo o Faamoemoega Lelei, lea e i le itu i saute o le ekueta, i le aoauli, e tū ai le lā i le itu i mātū, i le itu i taumatau o se tagata e malaga atu i sisifo.

Ua faitau senituri o fefinauaʻi tagata suʻesuʻe o tala faasolopito i faamatalaga a Herodotus. E foliga mai o se mea ofoofogia ona o le toʻatele o tagata folau anamua, na soo Aferika i a latou folauga. Ae peitaʻi e talitonu tagata popoto, pe a fua i le tomai ma le poto i lenā taimi, na faatonuina e Farao Neko le faia o lea malaga suʻesuʻe. Na taʻua e le tusitala o tala faasolopito o Lionel Casson, “Sa mafai lava ona faia lenā faigāmalaga. E leai se māfuaaga o le a lē mafai ai e se ʻauvaa Foinie ona faia lenā malaga, i le umi ma le auala e pei ona faamatalaina e Herodotus.” E lē o mafai ona faamautinoa pe moni le faamatalaga a Herodotus. E ui i lea, ua tatou iloa ai le lē faavaivai o taumafaiga e faalautele atu malaga i vaipanoa e leʻi iloa i lenā taimi.

Ua Folau Pytheas i Mātū

E lē na o tagata Foinie ni tagata mai i Metitirani na folau agaʻi i sisifo i le Vasa Atalani. Na faatū e tagata folau Eleni i vaipanoa o le Metitirani se aai e taʻu o Massalia, o se aai i Falani ua taʻua nei o Marseilles. Na tamaoaiga le nuu ona o fefaatauaʻiga e ala i le vasa faapea ma isi aai. O mea na auina atu e faatauʻoa Massalia i nuu i mātū, uaina mai nuu o le Metitirani, ma suāuu ma mea e fai mai i apa memea, ae na auina mai i na nuu oloa eseese ma amber, o se mea tāua e fai ai tautaliga ma ula. E lē taumatea na fia iloa e tagata Massalia le mea e maua ai nei oloa. O lea, i le 320 T.L.M., na folau atu ai Pytheas le tagata mai Massalia i na nuu mamao i mātū, e vaai pe faapeʻī.

 Ina ua toe taliu mai Pytheas, na ia tusia se tala e taʻua o le On the Ocean (I Luga o le Vasa), e faatatau i lana malaga. E ui o lea ua lē o toe iai lana uluaʻi tusi lea na tusia i le gagana Eleni, ae a itiiti mai, e toʻa 18 tusitala anamua na latou toe sii mai ai ni faamatalaga. O vaega na sii mai sa faailoa mai ai na faamatalaina ma le faaeteete e Pytheas ana malaga i le sami, o fesuiaʻiga o le tai, o nuu ma tagata o vaipanoa sa asiasi i ai. Sa ia faaaogāina foʻi se fua e fua ai le tulaga o le lā i le aoauli i aso faapitoa, ma fuafua i ai le mamao ua oo i ai lana faigāmalaga agaʻi i mātū.

Sa naunau Pytheas i le faasaienisi. Peitaʻi, e lē o suʻesuʻega faasaienisi le autū o lana malaga. Ua taua e tagata popoto e faapea, o lana malaga na faatonuina ma faatupeina ona o faanaunauga tau fefaatauaʻiga a Massalia, lea na auina atu ai o ia e saʻili se alāvaa e oo atu i na nuu mamao e tū matafaga, i vaipanoa o latou iloa o loo maua ai le amber ma le apa. O fea la na alu i ai Pytheas?

Agaʻi i Brittany, Peretania, ma Tala Atu

E foliga mai na malaga faataamilo Pytheas i Iberia ma agaʻi i luga i le talafatai o Gaul e oo i Brittany (i Falani), ma alu ai loa i uta. E tatou te iloa lenei mea ona o se tasi o ana fua na fua ai le tulaga o le lā i luga aʻe o le tafatafāilagi lea e foliga mai na faia i le laueleele, ua talafeagai lea ma se nofoaga i Brittany i mātū. *

E atamamai tele tagata Brittany e fau vaa ma o ni tautai o le vasa, o ē na fefaatauaʻi ma Peretania. Ona sosoo ai lea ma le malaga atu o Pytheas i Cornwall i saute i sisifo i le faatausiʻusiʻuga o Peretania, o i inā e tele ai le apa, faapea ma le apamemea. O loo faamatala i lana lipoti le lapoʻa, le telē, ma foliga faatafatolu o Peretania, e taʻu mai ai atonu na malaga faataamilo o ia i le motu.

E lē o iloa tonu le alāvaa na ui ai Pytheas, ae atonu na folau atu o ia i le va o Peretania ma Aialani ma taunuu ai i le motu o Isle of Man, o le latitū na talafeagai lelei ma lana fua lona lua o le tulaga o le lā. O le fua lona tolu atonu na faia i Lewis i Outer Hebrides, e i le talafatai i sisifo o Sikotilani. E foliga na faaauau mai i inā lana malaga agaʻi i mātū i Orkney Islands, o loo i mātū o Sikotilani, ona na toe taʻua e Pliny the Elder lana faamatalaga e faapea, e 40 atumotu o loo iai.

 Na tusi Pytheas e faapea, e ono aso e folau ai i le itu i mātū o Peretania, ona taunuu lea i le nuu o Thule. O le manatu o nisi tusitala anamua, o le faamatalaga a Pytheas e uiga i a Thule, o loo faatatau i le nuu e lē goto ai le lā. Na ia tusi e faapea, a faaauau ona folau mo se isi aso ona taunuu lea i se ogāsami e “toʻa ai le aisa.” O loo finau pea le toʻatele po o fea tonu e tū ai Thule—fai mai nisi o Faeroe Islands, o isi o Nouē, a o isi o Iceland. Po o fea lava na tū ai Thule, e talitonu tusitala anamua, “o le nuu e pito i mamao i mātū o nuu uma o loo taʻua.”

E foliga mai na toe folau Pytheas i Peretania i le alāvaa lava lea na malaga atu ai, ma soo ai le motu i lana folauga. Peitaʻi e tatou te lē iloa pe na faaauau ana suʻesuʻega i le talafatai i Europa i mātū, a o leʻi toe taliu i le Metitirani. Ae ui i lea, o loo sii mai e Pliny the Elder tusitusiga a Pytheas, o sē e iloa lelei vaipanoa e maua ai le amber. O vaipanoa sa maua ai lenei mea tāua, sa i Jutland, o se vaega o Tenemaka i aso nei, faapea ma le talafatai i saute o le Baltic Sea. O le mea moni, atonu na iloa e Pytheas nei vaipanoa ina ua asiasi atu i taulaga i Peretania i sasaʻe, ae e tusa ma mea ua tatou iloa, e na te leʻi taʻua lona asia o na nofoaga.

O Kaisara Iulio o le isi lea tagata na folau i le Metitirani na tusi e faatatau i lana malaga i Peretania, ma i le 55 T.L.M., na tuta ai lona vaa i le itu i saute o le motu. E oo ane i le 6 T.A., ua taunuu isi folauga a tagata Roma i le itu i mātū o le Jutland.

Faateleina le Malamalama o le Lalolagi

Na faalautele atu e tagata Foinie ma tagata Eleni le malamalama o le lalolagi i nuu ma ona tagata, mai le Metitirani ma oo atu i le Atalani, ma oo atu ai i vaega i saute o Aferika, ma i mātū i le Atika. Sa naunau le lalolagi i lenā taimi i saʻiliʻiliga ma fefaatauaʻiga, ia faateleina le malamalama i le lalolagi, le faimalaga i nofoaga mamao, ma oo ai ina tupu tele le iloa.

E na o si vaega itiiti o folauga a tagata folau na mafai ona taunuu ma le manuia, pe a fua i faamaumauga o folauga anamua o loo iai. Faamata e toʻafia ni tagata folau na toe taunuu manuia ae e leʻi tusitusia a latou folauga? Faamata foʻi e toʻafia i latou na folau atu i nuu mamao, ae e leʻi toe taliu mai i o latou nuu? E lē o mafai ona iloa tonu tali o nei fesili. Pau o lea, ua mafai ona tatou iloa ai se mea e uiga i le salalau atu o le Faa-Kerisiano e ala i na folauga.—Tagaʻi i le  pusa o loo i luga.

[Faamatalaga pito i lalo]

[Pusa i le itulau 29]

 Ua ‘⁠Talaʻiina Atu le Tala Lelei i Foafoaga Uma i Lalo o le Lagi’

E tusa ma le 60-61 T.A., na tusi ai le aposetolo o Paulo e faatatau i le tala lelei, ua “talaʻiina atu i foafoaga uma i lalo o le lagi.” (Kolose 1:23) Po o le uiga o lana faamatalaga, na oo atu le talaʻiga a Kerisiano i Initia, Sasaʻe Mamao, Aferika, Sepania, Gaul, Peretania, ma atunuu o le Baltic, ma Thule lea na taʻua e Pytheas? Ailoga, ae e tatou te lē o mautinoa.

E lē taumatea na mamao le mea na oo i ai le talaʻiga o le tala lelei. O se faataʻitaʻiga, o tagata Iutaia ma tagata liu lotu o ē na talia le Faa-Kerisiano i le Penetekoso 33 T.A., na ō atu ma lo latou faatuatuaga fou i nuu e iai Patia, Elama, Metai, Mesopotamia, Arapi, Asia Itiiti, ma vaega o Lipua agaʻi Kurene, ma Roma—ma aofia ai le lalolagi na iloa e i latou na faitau i tusitusiga a Paulo.—Galuega 2:5-11.

[Faafanua/Ata i le itulau 26, 27]

(Tagaʻi i le lomiga mo le ata atoa)

Na faamatala mai e Herodutus, a o folau i le faatausiʻusiʻuga o Aferika, na vaaia e seila le lā i lo latou itu taumatau

AFERIKA

VASA ATALANI

VASA INITIA

SAMI METITIRANI

[Faafanua/Ata i le itulau 27, 28]

(Tagaʻi i le lomiga mo le ata atoa)

O vaipanoa na folau i ai le tagata folau Eleni o Pytheas

[Faafanua]

AIALANI

ICELAND

NOUĒ

Vasa i Mātū

PERETANIA

BRITTANY

IBERIAN PENINSULA

TALAFATAI I MĀTŪ O AFERIKA

Marseilles