Le Māfuaaga E te Faatuatuaina ai Tusi o Evagelia

“Ua iai ni tusi ua fiafia i ai le toʻatele. Ua uunaʻia ai le faia o ata tifaga e faitau miliona tālā na faaalu i le faatupeina . . . ma e anoanoaʻi tusi na faatauina atu . . . ua taliaina e nisi o lotu Kerisiano. Ua māfua ai ni manatu fou faalotu ma taupulepulega leaga.”—SUPER INTERESSANTE, O SE MEKASINI A PASILI.

AISEĀ na tupu ai lenei vevesi? Na talanoaina i lenei mekasini le naunau o le toʻatele ma gaoioiga e faaautū atu i ni tusi faa-Evagelia pepelo, ma faaaliga na maua i le ogatotonu o le senituri lona 20 i Nag Hammadi o se nuu i Aikupito ma isi vaipanoa i Aikupito. O nei tusi faa-Evagelia pepelo ma isi tusi faapena, ua masani ona taʻua o tusitusiga faa-Gnostic po o tusitusiga faa-Apokerifa. *

Pe na Iai se Taupulepulega Leaga?

I lenei taimi ua tele ai le lē faatuatuaina o le Tusi Paia ma lotu autū, ua foliga mai e fiafia le toʻatele i nei tusitusiga o le Gnostic po o le Apokerifa. Ua telē se taaʻiga a nei tusitusiga i manatu o le toʻatele e faatatau i aʻoaʻoga a Iesu Keriso, ma le Faa-Kerisiano. Ua taʻua e se tasi o mekasini: “O le Evagelia a Toma ma isi tusi faa-Apokerifa, ua pāʻia ai loto o le toʻatele i nei ona pō: o ē e naunau i mea faaleagaga, ae e lē o toe fiafia i lotu.” O se fuafaatatau i Pasili lava ia, “e tusa ma le 30 vaega o tagata, ua faavae a latou talitonuga i tusi faa-Apokerifa.”

O le mauaina o nei tusi, na taatele ai le manatu faapea, na taupulepule le Lotu Katoliko i le senituri lona fā T.A. ina ia natia le upu moni e uiga iā Iesu, ma na taofia le faaalia atu o nisi o tala o lona soifuaga, na tusia i tusitusiga faa-Apokerifa, ma na suia nisi o mea i Evagelia e fā o loo iai i le Tusi Paia i aso nei. O loo faaupuina faapenei e Elaine Pagels o se tagata poto i mea tau lotu: “Ua tatou iloa nei, o le mea o loo taʻua o le Faa-Kerisiano, lea o loo  taʻua foʻi o talitonuga faa-Kerisiano, ua na o ni faamatalaga mai ni nai puna patino, na filifilia mai puna eseese e tele.”

E manatu tagata popoto e pei o Pagels, e lē na o le Tusi Paia le puna o le faatuatuaga faa-Kerisiano; ua iai nisi puna e pei o tusitusiga faa-Apokerifa. O se faataʻitaʻiga, i se polokalame o le BBC o le Bible Mysteries, lea na talanoaina ai le mataupu, “O Maria le Makatala Moni” na faaalia ai le manatu mai i tusitusiga faa-Apokerifa e faapea, o Maria le Makatala o “se faiaʻoga ma o se taʻitaʻi faaleagaga i isi soo. Ua lē na o se soo; ae o ia o le aposetolo o aposetolo uma.” Na tusi Juan Arias i se nusipepa a Pasili e taʻua o le O Estado de S. Paulo, e uiga i le matafaioi na manatu na faatinoina e Maria le Makatala: “Ua oo ina tatou talitonu i aso nei, o le uluaʻi faa-Kerisiano na faavaeina e Iesu, sa tele ina faia e ‘fafine’ ona o uluaʻi falesā, o fale o fafine ma sa faatinoina e nei fafine, le faiva o ositaulaga ma epikopō.”

Ua sili atu ona tāua i le toʻatele tusitusiga faa-Apokerifa nai lo le Tusi Paia. O nei manatu ua tulaʻi ai ni fesili tāua: Po o se puna moni o le faatuatuaga moni tusitusiga faa-Apokerifa? Pe a feteenaʻi aʻoaʻoga faa-Apokerifa ma aʻoaʻoga manino a le Tusi Paia, o fea le puna tatou te talitonu i ai—o le Tusi Paia po o tusi faa-Apokerifa? Pe sa iai moni ni taupulepulega leaga i le senituri lona fā, e taofia ai le faailoa atu o nei tusi, ma suia nisi o mea o Evagelia e fā, ina ia aveesea ai manatu tāua e uiga iā Iesu, Maria le Makatala, faapea ma isi? Ina ia maua tali o nei fesili, seʻi o tatou iloiloina se tasi o Evagelia e fā, le Evagelia a Ioane.

Faamaoniga Mai le Evagelia a Ioane

Na maua se fasi manusikulipi tāua o le Evagelia a Ioane i Aikupito i le amatamataga o le senituri lona 20, o lea tusi tāʻai ua taʻua nei o le Papyrus Rylands 457 (P^{5 2} ). O loo iai tusitusiga a le Ioane 18:31-33, 37, 38 e pei ona maua i Tusi Paia i aso nei, ma o loo teuina i le Faletusi o John Rylands, i Manchester, i Peretania. O se fasi manusikulipi aupito tuai lea o se tusi tāʻai o Tusitusiga Eleni o loo iai i le lalolagi. E talitonu le toʻatele o tagata atamamai na tusia pe tusa o le 125 T.A., pe tusa o le 25 tausaga talu ona maliu Ioane. O se mea e maofa ai, ona o upu o loo iai, e toetoe a tutusa lelei ma upu o loo i isi manusikulipi na tusia mulimuli ane ai. Ona sa iai se kopi ua leva o le Evagelia a Ioane na iai i Aikupito, i le mea na maua ai le fasi manusikulipi o lea tusi, ua faamaonia ai, na tusia e Ioane lava ia le Evagelia a Ioane, i le senituri muamua T.A. e pei ona taʻua i le Tusi Paia. O le tusi a Ioane na tusia e se tasi na vaai tino i mea na tusia.

I le isi itu, o tusitusiga faa-Apokerifa uma, na tusia mai le senituri lona lua agaʻi mai ai, e tusa ma le selau tausaga pe sili atu talu ona tutupu mea o loo faamatalaina ai. Ua finau mai nisi o tagata popoto e faapea, ua faavae tusitusiga faa-Apokerifa i nisi o tusitusiga na faia muamua atu po o upu tuu, ae e leai se faamaoniga o lenei mea. Ua talafeagai la le fesili, O fea e te talitonu i ai—o faamatalaga a ē na vaai tino i ai, po o faamatalaga a tagata na ola e tusa ma le selau tausaga, talu ona  tutupu mea na latou tusia? Ua manino le tali.  *

Ae ā le faamatalaga faapea, na suia nisi o mea o i tusi o Evagelia, ina ia taofia ai le faailoa atu o nisi o faamatalaga i le soifuaga o Iesu? O se faataʻitaʻiga, pe e iai ea se faamaoniga e iloa ai na suia mea i le Evagelia a Ioane i le senituri lona fā, ina ia mimilo sesē ai faamatalaga moni? Ina ia tali lena fesili, e ao ona tatou manatua o se puna autū o le Tusi Paia i ona pō nei, o le manusikulipi o le Vatican 1209 mai le senituri lona fā. Pe afai o iai i la tatou Tusi Paia ni suiga na faia i le senituri lona fā, e ao la ona iai na suiga i lea manusikulipi. O se mea e lelei, ona o loo iai i se isi manusikulipi le tele o faamatalaga o tusi a Luka ma Ioane, lea ua taʻua o le Bodmer 14, 15 (P^{7 5} ), mai le 175 T.A. e oo i le 225 T.A. E tusa ai ma faamatalaga a tagata popoto, e toetoe tutusa uma upu o lenā manusikulipi ma upu o loo i le Vatican 1209. O lea la, e tau leai ni suiga na faia i Evagelia o le Tusi Paia, ma ua faamaonia lena mea i le manusikulipi o le Vatican 1209.

E leai se faamaoniga o ni tusi po o se isi lava mea e faamaonia ai, na suia i le senituri lona fā, tusitusiga o loo i le tusi a Ioane po o se isi lava Evagelia. Ina ua uma ona iloiloina ni fasi manusikulipi na maua i Oxyrhynchus, i Aikupito, na tusia e Dr. Peter M. Head, o le Iunivesite a Cambridge e faapea: “E tele ina faamaonia e nei manusikulipi tusitusiga na faia i mataʻitusi tetele pei a lapotopoto [o manusikulipi na tusia i mataʻitusi tetele mai le senituri lona fā faasolo mai ai] lea e faavae ai tusitusiga o loo faaaogā e fai ai Tusi Paia i ona pō nei. E leai se mea e faamaonia ai le tatau ona suia le malamalamaga e uiga i faamatalaga o loo iai i le Feagaiga Fou.”

O le ā sa Tatou Faaiʻuga?

O Evagelia e fā o loo iai i le Tusi Paia—Mataio, Mareko, Luka, ma Ioane—na taliaina atoatoa e Kerisiano i se vaimea e lata i le ogatotonu o le senituri lona lua. Na faaaogā e le toʻatele o tagata le tusi a Tatiana o le Diatessaron (o se upu Eleni o lona uiga “e ala atu i [le] fā”), lea na tusia i le va o le 160 ma le 175 T.A., ma na faavae i Evagelia e fā o loo i le Tusi Paia, ae e leʻi faaaogāina “evagelia” e taʻua o le Gnostic. (Tagaʻi i le pusa  “Se Taumafaiga Anamua e Lagolagoina ai Tusi o Evagelia.”) E mataʻina foʻi faamatalaga a Irenaeus lea na soifua i le faaiʻuiʻuga o le senituri lona lua T.A. Na ia faapea mai, e tatau ona iai Evagelia e fā, auā e iai vaega e fā o le kelope ma e iai foʻi matagi autū e fā. E ui ina faalētonu lana faatusatusaga, ae o ona manatu e lagolagoina ai le mea moni e na o le fā Evagelia na faamaonia i na taimi.

O le ā ua faaalia e nei mea moni? O Tusitusiga Kerisiano Eleni lea e aofia ai Evagelia e fā, e pei ona tatou maua i aso nei, o loo tumau ona lē suia mai le senituri lona lua e oo mai i aso nei. E leai se māfuaaga e talitonu ai, na iai se taupulepulega leaga i le senituri lona fā e suia pe taofia le faalauiloa atu o so o se vaega o le Tusi Paia lea e mai le Atua. Na tusi foʻi se  tagata atamai o le Tusi Paia o Bruce Metzger e faapea: “E oo ane i le faaiʻuiʻuga o le senituri lona lua, . . . ua ōgatasi manatu e uiga i le vaega tele o le Feagaiga Fou, i faapotopotoga eseese o tagata talitonu ia na salalau solo, e lē gata i atunuu o le Sami Metitirani, ae faapenā foʻi ma vaipanoa mai Peretania e oo i Mesopotamia.”

O Paulo ma Peteru o poutū o le upu moni o le Tusi Paia. Na la taufai lapataʻia malosi uso Kerisiano, ina ia aua neʻi talia pe talitonu i aʻoaʻoga e ese mai aʻoaʻoga na aʻoaʻoina ai i latou. O se faaaʻoaʻoga, na tusi Paulo iā Timoteo: “Timoteo e, ia e leoleoina le mea ua tuuina atu iā te oe, ma ʻaloʻalo ese mai i upu lē aogā e faaleaga ai mea paia, ma feteenaʻiga i le mea ua taʻua ma le pepelo o le ‘poto.’ Ua liliuese nisi mai i le faatuatua ona o le faalialiavale o lenā poto.” Na molimau mai Peteru: “E lē o ni tala sesē na fatuina ma le poto na ala ai ona matou faailoa atu le mana ma le faatasi mai o lo tatou Alii o Iesu Keriso, ae ona na matou vāaitino i lona matagofie.”—1 Timoteo 6:20, 21; 2 Peteru 1:16.

Na faagaeeina e le agaga le perofeta o Isaia e faapea atu: “Ua mago le mutia muʻamuʻa, ua mamae le fuga o le laau; ae o le afioga a lo tatou Atua e tumau lea e faavavau.” (Isaia 40:8) Ua iā i tatou foʻi lea mautinoa o Lē na māfua ai le tusia o le Tusi Paia, o ia foʻi lea na faasaoina le Tusi Paia seʻia oo mai i le taimi nei ina ia “faaolaina ituaiga uma o tagata, ma ia maua le poto saʻo i le upu moni.”—1 Timoteo 2:4.

[Faamatalaga pito i lalo]

[Faamatalaga faaopoopo i le itulau 9]

Le manusikulipi o le Papyrus Rylands 457 (P^{5 2} ), se fasi manusikulipi o le Evagelia a Ioane mai le senituri lona lua T.A., sa faia pe tusa o le luasefulu tausaga, talu ona tusia le uluaʻi tusi a Ioane

[Siata/Ata i le itulau 8, 9]

“p.” o lona uiga “pe tusa.”

33 T.A. Maliu Iesu

p. 41 Tusia le tusi a Mataio

p. 58 Tusia le tusi a Luka

p. 65 Tusia le tusi a Mareko

p. 98 Tusia le tusi a Ioane

125 Rylands 457 (P52)

p. 140 Amata tusia tusi faa-Apokerifa

p. 175 Bodmer 14, 15 (P75)

Senituri lona 4 Vatican 1209

[Ē Ana le Ata i le itulau 9]

© The Trustees of the Chester Beatty Library, Dublin

[Ata i le itulau 10]

Vatican 1209

O le manusikulipi o le Vatican 1209 i le senituri lona fā o loo faaalia i luga, e faaalia ai e itiiti lava ni suiga na faia i Evagelia

[Ē Ana le Ata]

Mai le tusi Bibliorum Sacrorum Graecus Codex Vaticanus, 1868

 [Pusa/Ata i le itulau 11]

Se Taumafaiga Anamua e Lagolagoina ai Tusi o Evagelia

Na finau mai le ʻaufaitofā i le amatamataga o le Faa-Kerisiano e faapea, ua feteenaʻi faamatalaga a Evagelia, ma e lē faatuatuaina. Na puipuia e le tusitala Suria o Tatiana lea na soifua (pe tusa o le 110-180 T.A.) ia tusi o Evagelia. Na ia lagona e faapea, o ni mea e foliga mai e feteenaʻi, o le a lē iai pe a faaogātusa lelei Evagelia e fā ma avea ma tusi e tasi.

Sa sauniuni Tatiana e fai lea galuega. E lē o iloa pe na faia lana uluaʻi tusi i le gagana Eleni po o le gagana Suria. Po o le ā lava le tulaga na iai, ae na māeʻa lana tusi pe tusa o le 170 T.A., lea ua taʻua o le Diatessaron, o se upu Eleni o lona uiga “e ala atu i [le] fā.” Aiseā e tatau ai ona e naunau i lenei tusi e leʻi ala mai i le Atua?

Na amata ona faasalalau atu e le ʻaufaitio i le senituri e 19 le manatu e faapea, e leʻi tusia se tusi o Evagelia a o leʻi oo i le ogatotonu o le senituri lona lua T.A.; o lea la, e tau leai se aogā o ia tusi e iloa ai mea na tutupu i lenā taimi. Ae peitaʻi, o manusikulipi anamua o le Diatessaron na maua talu mai lenā taimi, ua faamaonia ai o na Evagelia e fā ma e na o le fā lava, ua leva ona lauiloa ma taliaina i le ogatotonu o le senituri lona lua T.A.

O le mauaina o le Diatessaron ma faamatalaga e faatatau i ai i le gagana Arapi, Armenia, Eleni, ma le Latina, na māfua ai ona tusia e le tagata poto o le Tusi Paia o Sir Frederic Kenyon e faapea: “O le mauaina o na tusi ma faamatalaga, ua aveesea ai so o se masalosaloga e uiga i le Diatessaron, ma faamaonia ai i le pe tusa o le 170 T.A. e faapea, na faasilisilia tusi e fā o Evagelia o loo i le Tusi Paia, i lo o se isi tala e faatatau i le soifuaga o lo tatou Faaola.”

[Ata i le itulau 11]

Tatiana

[Ata i le itulau 11]

Diatessaron i le Faa-Arapi