Le Pasama o Kiliata e Faamālōlō Ai

UA TAʻUA i le tusi o Kenese le tala masani i le faatauina atu o Iosefa e ona uso, i tagata faatauʻoa Isamaeli o loo ō atu i Aikupito. E ō mai le ʻaumalaga mai i Kiliata ma o loo ave e kamela pasama ma isi oloa i Aikupito. (Kenese 37:25) Ua taʻu mai ai i lenei tala, sa tāua tele pasama mai i Kiliata i Sasaʻe Tutotonu anamua mo le faamālōlōina o maʻi.

Ae i le senituri lona ono T.L.M., na fesili ai ma le faanoanoa le perofeta o Ieremia: “Pe e leai ea se pasama i Kiliata?” (Ieremia 8:22) Aiseā na fesili ai faapea Ieremia? O le ā lea mea e taʻu o le pasama? Po o iai se pasama e faamālōlō ai tagata i aso nei?

 Pasama i Taimi o le Tusi Paia

O le pasama o se taʻu masani lea e faamatala ai se sua manogi e pei o se uu, ma pulu e maua mai i laau eseese. E masani ona faaaogā le suāuu pasama i mea manogi lelei e mū ma fagu faamanogi, o se mea tautele i Sasaʻe Tutotonu anamua. Sa aofia ai i mea na faia ai le uu paia e faauu ai, ma le mea manogi lelei e mū sa faaaogā i le faleʻie paia, ina ua faatoʻā ō mai tagata Isaraelu mai i Aikupito. (Esoto 25:6; 35:8) Sa aofia ai foʻi le suāuu pasama i meaalofa taugatā na avatu e le tupu tamaʻitaʻi o Seepa i le tupu o Solomona. (1 Tupu 10:2, 10) A o leʻi alu atu Eseta i luma o le tupu Peresia o Asueru, na fofō ma faaaulelei o ia mo le ‘⁠ono masina i le suāuu pasama.’—Eseta 1:1; 2:12.

E ui ina maua suāuu pasama mai i vaega eseese o Sasaʻe Tutotonu, ae e na o le Nuu Folafolaina na maua ai le pasama o Kiliata, ona o sasaʻe o le vaitafe o le Ioritana sa iai Kiliata. Na manatu Iakopo i le pasama o se ‘mea e aupito lelei o le laueleele,’ ma na ia avatu faameaalofa i Aikupito. (Kenese 43:11) Na taʻua foʻi e le perofeta o Esekielu le pasama o se tasi o oloa na faatau atu e Iuta ma Isaraelu i Turo. (Esekielu 27:17) Sa lauiloa le pasama ona e aogā e togafiti ai maʻi. E masani ona taʻua i tusitusiga anamua le aogā o lenei uu i togafitiga ma le faamālōlōina o maʻi, aemaise lava le togafitia o manuʻa.

Pasama mo se Nuu e Mamaʻi

Aiseā la na fesili ai Ieremia, “Pe e leai ea se pasama i Kiliata”? E ao ona tatou toe tepa i le nuu o Isaraelu ina ia iloa ai le tali. Sa faamatala muamua e le perofeta o Isaia lo latou tulaga pagatia faaleagaga: “E leai se mea ua sao e amata mai i le alofivae e oo i le ulu. O manuʻa, totoulia, ma poʻu, o mea ia e leʻi faamamāina, pe fusi.” (Isaia 1:6) E leʻi fia amanaʻia e le nuu lo latou tulaga pagatia ma saʻili se vaifofō, ae na faaauau ona latou lotomaaa. O lea, na faapea mai ma le faanoanoa Ieremia: “Ua latou teena le afioga a Ieova, ma o le ā foʻi se atamai o iā i latou?” Maʻimau pe ana latou toe foʻi iā Ieova semanū e na te faamālōlōina i latou. “Pe e leai ea se pasama i Kiliata?” O se fesili lelei tele e ao ona mafaufau i ai.—Ieremia 8:9.

Ua tumu le lalolagi i aso nei i “manuʻa, totoulia, ma poʻu.” O loo mafatia tagata i le mativa, faiga lē tonu, manatu faapito, ma le agaleagaina e isi, talu ai ua maalili le alofa i le Atua ma tuaoi. (Mataio 24:12; 2 Timoteo 3:1-5) Ua lagona e le toʻatele le lē amanaʻia o i latou ona o lo latou lanu, gagana, po o lo latou matutua. Ua faaopoopo i ai ma tigā e māfua mai i oge, faamaʻi, taua ma le oti. E toʻatele tagata loto faamaoni ua pei o Ieremia, o loo fia iloa pe e iai se “pasama i Kiliata” e faaleleia ai o latou faalogona ma maʻi faaleagaga.

Le Tala Lelei e Mālōlō Ai

O le fesili foʻi lenā na iai i mafaufau o ē lotomaulalo i aso o Iesu. Ae na maua le tali o le fesili. I le amataga o le tausaga 30 T.A., na faitau ai e Iesu le tusi taai a Isaia i le sunako i Nasareta e faapea: “Ua faauuina aʻu e Ieova e folafola atu le tala lelei i ē e agamalu. Ua ia auina atu aʻu e fusifusi i ē ua loto momomo.” (Isaia 61:1) Ona faatatau lea e Iesu o nei upu iā te ia lava, o ia o le Mesia ua iai le tofiga e faailoa atu le feʻau e faamāfanafanaina ai.—Luka 4:16-21.

I lana auaunaga, na talaʻia ma le maelega e Iesu le tala lelei o le Malo o le Atua. (Mataio 4:17) I le lauga na faia i le mauga na ia folafola atu ai, o le a suia le tulaga pagatia o tagata: “E fiafia outou o ē e fetagisi i le taimi nei, auā e ʻataʻata outou.” (Luka 6:21) O le faalauiloa atu e Iesu o le feʻau faamāfanafana e faapea, o le a oo mai le Malo o le Atua, na ia ‘fusifusia ai ē ua loto momomo.’

O loo faapena foʻi ona avea “le tala lelei o le malo” ma faamāfanafanaga i o tatou aso.  (Mataio 6:10; 9:35) Seʻi tagaʻi foʻi i le tulaga o Lota ma Lilieni. Na la iloaina le folafolaga a le Atua e uiga i le ola e faavavau iā Ianuari 1961, ma na pei o se pasama e faamālōlōina ai i laʻua. Na fai mai Lilieni, “Na pei o le peʻapeʻa laʻu minoi i le umukuka ona o loʻu fiafia tele i mea ua ou aʻoaʻoina.” E oo ane i le taimi lea, ua sefulu tausaga talu ona pē se vaega o le tino o Lota, ma na fai mai o ia, “E maʻeu le fiafia na ou maua i le olaga ona o le faamoemoe matagofie, o le toetū ma le faamutaina o tigā ma maʻi uma lava.”—Faaaliga 21:4.

O le 1970 na pagatia ai i laʻua ona ua maliu si a la tama tama e 11 ona tausaga. Ae e leʻi matuā lofitūina ai i le mafatia. Na la lagona o loo ‘faamālōlōina e Ieova ē ua loto momomo, ma fusifusia o latou manuʻa tigā.’ (Salamo 147:3) Na faamāfanafanaina i laʻua e lo la faatuatua. Ua toeitiiti nei atoa le 50 tausaga o la lagona le filemu o le mafaufau ma le lotomalie, ona o le tala lelei o le Malo o le Atua o loo fotuaʻi mai.

Se Faamālōlōga ua Lata Mai

Po o iai la se “pasama i Kiliata” i aso nei? Ioe, o loo iai le pasama faaleagaga e faamālōlō ai. O le faamāfanafanaga ma le faamoemoe ua maua mai i le tala lelei o le Malo, e mafai ona fusifusia ai loto ua momomo. Pe e te fia tofo i lenā faamālōlōga? E tatau ona e talia le feʻau faamāfanafana mai le Afioga a le Atua ma ia taaʻina ai lou olaga. E faitau miliona tagata ua faia faapena.

O lenei faamālōlōga ua avea ma ata o le mapusaga sili o loo fotuaʻi mai. Ua matuā lalata le taimi o le a “faamālōlōina ai nuu” e Ieova le Atua, ma maua ai le ola e faavavau. I lenā taimi, “e lē fai mai foʻi se tasi ua nofo ai: ‘Ou te maʻi.’” Ioe, o loo iai pea le “pasama i Kiliata”!—Faaaliga 22:2; Isaia 33:24.

[Ata i le itulau 23]

I aso nei, o loo faamālōlōina e le mana o le tala lelei o le Malo o le Atua tigā o ē ua loto momomo