E te Silafia?

Pe e moni e sauni e loi a latou meaʻai i le taumāfanafana ae faaputu i le taimi o le seleselega?

▪ Ua faapea mai le Faataoto 6:6-8: “O oe le tagata paiē, inā alu ia i le loi; ia vaavaai i ona ala ina ia e atamai ai. E ui e leai sona taʻitaʻiʻau, o se leoleo, po o se pule, ae e na te sauniunia ana meaʻai i le tau māfanafana; e na te faaputuina foʻi ana meaʻai i le taimi o le seleselega.”

E tele ituaiga o loi e faaputuputu a latou meaʻai. E foliga mai o le ituaiga lea na taʻua e Solomona, o le loi e selesele (Messor semirufus), lea foʻi e taatele i Isaraelu i aso nei.

Ua taʻua i se tasi tusi, “e tuua e loi e selesele o latou faamoega i le taimi e lelei ai le tau, e saʻili ni a latou meaʻai . . . [ma] ao fatu i taimi o le taumāfanafana.” E latou te tau fatu mai i laau pe ao mai i le eleele. E fau e loi o latou faamoega i mea e maua ai fatu, i lalo o le palapala e latalata i faatoʻaga, mea e faaputu ai saito, ma mea e soli ai saito.

E teu e loi a latou meaʻai i le faamoega e iai le faasologa o potu e fesootaʻi i auala e felavasaʻi. O le tetelē o o latou fale teu fatu, e tusa ma le lima inisi (12 cm) le lautele ae ʻafa inisi (1 cm) le maualuga. O lea la, pe a lava meaʻai e faaputu a loi e selesele, e mafai ona feola ai “mo le silia i le 4 masina e aunoa ma le toe saʻilia o ni meaʻai po o vai.”

O le ā na aofia ai i le avea ma tautū uaina a le tupu?

▪ Na avea Neemia ma tautū uaina i le tupu Peresia o Aretaseta. (Neemia 1:11) I maota o tupu o Sasaʻe Tutotonu anamua, e lē faatauvaa le avea o se tasi ma tautū uaina a le tupu. Ae o ia o se tagata maualuga i le malo. O tusitusiga ma ata anamua e uiga i tautū uaina, ua tatou malamalama ai i le matafaioi a Neemia na faia i le maota o le tupu o Peresia.

E muamua tofo e le tautū uaina le uaina a le tupu, ina neʻi faaonā e se isi le tupu. E matuā faamoemoeina la e le tupu le tautū uaina. Ua taʻua e le tagata poto o Edwin M. Yamauchi: “E manaʻomia tele ni tagata faamoemoeina e galulue i le maota o le tupu, ona sa tele faufauga leaga i le maota o le tupu o Peresia.” E foliga mai foʻi sa avea le tautū uaina o se tagata e sili ona fiafia ma faalogo i ai le tupu. Ona o lana galuega e sili ona lata i le tupu i aso uma, atonu na mafai ai ona ia filifilia tagata e ō atu i luma o le tupu.

Atonu o le māfuaaga lenā na talia ai e le tupu le talosaga a Neemia e tuu mai o ia e alu e toe fai pā o Ierusalema. O lona uiga na matuā tāua Neemia i le tupu. Ua taʻua i le Anchor Bible Dictionary: “Na pau le tali a le tupu, ‘⁠O afea e te toe foʻi mai ai?’ ”—Neemia 2:1-6.

[Ata i le itulau 9]

Ata vane mai i le maota o le Tupu Peresia i Peresepoli

[Siata]

(Tagaʻi i le lomiga mo le ata atoa)

[Ata i le itulau 9]

Le Aloalii o Kesese

Tautū uaina

Tariu le Sili

[Ē Ana le Ata]

© The Bridgeman Art Library International