Ua Fesili Mai le ʻAufaitau . . .

Pe e Iai se Amataga o le Atua?

▪ Ua tali le Tusi Paia, e leai se amataga o le Atua. E soifua pea le Atua. E faigatā ona tatou malamalama o le Atua e leai sona amataga po o sona gataaga. Peitaʻi, e lē tatau ona tatou teena lenā manatu ona e faapea e tatou te lē malamalama i ai.

Pe e faatalitalia i tatou e malamalama i ala uma o le Atua? Ua faapea mai le aposetolo o Paulo: “Maʻeu le tele o le tamaoaiga, ma le atamai atoa ma le silafaga a le Atua! E lē masuʻesuʻeina ana faamasinoga, ma e lē mafai foʻi ona iloa ona ala!” (Roma 11:33) E lē mafai ona tatou malamalama atoatoa i le tele o le atamai ma le silafia o le Atua, e pei ona lē mafai ona malamalama se tamaitiiti laʻitiiti i mea uma e uiga i ona mātua. O nei upu faagaeeina a Paulo, e ui o loo faatatau muamua i le tutasi o le atamai ma le alofa mutimutivale o le Atua, ae o loo taʻu mai ai e iai ala o Ieova le Atua ma ana galuega e lē tāea e o tatou mafaufau. O se tasi o na mea, o le leai lea o se amataga o le Atua. Ae e mafai ona tatou talitonuina atoatoa aʻoaʻoga a le Tusi Paia e faatatau i le Atua. Na fetalai Iesu e tusa ai ma tusitusiga paia: “O lau afioga o le upu moni lea.” —Ioane 17:17.

Na taʻua e Mose i lana tatalo iā Ieova: “O oe lava o le Atua e mai i le vavau e oo i le faavavau.” (Salamo 90:2) O loo taʻua i inei e Mose, e lua vala e faatatau i le Atua. O le tasi vala e faatatau i le “soifua pea e faavavau, faavavau lava” o Ieova. (Faaaliga 4:10) O lea la, o le a iai pea le Atua e faavavau. A o le isi vala, e agaʻi i le vavau, pe e leai sona amataga. I nisi faaupuga, e leʻi foafoaina le Atua, pe na fanaua o ia e se isi. Nai lo lenā, o le Atua e mai i le vavau e leai sona amataga.

E faigatā ona malamalama i mea e lē mafai ona tatou vāai atu i ai. Peitaʻi, e mafai ona tatou malamalama i manatu e faigatā, e pei o le faitauina o numera agaʻi i luma ma tua. Pe faitau i luma pe faitau i tua numera, e leai se mea e gata mai ai. O lea, e faapena foʻi le soifuaga o Lē na faia mea.

E talafeagai la ona faapea atu, e na o le Atua e iai le faalupega tutasi o le “Tupu o le vavau.” (1 Timoteo 1:17) Seʻi manatu foʻi, e iai le amataga o Iesu Keriso, le anoanoaʻi o agelu i le lagi, ma tagata uma i le lalolagi, ona na foafoaina uma i latou. (Kolose 1:15, 16) Ae e lē faapena le Atua. O le maumaututū i le manatu e faapea na foafoaina le Atua, e aumai ai ni manatu e leai se uiga ma fenuminumiaʻi ai, po o ai na faia Lē na foafoaina mea. E leai, o Ieova lava ia na soifua “mai i le vavau e oo i le faavavau.” (Salamo 90:2) I nisi faaupuga, na soifua Ieova a o leʻi iai ni taimi.—Iuta 25.

Ia teu i mafaufau, o le talitonuga i le soifua e faavavau o le Atua, e lē na o se aʻoaʻoga e moni. Auā a tatou vaai totoʻa i le tatalo a Mose, o loo faaalia ai o le soifua e faavavau o le Atua, ua faamautinoa mai ai i ā i tatou le folafolaga alofa o le ola e faavavau. Ua faamatalaina le Atua e faapea o le “mea e [tatou] te nonofo ai i lea tupulaga ma lea tupulaga,” e ese ai mai le puupuu tele o lo tatou olaga i le taimi nei. O Ieova lava ia o le Tamā alofa, ma o le a iai pea o ia mo ona tagata. Tau ina ia faamāfanafanaina pea i tatou i lenā upu moni matagofie!—Salamo 90:1.