2 O Ai e Tatalo Atu i Ai?

PE E faafofoga le Atua i tatalo uma, e tusa po o ai e tatalo atu i ai? E masani ona manatu tagata i aso nei o le manatu saʻo lenā. O ē ua lagolagoina le tuufaatasia o lotu e fiafia i lenā manatu, ma e mananaʻo ia talia lotu uma e ui e eseese. Ae pe e sesē lenā manatu?

Ua taʻua i le Tusi Paia, o le tele o taimi e lē saʻo le atua e tatalo atu i ai tagata. Ina ua tusia le Tusi Paia, sa masani ona tatalo tagata i tupua ua ta. Ae na lapataʻi mai pea le Atua e uiga i lenā faiga. Auā ua taʻua i le Salamo 115:4-6 e uiga i tupua: “E fai o latou taliga, ae e lē faalogo.” E manino le manatu. Aiseā e tatalo atu ai i se atua e lē taitai ona faalogo mai iā te oe?

E manino lenei manatu i se tala o loo i le Tusi Paia. Na fai atu le perofeta moni o Elia i perofeta a Paala ia tatalo muamua i lo latou atua, ona ia tatalo atu ai lea i lona Atua. Na fai atu Elia o le a tali mai le Atua moni, ae o le a lē tali mai le atua pepelo. Na talia e perofeta a Paala le luʻi, ma latou matuaʻi tatalo mo se taimi umi, na oo lava foʻi ina alalaga leotetele, ae e leʻi taulau ai! Ua taʻua i le tala: “E leai foʻi se tasi na tali mai, ma e leai se tasi na faalogo mai.” (1 Tupu 18:29) Ae o le ā na tupu ina ua tatalo Elia?

Ina ua tatalo Elia, ona tali mai loa lea o lona Atua, ma auina ifo le afi mai i le lagi ina ia faamū ai le taulaga na faia e Elia. Aiseā ua ese ai? E tatou te maua le tali i le tatalo a Elia lea e tusia i le 1 Tupu 18:36, 37. O se tatalo e puupuu, pe tusa ma le 30 upu i le gagana Eperu na tusia ai. Peitaʻi i lenā tatalo puupuu, e faatolu ona taʻua e Elia le suafa o le Atua, o Ieova.

O le uiga o le igoa Paala, “o lē e ana” po o le “matai,” o le atua o tagata Kanana, ma e tele atua o isi vaipanoa na faaigoa i lenei atua. Peitaʻi o Ieova, o le suafa tutasi lea o le Atua moni i le aoao o mea, ma e leai se tasi e ave i ai lenā suafa. Na taʻu mai e lenei Atua i ona tagata: “O aʻu o Ieova. O loʻu igoa lea; ou te lē avatua loʻu mamalu i se tasi.”—Isaia 42:8.

Pe na talia uma le tatalo a Elia ma tatalo a perofeta a Paala? Na faaleagaina e le tapuaʻiga a Paala tagata, i le faaaofia i a latou tapuaʻiga o faiga faatalitane ma taulaga e fai i tagata. Ae na faatonu e Ieova ona tagata, o Isaraelu, e tapuaʻi atu iā te ia i se auala mamalu, ma saʻoloto ai mai i na faiga matagā. Seʻi manatu foʻi: Pe a e tusi atu i sau uō e matuā faaaloalogia, pe e te faatalitalia o le a avatu lenā tusi i se isi tagata, o sē e leaga lona talaaga ma e na te lē faatāua  mea e tāua i lau uō? E mautinoa e leai!

Pe a e tatalo iā Ieova, o lenā ua e tatalo i Lē na foafoaina mea, o le Tamā o le fanau a tagata. * Na tatalo le perofeta o Isaia: “O oe Ieova e, o lo matou Tamā.” (Isaia 63:16) O Ia lea sa faasino i ai Iesu Keriso ina ua fetalai atu i ona soo: “Ou te alu aʻe i loʻu Tamā, ma lo outou Tamā, i loʻu Atua ma lo outou Atua.” (Ioane 20:17) O Ieova o le Tamā o Iesu. O Ia o le Atua na tatalo i ai Iesu, ma o Lē na ia aʻoaʻoina ona soo ia tatalo atu i ai.—Mataio 6:9.

Po o faatonu i tatou i le Tusi Paia e tatalo iā Iesu, Maria, sagato po o agelu? E leai, ua na o Ieova. Seʻi manatu i māfuaaga e lua. Muamua, o le tatalo o se vaega o le tapuaʻiga, ma ua taʻua i le Tusi Paia e tatau ona tapuaʻi atu tau lava o Ieova. (Esoto 20:5) Lua, ua taʻua i le Tusi Paia Ieova o le “Faafofoga tatalo.” (Salamo 65:2) E ui e tuuina atu e Ieova le tele o matafaioi i isi, ae e na te lē tuuina atu lenei matafaioi i se isi. O ia o le Atua o lē ua folafola mai e faafofogaina a tatou tatalo.

Pe afai la e te manaʻo e faafofoga e le Atua au tatalo, ia manatua le apoapoaʻiga lenei mai i le Tusi Paia: “E faaolaina foʻi i latou uma o ē e valaau i le suafa o Ieova.” (Galuega 2:21) Ae pe e faafofoga Ieova i tatalo uma? Pe e iai se isi mea e ao ona tatou iloa pe afai e mananaʻo e faafofoga e Ieova a tatou tatalo?

[Faaopoopoga i lalo]

[Ata i le itulau 5]

Ua faamaonia i le luʻi a Elia na fai atu i perofeta a Paala, e lē taliaina tatalo uma