Le Pogai e Tāua ai le Tala i Etena

O SE tasi o faitioga e faateʻia ai ua faia e nisi tagata atamamai e uiga i le tala i Etena, e faapea e lē o lagolagoina lenā tala e isi tusi o le Tusi Paia. O se faaaʻoaʻoga, ua tusi le Polofesa o suʻesuʻega i mea tau lotu, o Paul Morris: “E leai ni faamatalaga mulimuli ane i le Tusi Paia e uiga i le tala i Etena.” Ua ioe nisi tagata atamamai i lona manatu, ae e lē tusa ai ma le mea moni.

E tele taimi ua taʻua ai i le Tusi Paia le faatoʻaga i Etena, Atamu, Eva ma le gata. * Ae ua sili atu ona leaga le mea ua faia e nisi pe a faatusatusa i manatu sesē o ni nai tagata atamamai. E ala i le faalēaogāina o le tala i le Kenese e uiga i le faatoʻaga i Etena, ua faalēaogāina ai e taʻitaʻi lotu ma le ʻaufaitio o le Tusi Paia, le Tusi Paia atoa. E faapefea?

E tāua tele ona iloa mea na tutupu i Etena, ina ia malamalama ai i le Tusi Paia atoa. O se faaaʻoaʻoga, ua saunia le Afioga a le Atua e fesoasoani iā i tatou ia maua tali o fesili e sili ona tāua i tagata. O le tele o taimi, o tali i le Tusi Paia i na fesili e fesootaʻi atu i mea na tutupu i le faatoʻaga i Etena. Seʻi manatu i ni faataʻitaʻiga.

● Aiseā ua tatou ola matutua ai ma feoti? Pe ana tumau ona usitaʻi Atamu ma Eva iā Ieova, e mautinoa e la te ola e faavavau. Ae ona o lo la fouvale, ua la feoti ai. Na amata lenā faasalaga talu mai le aso na la fouvale ai. (Kenese 2:16, 17; 3:19) Sa lē toe lelei atoatoa i laʻua ma tuufaasolo mai le agasala ma le tino augavale i a la fanau. Ua taʻua i le Tusi Paia: “E pei ona oo mai o le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.”—Roma 5:12.

● Aiseā ua lē taofia ai e le Atua le amioleaga? I Etena, na taʻua ai e Satani le Atua e pepelo ma o loo ia taofia mea lelei mai i ona tagata. (Kenese 3:3-5) O lea na ia luʻia  ai le tonu o le pule a Ieova. Na filifili Atamu ma Eva e mulimuli iā Satani. Na la teena le pule silisili ese a Ieova, ma manatu e mafai e le tagata lava ia ona filifili i le mea lelei ma le mea e leaga. O le faimeatonu ma le atamai o Ieova, na ia silafia ai e pau le auala e tali ai lenei luʻi, o le tuu lea o le avanoa i tagata e pule ai iā i latou lava e tusa ai ma a latou filifiliga. O a latou pulega faapea taaʻiga a Satani, ua iʻu ai i le amioleaga ma ua faasolosolo ona faamaonia ai le mea moni lenei: E lē mafai e le tagata ona pulea ia lava e aunoa ma le Atua.—Ieremia 10:23.

● O le ā le finagalo o le Atua mo le lalolagi? Na finagalo Ieova ia matagofie le lalolagi atoa e pei o le faatoʻaga i Etena. Na ia poloaʻia Atamu ma Eva ia faatumu le lalolagi i a la fanau ma “galueaʻiina,” ina ia matagofie ma sologa lelei mea uma i le lalolagi atoa. (Kenese 1:28) Sa finagalo la le Atua ia avea le lalolagi ma parataiso e nonofo ai se aiga e lelei atoatoa ma autasi, o fanau a Atamu ma Eva. E tele ina taʻua i le Tusi Paia auala o le a faataunuu ai e le Atua lenā finagalo.

● Aiseā na afio mai ai Iesu i le lalolagi? O le fouvalega i Etena na iʻu ai ina faasalaina i le oti Atamu ma Eva ma a la fanau uma, ae na saunia ma le alofa e le Atua se faamoemoe. Na ia auina mai lona Alo i le lalolagi ina ia faia le togiola. (Mataio 20:28) O le ā le uiga o lenā mea? O Iesu o “le Atamu mulimuli,” auā na taulau o ia i le mea e leʻi faia e Atamu. Na avea pea Iesu ma tagata lelei atoatoa, e ala i le usiusitaʻi pea iā Ieova. Ona ia foaʻiina atu lea o lona ola o se taulaga po o se togiola, ina ia faamagaloina ai agasala a tagata faamaoni uma, ma mulimuli ane mauaina le ola lea sa iā Atamu ma Eva i Etena a o la leʻi agasala. (1 Korinito 15:22, 45; Ioane 3:16) O lea na faamautinoa ai e Iesu, o le a taunuu moni le finagalo o Ieova ia avea lenei lalolagi ma parataiso e pei o Etena. *

E manino le finagalo o le Atua, ae e lē o se aʻoaʻoga faalotu e lavelave. E pei ona moni le faatoʻaga i Etena ma iai moni ni meaola ma tagata, e mautinoa foʻi la ua lē o toe umi ona faataunuuina moni lea o folafolaga a le Atua mo le lumanaʻi. Po o lou faamoemoe lenā? E faalagolago lava iā te oe. E finagalo le Atua ia maua e tagata e toʻatele lenā lumanaʻi, e oo lava i ē e agasala.—1 Timoteo 2:3, 4.

A o tautau Iesu i le laau, na ia fetalai atu i se tamāloa na faia se mea sesē i lona olaga. O se tagata solitulafono le tamāloa, na ia iloa e tatau ona fasiotia o ia. Peitaʻi na ōle atu iā Iesu mo se faamāfanafanaga ma le faamoemoe. Na tali Iesu: “O le a ta faatasi ma oe i le Parataiso.” (Luka 23:43) Pe afai e finagalo Iesu ia iai lenā tamāloa i inā, e toetū ma maua le avanoa e ola ai e faavavau i le parataiso, pe e lē o lona finagalo foʻi lenā mo oe? Ioe, ma o le finagalo foʻi lenā o lona Tamā! Pe afai e te fia mauaina lenā lumanaʻi, ia fai le mea sili e te mafaia e aʻoaʻoina ai e uiga i le Atua, o lē na faia le faatoʻaga i Etena.

[Faamatalaga pito i lalo]

 [Pusa/Ata i le itulau 10]

Se Valoaga Tāua Tele O Le Tusi Paia

“Ou te faatupuina le feitagaʻi i le va o oe [le gata] ma le fafine, ma i le va o lau fanau ma lana fanau. O le a ia tuʻimomomoina oe i le ulu, ae o le a e tuʻimomomoina o ia i le mulivae.”—Kenese 3:15.

O le uluaʻi valoaga lenā o le Tusi Paia na fofogaina e le Atua i Etena. O ai vaega e fā o le valoaga: le fafine, lana fanau, le gata ma lana fanau? E faapefea ona “feitagaʻi” nei vaega e fā?

LE GATA

Satani le Tiapolo.—Faaaliga 12:9.

LE FAFINE

O le faalapotopotoga a Ieova o foafoaga agaga i le lagi. (Kalatia 4:26, 27) Na taʻua e Isaia “le fafine,” ma valoia o le a ia fanauina se nuu faaleagaga i le lumanaʻi.—Isaia 54:1; 66:8.

LE FANAU A LE GATA

O ē e filifili e fai mea e manaʻo ai Satani.—Ioane 8:44.

LE FANAU A LE FAFINE

O le vaega autū, o Iesu Keriso, o lē e mai i le vaega faalelagi o le faalapotopotoga a Ieova. E aofia ai uso faaleagaga o Keriso i le “fanau,” o ē o le a pule faatasi ma ia i le lagi. Ua faia aʻe i na Kerisiano faauuina se nuu faaleagaga, o “le Isaraelu a le Atua.”—Kalatia 3:16, 29; 6:16; Kenese 22:18.

LE MANUʻA O LE MULIVAE

O se manuʻa tigā na oo i le Mesia ae e lē tumau. Na faapogaia e Satani le fasiotia o Iesu, ae na toe faatūina o ia.

LE MANUʻA O LE ULU

O se manuʻa e fasiotia ai Satani. O le a faaumatia e faavavau e Iesu Satani. Ae e muamua ona tafiesea e Iesu mea leaga uma na faia e Satani talu mai Etena.—1 Ioane 3:8; Faaaliga 20:10.

Mo se otootoga o tala i le Tusi Paia i lenei mataupu, tagaʻi i le polosiua faa-Peretania The Bible—What Is Its Message? lomia e Molimau a Ieova.

[Ata i le itulau 11]

Na mafatia Atamu ma Eva i āuga leaga o le agasala