Iesu Aiseā na Maliu Ai?

ʻNa sau le Atalii o le tagata ina ia foaʻi atu lona ola e fai ma togiola e sui aʻi tagata e toʻatele.’—MAREKO 10:45.

NA SILAFIA lelei e Iesu e lē soifua o ia i se olaga toʻafilemu. O le a faapuupuuina lona soifua e ala i se maliu faapuapuagatia i le tolu sefulu ma ona tupu o ona tausaga, ae ua lava saunia o ia e faafetaiaʻia.

O loo faamamafa mai i le Tusi Paia le tāua tele o le maliu o Iesu. Ua taʻua i se tasi lomifefiloi, e faa-175 taimi o loo taʻua ai le maliu o Iesu i Tusitusiga Paia Eleni, po o le Feagaiga Fou. Aiseā na tatau ai ona mafatia Iesu ma maliu? E tāua le tali, ona e telē se aafiaga o lona maliu i o tatou olaga.

Mea na faatalitalia e Iesu

I le tausaga mulimuli o lona soifua, sa tele ina lapataʻia ai e Iesu ona soo i sauāga ma le maliu o le a oo iā te ia. A o agaʻi atu i Ierusalema e faamanatu lana Paseka mulimuli, na faapea atu ai Iesu i ona soo e toʻa 12: “O le a tuuina atu ai le Atalii o le tagata i le ʻaufaitaulaga sili ma le ʻautusiupu, o le a latou faasalaina o ia i le oti, ma tuuina atu o ia i tagata o nuu ese, latou te tauemu ma tuufeanu iā te ia, ma sasa tigāina ma fasiotia o ia.” * (Mareko 10:33, 34) Aiseā na mautinoa ai e Iesu le mea o le a tupu iā te ia?

Na masani lelei Iesu i le tele o valoaga i Tusitusiga Eperu o loo faamatalaina ai le auala e maliu ai. (Luka 18:31-33) Seʻi iloilo nisi o valoaga ma mau o le Tusi Paia o loo faamatalaina ai lo latou faataunuuga.

O le Mesia o le a . . .

▪ Faalataina i tupe siliva e 30.​—SAKARIA 11:12; MATAIO 26:14-16.

▪ Tā ma tuufeanu i ai tagata.​—ISAIA 50:6; MATAIO 26:67; 27:26, 30.

▪ Faatautau i le laau.​—SALAMO 22:16; MAREKO 15:24, 25.

▪ Tauemua a o faatautau i le laau.​—SALAMO 22:7, 8; MATAIO 27:39-43.

▪ Fasiotia ae leʻi gauia sona ivi.​—SALAMO 34:20; IOANE 19:33, 36.

Na faataunuuina e Iesu nei valoaga, ma le tele o isi valoaga. E lē mafai ona ia faia nei mea na o ia. O le faataunuuina o nei valoaga uma iā Iesu, e faamaonia ai, na auina moni mai o ia e le Atua. *

Aiseā na tatau ai ona puapuaga ma maliu Iesu?

Na maliu Iesu ina ia faamaonia ai ni mataupu e sili ona tāua

Sa silafia lelei e Iesu le finauga e faatatau i le pule silisili ese i le aoao o mea na lāgā i Etena. Na uunaʻia e se foafoaga agaga fouvale Atamu ma Eva ia lē usiusitaʻi i le Atua, ma ua fesiligia ai le tonu o le pule silisili ese a le Atua, po o le faatinoga o lana pulega. Na lāgā ai foʻi le fesili, pe tumau i le faamaoni tagata i le Atua pe a tofotofoina.​—Kenese 3:1-6; Iopu 2:1-5.

 Na faamaonia e Iesu le pule silisili ese a Ieova, ma le faamaoni o tagata, e ala i lona usiusitaʻi atoatoa “e oo i le oti . . . i le laau na faapuapuagatia ai.” (Filipi 2:8) Na ia faamaonia ai foʻi, e mafai e le tagata lelei atoatoa ona tumau i le faamaoni iā Ieova, e ui i tofotofoga ogaoga.

Na maliu Iesu e togiola ai tagata

Na valoia e le perofeta o Isaia, o puapuaga ma le maliu o le Mesia folafolaina, ua saunia ai se togisala mo le lalolagi. (Isaia 53:5, 10) Na malamalama Iesu i lea mea, ma finagalo malie e “foaʻi atu lona ola e fai ma togiola e sui aʻi tagata e toʻatele.” (Mataio 20:28) O lona maliu ua maua ai e tagata agasala le avanoa mo se faiā lelei ma Ieova, ma ua laveaʻiina mai ai i le agasala ma le oti. Ua mafai ai foʻi ona toe maua le mea na leiloa ona o Atamu ma Eva, o le faamoemoe lea e ola e faavavau i le lalolagi i se tulaga lelei atoatoa. *​—Faaaliga 21:3, 4.

Le mea e ao ona fai

I nei mataupu faasolo, ua iloiloina ai faamatalaga a le Tusi Paia e uiga iā Iesu—o fea na afio mai ai, na faapeʻī lona soifuaga, ma aiseā na maliu ai. O le iloaina o na mea moni e uiga iā Iesu, e aveesea ai talitonuga sesē e uiga iā te ia. O le gaoioi e tusa ma na mea e maua ai faamanuiaga, se olaga sili i le taimi nei ma le ola e faavavau i le lumanaʻi. Ua taʻu mai i le Tusi Paia mea e ao ona fai pe a e fia selesele i na faamanuiaga.

▪ Aʻoaʻo atili e uiga iā Iesu Keriso ma lana matafaioi i le faataunuuina o le finagalo o Ieova.​—IOANE 17:3.

▪ Ia faaalia i le auala e te ola ai le faatuatua iā Iesu, ma lou taliaina o ia e avea ma ou Faaola.​—IOANE 3:36; GALUEGA 5:31.

E fiafia Molimau a Ieova e fesoasoani iā te oe e aʻoaʻo atili e uiga iā Iesu Keriso, le “Alo e toʻatasi” o le Atua, lea e tatou te maua mai ai le meaalofa o le “ola e faavavau.”​—Ioane 3:16.

[Faaopoopoga i lalo]