Iesu Na Faapeʻī Lona Soifuaga?

“O laʻu meaʻai, o le faia lea o le finagalo o lē na auina mai aʻu, ma faaiʻu lana galuega.”​—IOANE 4:34.

NA FAAALIA i lenā fetalaiga a Iesu le mea e sili ona tāua i lona olaga. Sa femalagaaʻi Iesu ma ona soo i le nuu maugā o Samaria. (Ioane 4:6) Na avatu e ona soo iā te ia ni meaʻai, i lo latou manatu o loo fia taumafa o ia. (Ioane 4:31-33) Na faaalia i lana tali le sini autū o lona olaga. Sa sili iā te ia le faia o le finagalo o lona Tamā i lo o meaʻai. Na faamaonia i ana upu ma gaoioiga, o lona soifua atoa, o lona faia lea o le mea e finagalo i ai lona Tamā. O le ā e aofia ai?

Talaʻi ma aʻoaʻo le Malo o le Atua

O loo taʻua le galuega na faia e Iesu i lona olaga atoa i le Tusi Paia, e faapea: “Ona ia femalagaaʻi lea i Kalilaia uma, ua aʻoaʻo atu . . . ma talaʻi atu le tala lelei o le malo.” (Mataio 4:23) E lē na o le talaʻia o le Malo o le Atua na faia e Iesu. Na ia aʻoaʻoina foʻi tagata, ma faamalamalama, ma faatalitonu e ala i faamaoniga. O le manatu autū o le feʻau a Iesu, o le Malo.

A o faagasolo lana faiva, na aʻoaʻoina ai e Iesu lana ʻaufaalogologo, e uiga i le Malo o le Atua, ma mea o le a faia e lenā Malo. Mātau manatu o loo mulimuli mai e uiga i le Malo, ma mau o le Tusi Paia e maua ai fetalaiga a Iesu e uiga i lea mataupu.

▪ O le Malo o le Atua o se pulega i le lagi, ma ua tofia e Ieova Iesu e avea ma Tupu.​—MATAIO 4:17; IOANE 18:36.

▪ O lenā Malo, e faapaiaina le suafa o le Atua, ma faia ai lona finagalo i le lalolagi e pei ona faia i le lagi.​—MATAIO 6:9, 10.

▪ I le pulega a le Malo o le Atua, o le a suia ai le lalolagi atoa e avea ma parataiso.​—LUKA 23:42, 43.

▪ Ua lata ona oo mai le Malo o le Atua e faataunuuina lona finagalo i le lalolagi. *​—MATAIO 24:3, 7-12.

Faia galuega mamana

Na matuā lauiloa Iesu o se “Aʻoaʻo.” (Ioane 13:13) Peitaʻi, na ia faia ai foʻi le tele o galuega mamana a o talaʻi i le tolu ma le afa tausaga. Seʻi iloilo ni vala se lua o māfuaaga na faia ai nei galuega mamana. Muamua, e faamaonia ai na auina moni mai lava o ia e le Atua. (Mataio 11:2-6) O lona lua, e faaalia ai mea o le a ia faia i le lumanaʻi, o le Tupu o le Malo o le Atua i sona faataunuuga tele. Seʻi mātau nisi o vavega na ia faia.

▪ Na ia faatoʻafilemu le sami ma vavao le matagi.—MAREKO 4:39-41.

▪ Na ia faamālōlō tagata mamaʻi, e aofia ai ē tauaso, o ē tutuli ma ē e pipili.—LUKA 7:21, 22.

▪ Na faavavega ona ia fafaga le motu o tagata.—MATAIO 14:17-21; 15:34-38.

▪ Pe tusa e faatolu ona ia toe faatūina mai tagata mai le oti.—LUKA 7:11-15; 8:41-55; IOANE 11:38-44.

Seʻi mafaufau i le matagofie o le olaga i le lalolagi pe a pule se Tupu malosi faapena!

 Faailoa mai uiga o Ieova le Atua

E leai lava se isi e sili lona agavaa i le aʻoaʻoina o isi e uiga iā Ieova, na i lo o lona Alo o Iesu Keriso. Ona o Iesu “le ulumatua o foafoaga uma,” sa sili atu ona umi le taimi na soifua faatasi ai ma Ieova i le lagi nai lo se isi lava foafoaga agaga. (Kolose 1:15) E maʻeu le tele o avanoa sa ia maua e aʻoaʻo ai uiga ma mafaufauga o lona Tamā, lona finagalo, tapulaa, ma ona ala.

E talafeagai la iā Iesu ona faapea mai: “E leai se tasi ua iloa le Atalii e na o le Tamā; ma e leai se tasi ua iloa le Tamā e na o le Atalii, ma sē ua loto le Atalii e faaali i ai.” (Luka 10:22) A o iai Iesu i le lalolagi, sa naunau o ia e faailoa mai uiga o lona Tamā. O le auala na aʻoaʻo ma tautala ai o ia, sa faavae mai i mea sa ia vaaitino i ai a o iai i le afioaga paia o le Atua Silisili Ese.​—Ioane 8:28.

O gaoioiga a Iesu i le faailoaina mai o lona Tamā e ono faatusa i se pusa eletise e fetuunaʻi ai malosiaga (transformer). E mafai e lenā meafaigaluega ona talia le eletise malosi, ona faaitiitia lea i se tulaga vaivai, ina ia mafai ai ona faaaogāina e tagata. A o iai Iesu i le lalolagi, sa ia faaooina atu i se auala faigofie mea na ia aʻoaʻoina mai lona Tama, ina ia malamalama tagata ma faatatauina i o latou olaga.

Mātau ni vala tāua se lua sa faailoa mai ai e Iesu lona Tamā.

▪ I ana aʻoaʻoga sa faailoa mai ai e Iesu le mea moni e uiga iā Ieova—Lona suafa, ana fuafuaga, ma ona ala.​—IOANE 3:16; 17:6, 26.

▪ Na faaalia e Iesu e ala i ana gaoioiga, le anoanoaʻi o uiga matagofie o Ieova. Na matuā faaata manino e Iesu uiga moni o lona Tamā, ma ua talafeagai ai ona ia faapea mai: “O lē ua vaai mai iā te aʻu, ua vaai foʻi o ia i le Tamā.”​—IOANE 5:19; 14:9.

E tatou te maofa i le auala na soifua ai Iesu. E lē mafaatusalia aogā e maua pe a tatou iloiloina māfuaaga na maliu ai o ia, ma gaoioi ai e tusa ma mea ua aʻoaʻoina.

[Faaopoopoga i lalo]