O le ā Lenei Mea o le Mativa Lē Tagolima?

O LE mativa lē tagolima e aafia ai ola, ona e lē lava meaʻai, vai, ma mea tafu afi, lē lelei fale e nonofo ai, le tausiga o le soifua mālōlōina, ma aʻoaʻoga. E tasi le piliona i latou o aafia ai, e tusa lea ma le faitau aofaʻi o tagata i Amerika i Mātū ma Saute. E leʻi vāai le toʻatele o tagata i Europa ma Amerika i Mātū, i se tagata e mativa lē tagolima. Seʻi o tatou talanoa ma nisi o i latou.

E nonofo Mbarushimana ma lana avā ma la laʻua fanau e toʻalima i Rwanda, i Aferika. Na maliu le la tama lona ono i le faamaʻi malalia. O lana faamatalaga lenei: “Sa vaevaeina le fanua o loʻu tamā iā i matou e toʻaono. Ona o le laʻitiiti o loʻu fanua na maua, na matou ō ai loa ma loʻu aiga i le taulaga. Sa ma galulue ma laʻu avā i le laʻuina o taga maa ma oneone. E leai ni faamalama o lo matou fale, ae e laʻu mai vai i se vaieli e i le lotoā a leoleo. E tele ina tasi la matou ʻaiga i le aso, ae a leai loa se galuega, ona lē aai lea i le aso atoa. O taimi faapena ou te alu ese ai mai le fale, ona e faigatā le faalogo atu o fetagisi mai tamaiti i le fia aai.”

O Victor ma Carmen o ni tagata fai seevae. E nonofo ma la laʻua fanau e toʻalima i se nuu maotua i Polivia. E mautotogi i se potu o se fale tuai ua pala, toe tutulu ma e leai se eletise. O le toʻatele naʻuā o tamaiti i le aʻoga, sa tatau ai ona faia e Victor se kesi mo lona afafine ina ia mafai ona alu i le aʻoga. E tusa e ono maila (10 km) e savavali ai le ulugalii e aumai ni fafie o le afi e kuka ai meaʻai, ma faapuna ai vai inu. O le tala a Carmen, “E leai so matou fale ui, ae faaaogā le vaitafe, ma e taeele ai foʻi ma lafo i ai lapisi. O le ala lea e mamaʻi ai tamaiti.”

E nonofo Francisco ma Ilídia i se vaega maotua o Mozambique. O loo feola pea le toʻafā o le la fanau, a ua maliu le toʻatasi ona o le malalia ina ua teena e le falemaʻi o ia mo togafitiga. E tolu masina e ola ai le aiga i araisa ma umala na la totō i lo la fanua. Na taʻua e Francisco: “I nisi taimi, e lē ola lelei ai a matou meatotō ona o mugālā, pe e gaoia foʻi e tagata. Ona ou  tatipi lea o ofe ma faatau atu e fausia ai fale, ma maua mai ai se tupe itiiti. E lua itula e ma te savavali ai ma laʻu avā i le togāvao e aumai ni fafie. E tofu i maʻua ma le avegāfafie, o le isi e kuka ai meaʻai o le vaiaso a o le isi e faatau atu.”

E toʻatele e manatu ua telē le faalētonu i le lalolagi, ona e tusa e 1 mai i le 7 tagata o loo ola e pei o Mbarushimana, Victor, ma Francisco, ae e faitau piliona isi o loo tele le tamaoaiga. Ua taumafai nisi e foʻia lenei faafitauli. O le a talanoaina i le mataupu o sosoo mai a latou taumafaiga ma faamoemoega.

[Ata i le itulau 3]

O Carmen ma le toʻalua o lana fanau, o loo utu vai i se vaitafe