Pe e Iai se Faalapotopotoga a le Atua?

O LOO faaalia le tulaga maopoopo i foafoaga uma a le Atua. Ua faaalia foʻi i le Tusi Paia le maopoopo o foafoaga uma i le lagi, e tusa ai ma lona finagalo. Na iloa e le perofeta o Tanielu i se vaaiga se ʻauagelu e toʻatele i le afioaga o le Atua i le lagi, ma faapea mai: “Ua auauna pea iā te ia le afe o ni afe, ma ua tutū pea i ona luma le selau miliona.” (Tanielu 7:9, 10) E mautinoa lava le telē ma le maopoopo o le faalapotopotoga o loo iai, ina ia mafai ai ona faatino e nei agelu e sili atu ma le selau miliona le finagalo o le Atua, auā le lelei o ana auauna i le lalolagi.​—Salamo 91:11.

E ui o Ieova le Atua lē na faia i tatou e silisili i le faamaopoopoina o mea, ae e na te lē faatulafonoina mea uma. O ia o le Atua e alofa ma fiafia, ma e naunau mai foʻi mo le lelei o tagata uma. (1 Timoteo 1:11; 1 Peteru 5:7) Ua manino mai lea tulaga i le auala na feagai ai ma Isaraelu anamua, faapea ma Kerisiano i le uluaʻi senituri.

Sa Maopoopo Isaraelu Anamua

Na faaaogā e Ieova Mose e faamaopoopoina tagata Isaraelu mo le tapuaʻiga moni. Seʻi manatu i fuafuaga na faia i vaega e faatutū ai o latou faleʻie a o feoaʻi i le toafa o Sinai. E mautinoa le tele o le vevesi pe ana tuu lava le aiga e pule i le mea e faatū ai lo latou faleʻie. Na avatu e Ieova faatonuga patino i le nuu, i vaega e faatutū ai faleʻie o ituaiga eseese. (Numera 2:1-34) O loo aofia ai foʻi i le Tulafono a Mose faatonuga mo le tausia o le soifua mālōlōina ma le tumamā, e pei o le tanuina o otaotavale o tagata.​—Teuteronome 23:12, 13.

Ina ua ulu atu le fanauga a Isaraelu i le Nuu Folafolaina, ua faamaopoopoina lelei i latou o se nuu. Na vaevaeina le nuu i ituaiga e 12, e tofu ma lo latou fanua. Na faatautaia mea uma e latou te faia i Tulafono na avatu e Ieova, e pei o le tapuaʻiga, faaipoipoga, aiga, aʻoaʻoga, pisinisi, meaʻai, faatoʻaga, le tausiga o manu, ma isi mea. * E ui lava ina lavelave nisi tulafono, ae na faaalia ai le alofa o Ieova mo ona tagata ma lo latou lelei. O le usitaʻia o nei faatulagaga alofa, na maua ai e Isaraelu se tulaga aloaʻia i luma o Ieova.—Salamo 147:19, 20.

E leʻi faalagolago le taulau manuia o Mose i lona tomai o se taʻitaʻi, ae o lona faamaoni i le faatulagaga a le Atua. O se faaaʻoaʻoga, na faapefea ona iloa e Mose le ala e ui ai i le toafa? Na faasino i ai e Ieova e ala i se ao faaniutū i le ao ma le afi faaniutū i le pō. (Esoto 13:21, 22) E ui lava sa faaaogā e Ieova tagata, ae o ia lava na faamaopoopoina ma taʻitaʻia ona tagata. E faapena foʻi i Kerisiano anamua.

Na Maopoopo Lelei Kerisiano Anamua

Na faavaeina faapotopotoga Kerisiano  anamua i le tele o vaega o Asia ma Europa, ona o le maelega o le ʻauaposetolo ma soo i le galuega talaʻi. E ui ina taape solo nei faapotopotoga, ae e leʻi tuese mai i isi faapotopotoga. Peitaʻi, sa maopoopo lelei ma maua aogā mai le vaavaaiga alofa a le ʻauaposetolo. O se faaaʻoaʻoga, na tofia e le aposetolo o Paulo Tito ina ia “faamaopoopoina mea [i Kereta].” (Tito 1:5, The Jerusalem Bible) Na tusi Paulo i le faapotopotoga i Korinito, o nisi uso “e lelei i le faamaopoopoina o mea” po o “tagata e faamaopoopo mea.” (1 Korinito 12:28, The New Testament in Modern Speech; The Bible in Contemporary Language) Ae o ai moni lava na faamaopoopoina mea? Ua faapea mai Paulo, ua faamaopoopoina po ua “tuufaatasia e le Atua” le faapotopotoga.​—1 Korinito 12:24.

O toeaina ua tofia i faapotopotoga Kerisiano, e lē o ni pule i o latou uso talitonu. Ae o i latou o le “ʻaufaigaluega faatasi” o ē mulimuli i le taʻitaʻiga a le agaga o le Atua, ma ua faatalitalia i latou e “avea ma faaaʻoaʻoga lelei i le lafu mamoe.” (2 Korinito 1:24; 1 Peteru 5:2, 3) E lē o se tagata po o se vaega o ni tagata, ua avea ma ʻulu o le faapotopotoga,’ ae o Iesu Keriso ua toetū mai.​—Efeso 5:23.

Ina ua ese le auala na taulimaina ai e le faapotopotoga i Korinito mataupu mai le auala o loo taulimaina ai e isi faapotopotoga, na tusi Paulo: “Pe e na o outou ea na alu atu ai le afioga a le Atua, pe e na o outou na oo atu i ai?” (1 Korinito 14:36) Na faaaogā e Paulo lenei fesili ina ia faasaʻo ai o latou manatu, ma fesoasoani atu ina ia aua neʻi iā te i latou le agaga fia ese. Na faateleina ma olaola faapotopotoga ina ua mulimuli i taʻiala a le ʻauaposetolo.​—Galuega 16:4, 5. 

O se Faaaliga o le Alofa o le Atua

Ae ā aso nei? O nisi e lē fia ō i se lotu. Ae ua faaalia i le Tusi Paia, e iai lava le faalapotopotoga o loo faaaogā e le Atua e faatino ai lona finagalo. O ia na faamaopoopoina ona tagata i Isaraelu anamua, ma o ia foʻi na faamaopoopoina uluaʻi Kerisiano i la latou tapuaʻiga.

Pe e lē talafeagai foʻi la ona taʻitaʻia e Ieova ona tagata i aso nei, e pei ona sa ia faia anamua? Ioe, o le faamaopoopoina o ona tagata ina ia autasi, ua faaalia ai lona alofa mo i latou. Ua faaaogā foʻi e Ieova lana faalapotopotoga i aso nei ina ia faatinoina ai lona finagalo mo tagata. O lea la, e faapefea ona tatou iloa lana faalapotopotoga? Seʻi iloilo ni mea e iloa ai.

▪ Ua faamaopoopoina Kerisiano moni e faatino se galuega. (Mataio 24:14; 1 Timoteo 2:3, 4) Na poloaʻia e Iesu ona soo ina ia talaʻia le tala lelei o le Malo i atunuu uma, o se galuega e lē mafai ona faataunuuina pe a leai se faalapotopotoga e autasi i le lalolagi aoao. O se faataʻitaʻiga, e faigofie ona e fafagaina se tagata se toʻatasi, ae afai e toʻaafe pe miliona ni tagata, e manaʻomia la se faalapotopotoga ua maopoopo lelei ina ia fafagaina nei tagata e toʻatele. E galulue “soosootauʻau” Kerisiano moni i le faataunuuina o lo latou tofiga. (Sefanaia 3:9) Faamata e mafai ona faataunuuina se galuega i atunuu eseese, gagana, ma ituaiga, pe afai e lē o autasi ma filemu le faalapotopotoga e faatinoina? O le mea moni e lē mafai.

▪ Ua faamaopoopoina Kerisiano moni ina ia felagolagomaʻi ma fefaalaeiauaʻi. Afai e aʻe se tagata i le mauga na o ia, e pule ia i le mea e aʻe ai ma e lē popole foʻi e tau vaai se isi e faalēlelei lana aʻe. Ae a tupu se faalavelave, e leai se isi e fesoasoani atu. O lea la, e lē atamai le faaesea e se tagata o ia mai i isi. (Faataoto 18:1) E ao i Kerisiano ona felagolagomaʻi  ma fesoasoani le tasi i le isi ina ia mafai ai ona faataunuu le poloaʻiga a Iesu. (Mataio 28:19, 20) E maua i le faapotopotoga Kerisiano aʻoaʻoga ma faatonuga tāua mai i le Tusi Paia, ma faalaeiauina ai tagata uma ia tumau. O fea e maua ai faatonuga i ala o Ieova pe afai e leʻi faamaopoopoina ni sauniga e aʻoaʻoina ma tapuaʻi faatasi ai?—Eperu 10:24, 25.

▪ Ua faamaopoopoina Kerisiano moni e auauna ma le autasi i le Atua. Pe a ʻfaalogo mamoe a Iesu i lona leo,’ e avea ai i latou ma “lafu e tasi” i lalo o lana taʻitaʻiga. (Ioane 10:16) E lē taapeape solo i latou i lotu eseese, pe feeseeseaʻi foʻi ona o aʻoaʻoga faalelotu. Peitaʻi, ua latou ʻautasi i a latou upu.’ (1 Korinito 1:10) Ina ia autasi, e manaʻomia ona faamaopoopoina i se faalapotopotoga e tasi. E na o se ʻauuso e autasi e mauaina le faamanuiaga a le Atua.​—Salamo 133:1, 3. 

E faitau miliona i latou ua auai atu i le faalapotopotoga o loo faatinoina taʻiala o le Tusi Paia, ona o lo latou alofa i le Atua ma naunau i aʻoaʻoga moni a le Tusi Paia. Ua taumafai Molimau a Ieova e faia le finagalo o le Atua, i le avea o se faalapotopotoga e maopoopo ma autasi. Ua taunuu iā i latou le folafolaga a le Atua e faapea: “Ou te nofo faatasi ma i latou ma savavali faatasi ma i latou, e avea aʻu ma o latou Atua, e fai foʻi i latou ma oʻu tagata.” (2 Korinito 6:16) E mafai foʻi ona e maua lenei faamanuiaga, pe afai e te tapuaʻi iā Ieova le Atua faatasi ma lana faalapotopotoga.

[Faaopoopoga i lalo]

[Ata i le itulau 13]

Na fuafua lelei le mea e faatutū ai faleʻie o tagata Isaraelu

[Ata i le itulau 15]

E manaʻomia se faalapotopotoga e faamaopoopoina le galuega talaʻi ina ia soo ai le lalolagi

Talaʻiga i le Fale i le Fale

Fesoasoani Laveaʻi

Fonotaga

Fausia Maota mo Sauniga