Ua Faailoa Mai le Pule Faalilolilo o le Lalolagi

NA FETALAI Iesu i se tasi taimi e faapea: “O le a tuliesea le pule o lenei lalolagi.” Mulimuli ane, na ia toe faapea mai, ʻe leai se pule a le pule o lenei lalolagi iā te ia’ ma “ua faamasinoina le pule o lenei lalolagi.” (Ioane 12:31; 14:30; 16:11) O ai na faatatau i ai le fetalaiga a Iesu?

Pe a manatu i le fetalaiga a Iesu e uiga i “le pule o lenei lalolagi,” e manino e leʻi faasino atu i lona Tamā, o Ieova le Atua. O ai la “le pule o lenei lalolagi”? O le a faapefea ona “tuliesea” ma “faamasinoina” o ia?

Ua Faailoa Mai e “Le Pule o Lenei Lalolagi” o Ia Lava

E pei lava ona faamaualuga se taʻitaʻi o tagata solitulafono i le pule ua iā te ia, sa faapena foʻi le Tiapolo ina ua ia faaosoosoina Iesu, le Alo o le Atua. Ina ua uma ona faaali atu e Satani ia “malo uma o le lalolagi” iā Iesu, ona ia faapea atu lea: “Ou te avatua iā te oe nei malo uma ma o latou mamalu auā ua tuuina mai iā te aʻu, ma ou te foaʻiina atu ai i lē ou te loto i ai. Pe afai e tau lava ina e faapaʻū ma tapuaʻi mai iā te aʻu, ona fai lea mo oe o nei malo uma.”—Luka 4:5-7.

E faapefea ona tatou malamalama i lenā faaosoosoga, pe afai ua manatu nisi o le Tiapolo ua na o se uiga leaga? Pe na faaosoosoina Iesu i manatunatuga leaga po o ni lagona feteenaʻi ina ua uma lona papatisoga? Afai o lea, e faapefea ona faapea mai “e leai se agasala o iā te ia”? (1 Ioane 3:5) Na i lo le faapea e leai se aafiaga malosi a le Tiapolo i tagata, ae na faamautinoa e Iesu lenei tulaga i lona taʻua o le Tiapolo o “le pule o lenei lalolagi,” e ala i le faamatalaina o ia o se “fasioti tagata” ma “o sē e pepelo.”—Ioane 14:30; 8:44.

Ina ua mavae le silia ma le 60 tausaga talu ona faaosoosoina e le Tiapolo Iesu, na toe faamanatu atu e le aposetolo o Ioane i Kerisiano e uiga i aafiaga malolosi a le Tiapolo, e ala i le faapea atu, “o le lalolagi atoa o loo nofo toʻilalo i le pule a lē o loo leaga.” Na taʻua atili e Ioane, o le Tiapolo foʻi “o lē ua faasesēina le lalolagi atoa.” (1 Ioane 5:19; Faaaliga 12:9) E manino la o loo faamatalaina i le Tusi Paia se agaga e lē vaaia o “le pule o le lalolagi.” Ae o le ā se aafiaga tele o ana taaʻiga i tagata?

Ua Tuuina Atu e le Pule o le Lalolagi le Malosi i Ana Aumea

Na faailoa manino mai e le aposetolo o Paulo ia fili sili o Kerisiano, ina ua ia tusi atu iā i latou e faatatau i la latou tauiviga mo le faatuatua. Na ia taʻu saʻo mai: “Tatou te lē o tau ma tagata a o malo, ma pule, ma taʻitaʻi o le lalolagi o loo pulea lenei lalolagi pogisa, ma agaga leaga uma i mea o i le lagi.” (Efeso 6:12) Peitaʻi, e lē na o tagata o loo aafia ai i lenei tauiviga, auā tatou te “lē o tau ma tagata,” ae o “agaga leaga uma.”

E tusa ai ma faaliliuga lata mai o le Tusi Paia, o loo faasino atu “agaga leaga uma” i foafoaga agaga leaga e sili ona malolosi, ae e lē na o se uiga leaga. O loo taʻua foʻi i nisi faaliliuga o le Tusi Paia e faapea, “o se nofoaga o agaga leaga i le lagi” (Revised Standard Version), “o ʻautau o agaga leaga i le lagi” (The Jerusalem Bible), ma “o ni malosiaga leaga e sili atu ona malolosi i le lagi” (The New English Bible). O lea la, sa faaaogā e le Tiapolo lona malosi e ala i isi agelu fouvale, o ē na tuua “le mea na latou nonofo ai” i le lagi.—Iuta 6.

I le tusi faavaloaga o le Tusi Paia o Tanielu, o loo taʻu mai ai le auala o loo faia faamalosi ai e nei “pule o le lalolagi” a latou pulega i le lalolagi mai lava i aso anamua. Na tatalo le  perofeta o Tanielu mo le tolu vaiaso, ona o lona manatu mamafa i tagata Iutaia na toe foʻi ane i Ierusalema i le 537 T.L.M, mai lo latou nofo pologa i Papelonia. Na auina mai e le Atua se agelu ina ia faamalosiau i le perofeta, ma taʻu atu le māfuaaga o lona tuai mai. Na taʻua e le agelu: “Na tetee mai iā te aʻu le perenise o le malo o Peresia mo aso e lua sefulu tasi.”—Tanielu 10:2, 13.

O ai la “le perenise o Peresia”? E leʻi faasino atu le agelu iā Kuresa le tupu o Peresia, o lē na alofagia Tanielu ma ona tagata. E lē gata i lea, e faapefea i se tupu faaletagata ona tetee atu i se foafoaga agaga mo vaiaso e tolu, ae o lea sa mafai e se agelu e toʻatasi ona fasiotia se ʻautau malolosi e 185,000 i le pō e tasi? (Isaia 37:36) O lenei ʻperenise tetee o Peresia’ o se sui o le Tiapolo, o se temoni na tuu atu e pulea le Emepaea o Peresia. Mulimuli ane, na taʻua e le agelu a le Atua, o le a ia toe tau foʻi ma “le perenise o Peresia” ma le isi perenise o temoni, “le perenise o Eleni.”—Tanielu 10:20.

O le ā ua tatou iloa mai i inei? E manino mai e iai moni lava “pule o le lalolagi” e lē vaaia, o perenise temoni o ē o loo pulea faatasi le lalolagi i lalo o le taʻitaʻiga a lo latou taʻitaʻi, o Satani le Tiapolo. Ae o le ā le faanaunauga o loo iā i latou e oo mai lava i le taimi nei?

Ua Faailoa Mai e le Pule o le Lalolagi Ona Uiga Moni

I le tusi mulimuli o le Tusi Paia o le Faaaliga, na faamatalaina ai e le aposetolo o Ioane le manumalo o Iesu po o Mikaele le agelu sili, i le Tiapolo ma ana temoni, faapea ma iʻuga leaga na oo iai ona o le tuliesea o i latou mai i le lagi. E tatou te faitau i ai e faapea: “Oi talofa i le laueleele . . . auā ua alu ifo iā te outou le Tiapolo ua lotoa tele, auā ua na iloa ua puupuu lona taimi.”—Faaaliga 12:9, 12.

Ua faapefea ona faaalia le lotoa tele o le Tiapolo? E pei lava ona ola tagata solitulafono i le tulafono e faapea ʻia pule i ai, a leai, ia matuā faaleagaina,’ e faapena foʻi ona maumauaʻi le Tiapolo ma ana temoni ina ia matuā faaleaga le laueleele ma ē o nonofo ai. I le iloaina ua puupuu lona taimi, ua faaaogāina ai e le Tiapolo faiga faapisinisi, o se tasi o mea e sili ona tāua i olaga o tagata lea e i lalo o lana pulega. O le faia faapea, ua uunaʻia ai le agaga faatautavā i le faatauina o oloa eseese lea e iʻu ai i le faaitiitia o punaʻoa faalenatura, faaleagaina le siʻosiʻomaga i le lalolagi atoa, lea ua lamatia ai ola o tagata.—Faaaliga 11:18; 18:11-17.

Talu mai lava le amataga o le talafaasolopito o tagata, na faaalia ai e ala i faiga faapolotiki ma lotu le manaʻo tele o le Tiapolo i le mana. I le tusi o Faaaliga, o loo faaāta mai ai malosiaga o faiga faapolotiki, i se manu feʻai lea ua tuuina i ai e Satani le “pule tele.” O loo faaalia ai foʻi le matagā o le auaufaatasi o lotu ma faiga faaupufai, e ala lea i le taʻua o le la faiā o le mulilua faaleagaga. (Faaaliga 13:2; 17:1, 2) Seʻi mafaufau i pulega sauā, tulaga faapologaina, taua, ma feeseeseaʻiga i va o ituaiga o tagata mo le tele o senituri, lea ua maʻimau ai le miliona o soifua. Pe e mafai la ona taʻutino mai se tasi e faapea o tulaga leaga ma mataʻutia lea ua faaleagaina ai le talafaasolopito o tagata, ua na o ni a latou gaoioiga masani? Po o iʻuga na o le faasesēina e agaga leaga e lē vaaia?

I le Tusi Paia, ua faailoa mai ai ma le mautinoa ma faalialia i lumamea lē o loo faasesēina taʻitaʻi faaletagata ma pule o malo. E tusa lava po o latou faia ma le iloa pe leai foʻi, ae ua faaatagia mai e tagata ia uiga ma amioga a lo latou pule, ma lana tulafono ʻia pule i ai, a leai, ia matuā faaleagaina.’ Ae o le ā le umi o le a nofo pologa ai le fanau a tagata i le pulega a le Tiapolo?

O Taumafaiga Mulimuli a le Tiapolo

O galuega na faia e Keriso a o iai i le lalolagi i le uluaʻi senituri, na faaleo atu ai le iʻuga o le Tiapolo ma ana temoni. Ina ua faamatalaina e soo o Iesu le auala na latou tuliesea ai temoni e lē vaaia, ona faapea atu lea o ia iā i latou:  “Ua ou iloa Satani ua paʻū ifo mai i le lagi e pei o le uila.” (Luka 10:18) I le taʻua o na upu, na olioli ai Iesu ona o le a manumalo i le pule o le lalolagi i le lumanaʻi, pe a toe foʻi o ia i le lagi ma avea ma Mikaele le agelu sili. (Faaaliga 12:7-9) O le suʻesuʻeina ma le māeʻaeʻa o valoaga o le Tusi Paia, e iloa ai na faataunuuina lenei manumalo i le lagi i le 1914, po o le mavae laʻitiiti o lenā tausaga. *

Talu mai lava lenā vaitaimi, ua iloa e le Tiapolo e lē o toe umi ae faaumatia o ia. E ui lava ʻo loo nofo toʻilalo le lalolagi atoa i lana pule,’ ae o loo iai pea i aso nei le faitau miliona o tagata e lē o faasesēina i ana taumafaiga ina ia pulea i latou. Ua faapupula e le Tusi Paia o latou mata, ina ia iloa ai e moni Satani ma ana togafiti. (2 Korinito 2:11) E latou te maua le faamoemoe mai i upu a Paulo i uso Kerisiano e faapea: “Ua lē o toe umi ona tuʻimomomoina lea o Satani i lalo o o outou vae, e le Atua o lē e na te aumaia le filemu.” *—Roma 16:20.

E lē o toe umi ona faaumatia lea o le Tiapolo! I le pulega alofa a Keriso, o le a suia ai e tagata amiotonu le lalolagi, o le mea faafaatusa lea e tū ai vae o le Atua, i se parataiso. O le a lē toe iai e faavavau faiga sauā, feitagaʻi ma le matapeʻapeʻa. Ua faapea mai le Tusi Paia: “E lē toe manatua mea sa iai muamua.” (Isaia 65:17) Maʻeu se mapusaga o le a iai mo ē uma o le a saʻoloto mai le pule faalilolilo o lenei lalolagi ma lana pulega!

[Faaopoopoga i lalo]

[Ata i le itulau 9]

I le pulega alofa a Keriso, o le a suia ai e tagata amiotonu le lalolagi i se parataiso