Pe na Pelogia Oe e se Isi?

E LEAI se mea e sili atu ona tigā, i lo o le pelogia o oe e se tasi e te maufaatuatuaina. Atonu e te lagonaina le māsiasi, ita, po o le ʻolegiaina. O tala pepelo e faaleagaina ai faigāuō ma faaipoipoga; e faasesēina ai foʻi tagata ma leiloa ai le faitau miliona o a latou tupe.

Seʻi mafaufau la i ni ou lagona pe a e iloa ifo na pelogia oe e uiga i le Atua. Pe afai e te mapolotu, atonu e telē se aafiaga e oo iā te oe, e pei o lagona o nei tagata lotu:

● “Na ou lagona ua ʻolegiaina aʻu e laʻu lotu.”—DEANNE.

● “Na ou ita. Na ou lagona e peiseaʻī sa faavaleaina aʻu—o lea la, ua lē aogā oʻu faanaunauga ma faamoemoega sa iai.”—LUIS.

Atonu e te lē talitonu e mafai ona pelogia oe e uiga i le Atua. O mea ua e iloaina, atonu na e faalogo ai i sē e te maufaatuatuaina ma e na te lē faia lava ma le loto iai se mea e te tigā ai, e pei o ou mātua, o se faifeʻau, po o se uō mamae. Atonu e iai se aʻoaʻoga na e talitonu ai lava i lou olaga atoa. Ae pe e te lē ioe e mafai lava ona sesē se manatu taatele? Na iloaina lenei mea moni e Franklin D. Roosevelt, o se tasi o Peresitene o le Iunaite Setete sa iai, auā na ia taʻua: “E lē mafai ona avea tala pepelo e faia pea lava pea, ma tala moni.”

E faapefea ona e iloa pe na pelogia oe? Na taʻua e Iesu i lana tatalo i le Atua: “O lau afioga o le upu moni lea.” (Ioane 17:17) Ioe, o loo iai i le Afioga a le Atua, le Tusi Paia, faamatalaga e tatou te manaʻomia ina ia iloa ai le eseesega o aʻoaʻoga moni ma aʻoaʻoga pepelo.

Aiseā la e lē faaaogā ai le Tusi Paia e faaalialia ai aʻoaʻoga pepelo e lima ua taatele e uiga i le Atua? O le a e iloa ai, e mafai e aʻoaʻoga moni ona suia lou olaga mo le lelei.