E Lē Toe Iai ni Mala!

E FAAPEFEA ona e tali i se tasi e fai atu iā te oe, “E lē o toe umi ona leai lea o ni mala?” Atonu e te tali atu, “O lenā mea, ua na o se moomooga faivavale. O se mea masani le iai o mala i o tatou olaga.” Pe atonu foʻi e te mafaufau, ʻAiloga e saʻo lenā tala.’

E ui lava e foliga mai o le a iai pea mala faalenatura, ae o loo iai le faavae mautinoa o le a suia le tulaga o mea. Peitaʻi, o le a lē oo mai nei suiga ona o taumafaiga a tagata. E lē mafai ona malamalama atoatoa tagata pe faapefea, ma pe aiseā e tutupu ai mea i le natura, ma e lē mafai foʻi ona latou pulea pe suia na mea. Na tusi Solomona le tupu o Isaraelu anamua, o lē na lauiloa i lona atamai ma le mataalia e faapea: “E lē mafai e tagata ona iloa galuega ua faia i lalo o le lā; e tusa lava pe galulue mamafa tagata ina ia suʻesuʻe i ai, ae e latou te lē iloaina. E tusa foʻi pe latou te fai mai ua lava lo latou atamai e iloa ai ia mea, e lē mafai lava ona latou iloa.”—Failauga 8:17.

O ai la e mafai ona pulea mala faalenatura, pe afai e lē mafai e tagata? Ua faailoa mai e le Tusi Paia e mafai e Lē na foafoaina mea uma ona faia na suiga. O ia o Lē na faatulagaina le sootaga o meaola ma le siʻosiʻomaga, e pei o le faataamilosaga o le vai. (Failauga 1:7) E matuā eseese tagata ma le Atua ona e lē muta mai lona mana. Ina ia faamaonia lenā mea moni, na tusi le perofeta o Ieremia: “Ieova e, le Alii Pule Silisili Ese! O oe lava na e faia le lagi ma le lalolagi i lou mana tele ma lou aao faaloaloa. E lē faigatā iā te oe lenei mea.” (Ieremia 32:17) Ona o le Atua na foafoaina le lalolagi ma mea uma o loo iai, e na te silafia lelei foʻi le auala e pulea ai mea ina ia mafai ona ola saogalemu ma fiafia tagata.—Salamo 37:11; 115:16.

O le a faapefea la ona aumaia e le Atua suiga o loo manaʻomia? Atonu o loo e manatua le mataupu lona lua o lenei faasologa o mataupu, lea na taʻua ai le tele o mala mataʻutia o ni “faailoga” e iloa ai “le taufaaiʻuiʻuga o le faiga o mea a le lalolagi.” Na fetalai Iesu: “Pe a outou vāai ua tutupu nei mea, ia outou iloa ua latalata mai le malo o le Atua.” (Mataio 24:3; Luka 21:31) O le a aumaia e le Malo o le Atua i le lagi suiga tetele i le lalolagi, e oo lava i le pulea o mea o le natura. E ui lava o loo iā Ieova le Atua le mana e faia ai nei mea, ae ua ia tuuina atu lenei matafaioi i lona Alo. Ua faapea mai le perofeta o Tanielu e uiga i lenei Alo: “Ua tuuina atu iā te ia le pule, o le mamalu ma le malo, ina ia auauna  iā te ia o tagata ma nuu ma gagana uma.”—Tanielu 7:14.

Ua tuuina atu i le Alo o le Atua, o Iesu Keriso, le mana talafeagai e aumaia ai suiga uma e manaʻomia, ina ia avea le lalolagi ma nofoaga matagofie. I le lua afe tausaga ua mavae a o iai Iesu i le lalolagi, na ia faaalia ai i se fua itiiti lona tomai e pulea ai mea o le natura. I se tasi o mea na tupu, a o iai o ia ma ona soo i se vaa i le sami i Kalilaia, “ona agi malosi mai lea o le matagi ma ua fafati mai pea galu i le vaa, ma toetoe lava a goto ai.” Na atuatuvale ona soo, ma ona o lo latou fefefe ina neʻi feoti, na latou sulu atu ai iā Iesu. O le ā na faia e Iesu? Sa ia “vavao i le matagi ma fetalai atu i le sami: ʻIa fifilemu, ma ia malū!’ Ona toʻa ai lea o le matagi ma ua malū lava ai.” Na taufaiofo ona soo ma tuufesili: “O ai ea lenei tagata ua usiusitaʻi i ai le matagi ma le sami iā te ia?”—Mareko 4:37-41.

Talu mai lenā taimi, na afio atu Iesu i le lagi ma ua tuuina atu iā te ia le tele o le mana ma le pule. I le avea ma Tupu o le Malo o le Atua, ua iā te ia le matafaioi atoa ma le tomai e faia ai suiga uma e manaʻomia, ina ia maua ai e tagata se olaga filemu ma saogalemu i le lalolagi.

Peitaʻi, e pei ona tatou mātauina, o le tele o faafitauli ma mala e māfua pe e matuā faateteleina, ona o gaoioiga manatu faapito ma le matapeʻapeʻa o tagata. O le ā o le a faia e le Malo i ē e maumauaʻi ma lē mananaʻo e suia o latou ala? O loo taʻua i le Tusi Paia le Alii o Iesu o loo afio “mai le lagi faatasi ma ana agelu malolosi i le afi mumū, a o ia faaoo mai le tauimasui i ē e lē iloa le Atua, ma ē e lē usiusitaʻi i le tala lelei a lo tatou Alii o Iesu.” Ioe, o le a ia “faafanoina . . . i latou o loo faaleagaina le laueleele.”—2 Tesalonia 1:7, 8; Faaaliga 11:18.

Mulimuli ane, o le a pulea atoatoa e Iesu Keriso, o le “Tupu o tupu,” malosiaga faalenatura o le lalolagi. (Faaaliga 19:16) O le a ia faamautinoa e lē toe mafatia i mala tagata o loo i lalo o le pulega a lona Malo. O le a ia faaaogā lona mana e faatonutonu ai le tulaga o le tau ma lona suiga, auā le lelei o tagata. O le iʻuga, o le a faataunuu ai le folafolaga na faia e Ieova le Atua i ona tagata i aso ua mavae: “Ona ou faatotō ifo lea o le timu iā te outou i le taimi e tatau ai, e fua mai ai le laueleele, ma e fua mai foʻi laau o le fanua.” (Levitiko 26:4) O le a fausia e tagata o latou fale ae o le a lē popole ina neʻi faaleagaina i se mala: “O le a latou fausia fale ma nonofo ai, e latou te totō foʻi togāvine ma latou aai i ona fua.”—Isaia 65:21.

O Le ā e Tatau Ona E Faia?

E mautinoa o le a pei oe o le isi toʻatele, o ē e mananaʻo e ola i se olaga e lē toe mafatia i mala. O le ā la e tatau ona e faia ina ia e iai i lenā taimi? Talu ai o le fuafuaga a le Atua e lē mafai ona ola i le lalolagi e aunoa ma ni mala, “ē e lē iloa le Atua,” ma “ē e lē usiusitaʻi i le tala lelei,” e manino mai la e tatau nei loa ona aʻoaʻoina e se tasi mea e uiga i le Atua, ma lagolago lana fuafuaga mo le pulega o le lalolagi. E finagalo le Atua ina ia tatou iloa o ia, ma usiusitaʻi i le tala lelei o le Malo lea ua ia faatūina e ala i lona Alo.

O le auala sili e faia ai faapea, o le suʻesuʻe māeʻaeʻa lea i le Tusi Paia. O loo iai faatonuga e mafai ai ona e agavaa e ola i se siʻosiʻomaga e saogalemu, lea o le a iai i le pulega o le Malo. Aiseā e te lē talanoa ai i Molimau a Ieova e fesoasoani iā te oe ina ia iloa aʻoaʻoga a le Tusi Paia? E mafai ona e fesili atu iā i latou mo lenā fuafuaga. E pau le mea mautinoa, pe afai e te faia taumafaiga ina ia iloa le Atua ma usiusitaʻi i le tala lelei, ona taunuu lea o upu o le Faataoto 1:33 iā te oe: “A o lē e faalogo mai iā te aʻu, o le a saogalemu ma lē fefe i so o se puapuaga [mala].”