Aʻoaʻoga a le Tusi Paia

O le ā le Māfuaaga o le Iai o se Faalapotopotoga a le Atua?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā na faamaopoopo ai e le Atua tagata Isaraelu?

Na faamaopoopo e le Atua le fanau a le augātamā o Aperaamo, ma avea ma nuu ma tuu atu iai ni tulafono. Na ia faaigoaina le nuu, o Isaraelu, ma avea ma ē e tausia le tapuaʻiga mamā ma lana Afioga, o Tusitusiga Paia. (Salamo 147:19, 20) O na mea ua mafai ai e nuu uma ona maua aogā.—Faitau le Kenese 22:18.

Na filifilia e le Atua le nuu o Isaraelu ina ia avea ma ana molimau. Na latou maua aogā ona o le usiusitaʻi i tulafono a le Atua. (Teuteronome 4:6) O le a tatou iloa le tele o mea e uiga i le Atua moni, e ala i le suʻesuʻeina o le talafaasolopito o Isaraelu.—Faitau le Isaia 43:10, 12.

2. Aiseā e faapotopoto ai Kerisiano moni?

I lenā taimi, na lē maua e le nuu o Isaraelu le finagalo malie o le Atua, ma na filifilia ai e Ieova le faapotopotoga Kerisiano e suitulaga i lenā nuu. (Mataio 21:43; 23:37, 38) I le taimi muamua, na avea Isaraelu ma molimau a le Atua. I le taimi lenei, ua auauna Kerisiano moni e avea ma molimau a Ieova.—Faitau le Galuega 15:14, 17.

Na faamaopoopo e Iesu ona soo ina ia molimau atu i nuu uma, e faatatau iā Ieova ma ia faia nuu uma ma soo. (Mataio 10:7, 11; 24:14; 28:19, 20) Ua oo atu lenei galuega i lona tumutumuga. Ua autasia e Ieova mo le taimi muamua, le faitau miliona o tagata mai i nuu uma mo le tapuaʻiga moni. (Faaaliga 7:9, 10) Ua faapotopotoina foʻi Kerisiano moni ina ia mafai ona faalaeiau, ma fesoasoani le tasi i le isi. I le lalolagi aoao, o loo olioli ai i a latou sauniga lea e tutusa lelei polokalame o loo maua ai, e faatatau i taʻiala faale-Tusi Paia.—Faitau le Eperu 10:24, 25.

 3. Na faapefea ona amata mai Molimau a Ieova i aso nei?

Na amata le faalapotopotoga o Molimau a Ieova i aso nei, mai i vaitausaga o le 1870, ina ua iloa e se vaega toʻaitiiti ni upu moni o le Tusi Paia ua leva ona lē toe faaaogāina. Na latou iloa sa faamaopoopo e Iesu le faapotopotoga Kerisiano ina ia talaʻi atu, ona latou talaʻi atu loa lea o le Malo i le lalolagi atoa. Na talia e lenei vaega le igoa Molimau a Ieova i le tausaga 1931.—Faitau le Galuega 1:8; 2:1, 4; 5:42.

4. Ua faapefea ona faamaopoopo Molimau a Ieova i aso nei?

I le uluaʻi senituri, na maua e faapotopotoga Kerisiano i le tele o atunuu ni aogā mai i se vaega pule, o ē na iloa o Iesu o le Ulu o le faapotopotoga. (Galuega 16:4, 5) I se tulaga tutusa i aso nei, e manatu Molimau a Ieova o Iesu o lo latou Taʻitaʻi. (Mataio 23:9, 10) O loo latou maua foʻi aogā mai i le Vaega Pule, lea o loo iai toeaina agavaa e saunia mai faalaeiauga faale-Tusi Paia, ma taʻiala mo le silia ma le 100,000 faapotopotoga. I faapotopotoga taʻitasi, o loo galulue ai ni tane agavaa e avea o ni toeaina, po o ni ovasia. O loo vaavaaia e nei tane alolofa le lafu a le Atua.—Faitau le 1 Peteru 5:2, 3.

Ua faapotopotoina Molimau a Ieova mo le talaʻia o le tala lelei ma le faia o isi ma soo. Ina ia fesoasoani i so o se tagata, ua latou faaliliuina, lomia, ma tufatufaina atu ni lomiga i le silia ma le 500 gagana, e faia ai suʻesuʻega faale-Tusi Paia. E pei o le ʻauaposetolo, e latou te talaʻi atu mai i lea fale i lea fale. (Galuega 20:20) E latou te ofo atu e suʻesuʻe le Tusi Paia ma tagata taʻitoʻatasi e mananaʻo moni e iloa le upu moni. O i latou o se faalapotopotoga o tagata fiafia, auā e taulaʻi atu tagata o Ieova i le faafiafiaina o le Atua, ma le fesoasoani i isi.—Faitau le Salamo 33:12; Galuega 20:35.

Mo nisi manatu, tagaʻi i le mataupu e 19 o lenei tusi, O Ā Aʻoaʻoga Moni A Le Tusi Paia?, ua lomia e Molimau a Ieova.