“O le a E . . . Matuā Punou Mai i O‘u Luga”
Ia Mafuta Atu i le Atua
“O le a E . . . Matuā Punou Mai i Oʻu Luga”
O LE lotomaulalo o se uiga manaia. E masani lava ona tatou tosina atu iā i latou e faaalia le lotomaulalo. Ae e faanoanoa, ona e seāseā ona toe maua lenā uiga i le taimi nei, aemaise lava iā i latou o loo iai le malosi e pule ai i isi. Ae ā Ieova le Atua, o Lē e aupito i sili ona malosi i le vateatea? Pe e lotomaulalo o ia? Seʻi tatou tilofaʻia upu a le perofeta o Ieremia o loo maua i le Auega 3:20, 21.—Faitau.
Na tusia e Ieremia le tusi o Auega a o iai Isaraelu i taimi matuā faigatā o le talafaasolopito. Na faatoʻā ia molimauina se mea na matuā oo ai iā te ia lagona tigā, o le faaumatiaina lea o Ierusalema o le aai e pele iā te ia, e ʻautau a Papelonia. Na iloa e le perofeta loto mafatia, le talafeagai o le faasalaga na tuuina atu e le Atua iā Isaraelu ona o a latou agasala. Ae pe na tuua Ieremia e aunoa ma se faamoemoe? Pe na ia manatu ua faaesea e Ieova o ia lava ma taumamao ese e lē fia silasila mai iā i latou ua faaalia le salamō, ma faamalosia i latou mai i mea e vaivai ai? Seʻi tatou faalogo a o talanoa atu Ieremia e fai ma sui o ona tagata.
E ui ina faanoanoa le toʻatele o tagata, ae na iai pea le faamoemoe o Ieremia. Na ia alaga atu iā Ieova e faapea: “O le a e manatuaina lava, ma e matuā punou mai ai i oʻu luga.” (Fuaiupu e 20) E leʻi masalosalo Ieremia. Na ia iloa e lē faagaloina e Ieova o ia, po o Ona tagata foʻi e faaalia le salamō. O le ā o le a faia e le Atua, o lē e ona le malosi uma lava?—Faaaliga 15:3.
Na mautinoa e Ieremia o le a “matuā punou” ifo Ieova iā i latou e faaalia le salamō moni. Ua faapea mai le isi faaliliuga: “Ia e manatua mai, ma ia e faanoʻunoʻu mai iā te aʻu.” E fesoasoani na upu iā i tatou e malamalama ai i le agalelei ma le faapelepele o Ieova, o “Lē e Silisili Ese i le lalolagi uma,” ae ua ia punou ifo ma fesoasoani i ona tagata tapuaʻi, e tusa ai ma tulaga faigatā o loo latou fesagaʻia, ma toe maua ai Lona finagalo malie. (Salamo 83:18) E ala i lenei faamoemoe, ua maua e Ieremia le faamāfanafanaga moni e tusa ai ma mafatiaga i lona loto. Ua maumauaʻi nei le perofeta faamaoni ina ia faatalitali ma le onosaʻi, i le taimi o le a laveaʻi ai e Ieova Ona tagata salamō moni.—Fuaiupu e 21.
O upu e pei ona faamauina e Ieremia, ua aʻoaʻo mai ai iā i tatou ni manatu se lua e uiga iā Ieova. Muamua, e lotomaulalo o ia. (Salamo 18:35) E ui ina “silisili lona mana,” ae ua lotomalie Ieova e faamaulalo o ia lava, ina ia feutagaʻi ma fesoasoani iā i tatou pe a oo mai mafatiaga. (Iopu 37:23; Salamo 113:5-7) Pe e lē faamāfanafanaina ea i tatou i lenā manatu? Lua, e alofa mutimutivale Ieova, ma ua “nofosauni e faamagalo” i ē e agasala ua faaalia le salamō moni, ma toe talia i latou ina ia toe maua lona finagalo malie. (Salamo 86:5) O na uiga e lua, o le lotomaulalo ma le alofa mutimutivale, e galulue faatasi.
Maʻeu lo tatou lotofaafetai ona e lē pei Ieova o pulega faaletagata, o ē lotomaaa ma e lē manatu mamafa foʻi i isi ona o le faamaualuluga! Pe e lē uunaʻia ea oe e fia iloa atili e faatatau iā Ieova le Atua lotomaulalo, o lē ua lotomalie e “punou ifo,” e fesoasoani i ona tagata tapuaʻi ina ia maua le faamoemoe i taimi o mafatiaga?
FAITAUGA TUSI PAIA MO IUNI:
[Faamatalaga faaopoopo i le itulau 14]
Ua lotomalie Ieova e faamaulalo o ia lava, ina ia feutagaʻi ma fesoasoani iā i tatou pe a oo mai mafatiaga
