Ua Fesili Mai le ʻAufaitau . . .

Pe e Afāina i le Atua pe a Ou Faaaogāina le Tapaa?

▪ E ono fesili se tagata faamaoni i lenā fesili, auā e leai se tulafono i le Tusi Paia o taʻua ai le tapaa. Po o lona uiga la o lenā manatu e faigatā ona tatou iloa le finagalo o le Atua e uiga i lenei mataupu? E mautinoa e leai.

O loo taʻua i le Tusi Paia, “o Tusitusiga Paia uma e mai le agaga o le Atua.” (2 Timoteo 3:16) O loo i le Tusi Paia mataupu silisili manino e iloa ai e finagalo le Atua ia tatou manatu mamafa i lo tatou soifua mālōlōina. Muamua, seʻi o tatou tilofaʻia mea ua iloa e tagata suʻesuʻe, e uiga i aafiaga o le tapaa i le soifua mālōlōina. Ona iloilo lea pe e faapefea ona fesootaʻi atu mataupu silisili o le Tusi Paia i na manatu.

E te oti i le tapaa, ae e mafai ona ʻalofia. I Amerika, e 1 mai i le toʻa 5 o tagata e maliliu, e māfua ona o le tapaa. I lenā atunuu, ua taʻua i se lipoti mai i le National Institute on Drug Abuse, e sili atu ona toʻatele tagata e maliliu i tausaga taʻitasi ona o le tapaa, nai lo o le aofaʻiga tuufaatasi o tagata e maliliu ona o le “ava malosi, le faaaogāina o vailaau ma fualaau faasāina, fasioti tagata ma le AIDS.”

O aafiaga i isi. E aafia tagata uma i le tapaa, e oo lava i sina asu e mānavaina. Ua faatupulaʻia i le 30 pasene le aofaʻi o tagata ua aafia i le kanesa o le māmā ma le maʻi fatu, ona o le mānavaina o le asu mai i tapaa a isi tagata (secondhand smoke). I tausaga talu ai nei, na mātaulia ai e fomaʻi se isi aafiaga e māfua ona o vailaau o loo i le tapaa, ia e umi ona pipii i ofu, kapeta, ma isi mea, ae ua leva ona teʻa le asu (third-hand smoke). O na vailaau oona e sili ona faaleagaina ai le soifua mālōlōina o fanau, ma o le a tuai ai lo latou tomai e aʻoaʻo ai mea.

Pulea e le tapaa. O lē e faaaogāina le tapaa, ua fai o ia ma pologa i se masaniga e lē lelei. E talitonu tagata suʻesuʻe, o se tasi o mea e faigatā ona taofia ai le faaaogāina o le tapaa, ona o le vailaau autū o le nikotini o loo iai.

E faapefea ona fesootaʻi manatu e pei ona taʻua ma mataupu silisili o le Tusi Paia? Mātau manatu o mulimuli mai:

E finagalo le Atua ia faatāua le ola. I le Tulafono na tuu atu e le Atua i le nuu o Isaraelu, na faaalia ai, e tatau i ē e mananaʻo e faafiafia o ia ona faatāua le ola. (Teuteronome 5:17) Na tatau i tagata Isaraelu ona fausia puipui maualalalo, e siʻo ai taualuga o o latou fale. Aiseā? O taualuga o fale e mafolafola ma sa faaaogā e nonofo ai. O nei puipui na puipuia ai le aiga ma isi tagata ina neʻi paʻū se tasi ma faamanuʻalia ai, pe maliu foʻi. (Teuteronome 22:8) E lē gata i lea, sa tatau i tagata Isaraelu ona faamautinoa e lē faamanuʻalia isi ona o a latou manu. (Esoto 21:28, 29) O le tagata e faaaogāina le tapaa, ua ia solia mataupu silisili ua faavae mai ai na tulafono. E lē gata i lea, ua ia faaleagaina ma le loto i ai lona lava soifua mālōlōina, faapea ma isi.

Alofa i le Atua ma tuaoi. Na fetalai Iesu e tatau i ona soo ona usitaʻia tulafono silisili e lua. E tatau ona alolofa i le Atua ma o latou lotoatoa, ola atoa, mafaufau atoa, malosi atoa, ma ia alolofa foʻi i tuaoi e pei o i latou lava. (Mareko 12:28-31) Talu ai o le ola o se meaalofa mai i le Atua, o le tagata la e faaaogāina le tapaa, ua faaalia le matuā leai o se faaaloalo i lenā meaalofa ma e lē alofa i le Atua. (Galuega 17:26-28) O le masaniga a lenā tagata, e faapogaia ai aafiaga mataʻutia i isi, ma e pepelo o ia pe a faapea mai e alofa i ona tuaoi.

ʻAlofia masaniga lē mamā. Ua faatonuina e le Tusi Paia Kerisiano ia faamamā mai i “mea uma e faaleagaina ai le tino ma le agaga.” (2 Korinito 7:1) E mautinoa, o le faaaogāina o le tapaa e faaleagaina ai se tagata. Ua fesagaʻi i latou o loo mananaʻo e tuu le faaaogāina o le tapaa ina ia faafiafia ai le Atua, ma se luʻi faigatā. Ae e ala i le fesoasoani a le Atua, o le a mafai ai ona tuusaʻoloto i latou mai i lenei masaniga leaga.