E te Silafia?

O ā ituaiga o peni ma vaitusi sa faaaogā i taimi o le Tusi Paia?

▪ I le faaiʻuga o le tusi lona tolu a le aposetolo o Ioane o loo i le Tusi Paia, na ia taʻua ai e faapea: “E tele ni mea ou te fia tusi atu ai iā te oe, ae ou te lē manaʻo e tusi atu i se tusi.” O se isi faaliliuga o upu Eleni anamua sa faaaogā e Ioane, ua iloa ai e leʻi manaʻo o ia e tusi atu e faaaogā ai le “vaitusi ma le fulu tusi.”—3 Ioane 13, O le Tusi Paia Samoa-Lomiga 1969.

O peni a le ʻautusiupu e faia mai i le laau o le ū. E tipi faasipa le pito o le fasi laau o le ū ina ia maʻai le itu e tasi, ona sesele lea o le vaega maʻai lenā. E faaaogā e le tusiupu se maa mai i le lava, e faamaʻai ai le mata o le peni. O lenā peni e tai pei lava o peni utu o loo iai i aso nei.

Ina ia maua le vaitusi, e palu faatasi le lama po o se pauta uliuli ma se apulupulu, ina ia maua ai se mea e tai pei o se kelū. O nei mea e faatau atu pe a mamago, ona sui lea i le vai ina ia maua ai le vaitusi. E lē sosolo le vaitusi pe a tusi se mea i le pepa e fai mai i le paʻu laau. O se isi meafaigaluega autū a se tusiupu o se omomi susū, lea e tapē ese ai se mea ua sesē. O lenei faamatalaga, ua tatou iloa ai mea sa ono mafaufau i ai tusitala o le Tusi Paia, pe a latou taʻua igoa o le a toe soloiesea, pe e tapē ese mai i le tusi o le ola a le Atua.—Esoto 32:32, 33; Faaaliga 3:5.

O ā ituaiga o faleʻie sa faia e le aposetolo o Paulo?

▪ O loo taʻua Paulo i le Galuega 18:3 o sē e fai faleʻie. I taimi o le Tusi Paia, e lalaga e le ʻau fai faleʻie ia fulufulu o kamela po o ʻoti ina ia maua ai ni ie, ona suʻi lea o na ʻie ina ia faia ai faleʻie mo tagata femalagaaʻi. Peitaʻi, i taimi o Paulo, o le tele o faleʻie sa faia mai i paʻu o manu, po o ʻie lino ia sa gaosia i le nuu o Paulo, o Taso. Atonu na faaaogā e Paulo na ʻie, ma a o galulue ma Akula, e foliga mai sa ia suʻiina ni ʻie mo faapaologa o fale o aiga.

Atonu na aʻoaʻoina e Paulo lenei matātā a o talavou. O paʻu laau na maua mai i Aikupito ua faamaonia ai, i taimi o le pulega a Roma, sa aʻoaʻoina ai e talavou i Aikupito ni matātā i le 13 o o latou tausaga. O lea, pe afai o le tausaga lenā o Paulo na ia aʻoaʻoina ai lea matātā, e oo ane la i le 15 po o le 16 o ona tausaga, ua matuā tomai lava i le tipiina ma le suʻiina o ʻie e faaaogā ai meafaigaluega eseese, e faailoga ma faapu ai le paʻu manu. Ua taʻua i le tusi The Social Context of Paul’s Ministry e faapea: “Atonu na maua e Paulo ana lava meafaigaluega ina ua uma ana aʻoaʻoga. O le mauaina o naifi ma meafaigaluega saʻo, sa faafaigofie ai ona faia faleʻie i so o se nofoaga lava,” ma o se galuega sa faalagolago ai Paulo mo le tausiga o ia, a o iai i le galuega faamisionare.

[Ata i le itulau 15]

Peni e faia i le ū mai i Aikupito, e tusa o le uluaʻi senituri T.A.

[Ē Ana le Ata]

© Image Asset Management/age fotostock

[Ata i le itulau 15]

O mea suʻisuʻi mai i le senituri muamua po o le lona lua T.A.

[Ē Ana le Ata]

Erich Lessing/Art Resource, NY