Aʻoaʻoga a le Tusi Paia

Po o le a Tofia e le Atua se Malo se Tasi e Pulea le Lalolagi?

O loo talanoaina i lenei mataupu fesili atonu e te fia malamalama i ai, ma mau o le Tusi Paia e maua ai tali. E fiafia Molimau a Ieova e tou te talanoa i tali o na fesili.

1. Aiseā e manaʻomia ai se malo se tasi e pulea le lalolagi?

Ua tumu le lalolagi i aso nei i faafitauli. O nisi atunuu e pologa ma matitiva tagata. A o isi atunuu, e maua ai e tagata le tele o mea nai lo o mea e manaʻomia. O lea la, e manaʻomia se malo se tasi e pulea le lalolagi, ina ia tutusa ai tulaga o tagata uma.—Faitau le Failauga 4:1; 8:9.

2. O ai e maufaatuatuaina e pulea le lalolagi?

E faigatā ona talia se pulega faaletagata, ona e leai se tasi e agavaa e faatino lea matafaioi i se auala lelei, ma sao mai i faiga piʻopiʻo pe a oo ina umia le tulaga pule. E leai se isi e manaʻo i se pule sauā e pulea le lalolagi.—Faitau le Faataoto 29:2; Ieremia 10:23.

Ua tofia e Ieova lona Alo o Iesu e pulea tagata e faavavau. (Luka 1:32, 33) E malamalama lelei Iesu i le olaga i le lalolagi auā na soifua aʻe ai. Na ia faamālōlō foʻi ē mamaʻi, aʻoaʻo ē agamalu, ma faaalu faatasi lona taimi ma tamaiti. (Mareko 1:40-42; 6:34; 10:13-16) O lea la, ua talafeagai lelei le avea o Iesu ma Pule.—Faitau le Ioane 1:14.

 3. Pe e mafai ona pulea e se malo se tasi le lalolagi?

Na tofia e Ieova lona Alo o Iesu e pulea le lalolagi mai i le lagi. (Tanielu 7:13, 14) E pei lava ona lē tau manaʻomia ona iai se taʻitaʻi i aai uma o loo ia pulea, e faapena foʻi ona lē manaʻomia ona afio mai Iesu i le lalolagi e pule ai.—Faitau le Mataio 8:5-9, 13.

Po o le a talia e tagata uma Iesu o le Pule? E leai. E na o tagata e naunau i mea lelei e talia o ia. O le a tafiesea e Ieova mai le lalolagi i latou uma e teena le Pule alofa ma le amiotonu, a lē ua ia tofia.—Faitau le Salamo 37:9-11.

4. O le ā e faia e lenei Pule?

E pei ona faapotopoto e se leoleo mamoe ana mamoe, ua faapena foʻi ona faapotopoto e Iesu tagata agamalu mai i atunuu uma, ma aʻoaʻo i ala alofa o le Atua. (Ioane 10:16; 13:34) Ua naunau nei tagata e lagolago Iesu ma lona tulaga tautupu. (Salamo 72:8; Mataio 4:19, 20) I le lalolagi aoao, ua autasi tagata faamaoni e faalauiloa atu e faapea, ua avea Iesu ma Tupu.—Faitau le Mataio 24:14.

Ua toeitiiti ona faaaogā loa lea e Iesu lona mana e laveaʻia ai tagata mai faigāmalo piʻopiʻo. Ua ia filifilia nisi o ona soo faamaoni ina ia pule faatasi ma ia o ni tupu i le lagi, e pulea mai le lalolagi. (Tanielu 2:44; 7:27) I le pulega a Iesu, o le a faatumulia le lalolagi i le poto o Ieova, ma toe faafoʻisia le lalolagi parataiso lea na leiloa i le amataga.—Faitau le Isaia 11:3, 9; Mataio 19:28.

Mo nisi faamatalaga, tagaʻi i le mataupu e 8 o lenei tusi, O ā Aʻoaʻoga Moni a le Tusi Paia?, lomia e Molimau a Ieova.