E te Silafia?

Pe na sesē Iesu ina ua fetalai e uiga i le masima ua magalo?

▪ I le Lauga a Iesu i le Mauga, na faapea atu ai i ona soo: “O outou o le masima o le lalolagi, ae afai e magalo le masima, e faapefea ona toe faamāi? E leai se mea e toe aogā i ai, ua na ona lafo i fafo ma soli e tagata.” (Mataio 5:13) E mafai e le masima ona faasao ma puipuia meaʻai ma isi mea mai i le faaleagaina. O lea, atonu na uiga atu le talafaatusa a Iesu i le mafai ma e tatau i ona soo ona puipuia isi, mai i le faaleagaina faaleagaga ma amioga lē mamā.

E tusa ai ma le manatu o Iesu i le masima ua magalo, na faapea mai le The International Standard Bible Encyclopedia: “E fefiloi le masima mai i le Sami Mate ma isi minerale, ia e sili atu ona malolosi nai lo o le masima, ma e mafai ona aveesea ai le oona o le masima ma lē toe maua ai se tofo.” O le māfuaaga lea na taʻua ai e Iesu le masima ua magalo, “e leai se mea e toe aogā i ai, ua na ona lafo i fafo.” Na faapea atili mai le lomifefiloi, “e leʻi fiafia le toʻatele o tagata i le masima na maua i le Sami Mate ona sa lē oona. Peitaʻi, sa faaaogā pea e tagata Palesitina ona sa maua gofie (faigofie ona ao mai i luga o le matafaga).”

O le ā le uiga o le talafaatusa a Iesu i le tupe siliva na leiloa, i lana ʻaufaalogologo?

▪ Na faamatala e Iesu se talafaatusa i se fafine na leiloa lana tupe siliva e tasi mai i ana tupe siliva e sefulu, ona ia ave lea o le molī ma salu ma le faaeteete lona fale seʻia oo ina maua. (Luka 15:8-10) I aso o Iesu, o le tupe siliva e tasi e tai tutusa ma le totogi o se tagata i le aso atoa, o lona uiga, e lē o se tupe laʻitiiti. Peitaʻi, e iai isi vala o le olaga e fetaui i ai le tulaga sa ia faamatalaina.

Ua taʻua i nisi o tusi, sa vaai le fafine i le tupe siliva o se mea e tāua po o se suvania. Atonu sa faasino atu foʻi Iesu i le tupe siliva, o se mea e tautele a se aiga, po o se vaega o se tupe e totogi atu i le tama e faaipoipo i ai se tamaʻitaʻi. E tusa po o le tulaga lenā pe e leai, ae o lea ua tatou malamalama i le māfuaaga na tatau ai ona popole le fafine na leiloa lana tupe.

O fausaga o fale o tagata lautele i aso o Iesu e lē sao tele i ai se malamalama po o le vevela, ma o nisi fale e tau leai ni faamalama. E masani ona ufi fola i vao ma lālā laau mamago. O lea, e faigatā ona maua se tupe siliva pe a paʻū i totonu o le fale. Na faapea mai se faitofā, “o le auala masani e suʻe ai se mea laʻitiiti e pei o se tupe siliva ua paʻū i totonu o na fale, o le faaaogā lea o se molī, po o le salu foʻi o le fale.”

[Ata i le itulau 21]

Masima i le Sami Mate

[Ata i le itulau 21]

Tupe siliva