Fiafia e Foa‘i Atu
Fiafia e Foaʻi Atu
“E sili le fiafia e maua i le foaʻi atu i lo o le talia mai.”—GALUEGA 20:35.
Aiseā ua faamanatu ai e isi le Kerisimasi?
E pei ona taʻua e Iesu, e maua le fiafia e lē o loo foaʻi atu, faapea ma lē o loo talia mai. E manatu le toʻatele, ina ia maua lenā fiafia, e tāua le foaʻi atu o meaalofa i le Kerisimasi. O se faataʻitaʻiga, na taʻua i se suʻesuʻega, sa faatalitalia aiga taʻitasi i Aialani e faaalu pe tusa ma le $660 tālā Amerika i meaalofa o le Kerisimasi.
Aiseā ua avea ai o se luʻi?
E manatu le toʻatele, o le foaʻi atu o meaalofa i le Kerisimasi ua fai ma popolega i le mafaufau, ae e lē maua ai se fiafia. Aiseā? Ua uunaʻia le toʻatele ina ia faatau meaalofa e latou te lē gafatia, ma ona e toʻatele tagata e faatau meaalofa i lea taimi, e iʻu ai ina feita le toʻatele ona o le tumutumu ma le feomaʻi.
Mataupu silisili o le Tusi Paia.
Na fetalai Iesu: ʻIa foaʻi atu pea.’ * (Luka 6:38) E leʻi foaʻi atu e Iesu meaalofa i se taimi patino na faatalitalia ai o ia e tagata e faia faapea. Na apoapoaʻi atu foʻi o ia i ona soo, ina ia fai ma masaniga le foaʻi atu pea.
“Ia taʻitoʻatasi ma faia e tusa ma le mea ua filifili i lona loto, aua le faia ma le tigā, aua foʻi le faia faamalosi, auā e alofa le Atua i lē e foaʻi ma le lotofiafia.” (2 Korinito 9:7) Na faapea mai se faitofā o le Tusi Paia, o le uiga o le fautuaga a Paulo, e lē tatau ona foaʻi atu ma le faamalosi. O le “foaʻi ma le lotofiafia,” e lē uiga atu i le foaʻi o se meaalofa patino i se tagata patino i se taimi patino, e pei ona iai i taimi o le Kerisimasi.
“Afai e lotomalie se tasi e foaʻi atu, e talileleia lea e tusa ma mea ua iā te ia, ae e lē tusa ma mea e lē o iā te ia.” (2 Korinito 8:12) E lē finagalo Ieova e nofo aitalafu Kerisiano, ona o le faatauina o meaalofa taugatā. Nai lo lea, e “talileleia” e le Atua le meaalofa a se tasi e foaʻi ʻe tusa ma mea o iā te ia,’ ae e lē o se meaalofa e tau ina fai. Ioe, e matuā eseese lava ma faalauiloaga a le ʻaufaipisinisi o le Kerisimasi e faapea, “faatau nei, ae totogi mulimuli.”
[Faaopoopoga i lalo]
^ pala. 8 Ua faapea mai nisi o faaliliuga o le Tusi Paia: “Ia avatu.” Peitaʻi, i Eleni anamua, e uiga atu lenā faaupuga i se gaoioiga e faaauau pea. Ina ia maua le uiga moni o le faaupuga na faaaogā e Iesu, ua faaliliuina i le Faaliliuga a le Lalolagi Fou e faapea ʻIa foaʻi atu pea.’
