Ia Aʻoaʻo Lau Fanau

Sa Faamaoni Pea Iotama e ui i Faafitauli i Lona Aiga

PE A filifili se matua e lē toe auauna iā Ieova le Atua, o le a iai la se aafiaga i olaga o le fanau. Seʻi tatou talanoa e faatatau iā Iotama, ma faafitauli na ia fesagaʻia a o tuputupu aʻe.

Na avea Usia le tamā o Iotama ma tupu o Iuta. O ia o le tagata aupito i malosi o le atunuu, ma sa avea ma tupu i le tele o tausaga a o leʻi fanau mai Iotama. Peitaʻi a o laʻitiiti Iotama, na faamaualuga ai Usia ma solia tulafono a le Atua. O lea na taia ai o ia e le Atua i se faamaʻi leaga o le lepela. E te iloa le mea na faia e Iotama?— *

Sa faaauau pea ona auauna Iotama iā Ieova. Atonu na fesoasoani i ai lona tinā o Ierusa. Ae sa faigatā pea iā te ia ona tumau i le faamaoni iā Ieova, ina ua liliuese lona tamā mai iā Ieova.

Ae faapefea pe a lē toe auauna lou tamā po o lou tinā iā Ieova? E mautinoa o le a faigatā mo oe, a ea?— E lē o se mea sesē lou mafaufau po o le ā lau mea a fai pe a lē toe auauna ou mātua iā Ieova. Seʻi tatou faitau i le Tusi Paia po o le ā le manatu o Tavita i lenei mea.

O le tamā o Tavita o Iese o se tane lelei. Sa auauna o ia iā Ieova, ma e mautinoa sa alofa i ai Tavita. Ae sa atiaʻe e Tavita lona alofa mo Ieova, lea e sili atu nai lo o le alofa i lona tamā. Seʻi tatou vāai pe aiseā na ia faia ai faapea.

 Faamolemole suʻe lau Tusi Paia i le Salamo 27:10. Na tusi Tavita e faapea: “E tusa pe tuua aʻu e loʻu lava tamā ma loʻu lava tinā, ae e talia lava aʻu e Ieova.” Manatu i le mea lenei: Ua faapea mai le Tusi Paia, afai e lē toe auauna le tinā po o le tamā o Tavita iā Ieova, e faaauau lava ona auauna Tavita iā Ieova.

Ae ā oe? Pe e faaauau pea ona e auauna iā Ieova e tusa lava pe e lē o toe faia faapea e lou tamā po o lou tinā?— E tāua tele lenei fesili. O le māfuaaga, ona o loo taʻua i le Tusi Paia le poloaʻiga sili e faapea: “Ia e alofa atu iā Ieova lou Atua ma lou lotoatoa, ma lou ola atoa, ma lou mafaufau atoa.”

O le uiga o lenei poloaʻiga, ia faamaoni iā Ieova e tusa pe e faigatā ona fai. E te iloa o ai o loo manaʻo e taofia i tatou mai le auauna atu iā Ieova?— O Satani le Tiapolo le fili o le Atua. Na taʻua e Iesu Satani o “le pule o lenei lalolagi.” O loo taʻua foʻi i le Tusi Paia o ia o “le atua o lenei faiga o mea a le lalolagi.” Pe e tatau ona tatou fefefe iā Satani?—

Leai, e lē tatau. Peitaʻi, e manaʻomia ona tatou iloa e sili atu ona malosi Ieova nai lo o Satani. O le a puipuia e Ieova i tatou pe a tatou faatuatuaina o ia. Faitau i lau Tusi Paia i le auala na puipuia ai e Ieova Tavita mai i le tagata tinoese o Koliata. E puipuia foʻi oe e Ieova pe afai e tumau ona e faamaoni iā te ia.

Faitau i lau Tusi Paia

2 Nofoaiga a Tupu 26:16-21; 27:1, 2;

Mataio 22:37

Ioane 12:31; 2 Korinito 4:4

Eperu 13:5, 6

1 Samuelu 17:41-54

[Faaopoopoga i lalo]