Na ou ola aʻe i Rmaysh e lata i le tuaoi o Isaraelu ma Lepanona i vaitaimi na fetauaʻi ai ia atunuu. Ou te manatua pea le pāpā o pomu na tatao i le eleele ma ē na lavevea ai ma mumutu ai ni vaega o o latou tino. Sa faigatā le olaga i inā, ma na matuā faateteleina amioga leaga ma faiga sauā.

Na lolotu lo matou aiga i le Lotu Maronite o se tasi o ituaiga o le Lotu Katoliko i Sasaʻe. Sa tele lava ina pisi Tamā i le tausiaina o lo matou aiga e toʻasefulu lua, ae na faamautinoa e Tinā lo matou auai uma pea i le lotu. Peitaʻi, na iai se taimi na ou lagona ai e lē o taulau ona fesoasoani le lotu i tagata lima vaivai e pei lava foʻi o tagata lautele.

Na ou fiafia i le karate i le taimi o loʻu talavou. Sa aʻoaʻoina aʻu ina ia ou tomai i le karate lea e faaaogāina ai auupega eseese, ma le karate e faaaogā ai lima ma vae. Na ou faapea ifo iā te aʻu, ʻE lē mafai ona ou taofia taua ae e mafai ona ou taofia tagata sauā.’ O so o se mea ou te vaai o misa ai ni tagata, e masani lava ona ou osovale i ai. O aʻu o se tagata maitaita. E faigatā ona pulea loʻu ita, ma o le māfuaaga lea na fefefe uma ai tagata i le itu i saute o Lepanona iā te aʻu. Na ou taumafai e taofia faiga lē tonu ma faiga sauā.

O le 1980 na ou auai ai i se kalapu karate i Beirut. O se mea masani i lenā nofoaga le pāpā solo o pomu ae lē vaoia ai loʻu alu i aʻu toleniga. O loʻu olaga i lenā taimi e na o le ʻai, moe ma ola e pei o Bruce Lee, o se tagata Saina fai ata tifaga na fanau i Amerika ma e siamupini i le karate. Na ou faataʻitaʻi i le auala e fai ai lona ulu, o lana savali ma le auala e ʻeʻē ai pe a karate. Ou te foliga paū i taimi uma.

O loʻu sini ia avea ma polofesa i le karate i Saina. I se tasi afiafi a o fai aʻu toleniga e sauniuni ai mo laʻu malaga i Saina, na tuʻituʻi mai ai nisi i loʻu faitotoʻa. O se tasi o aʻu uō ma ni Molimau a Ieova se toʻalua. A o sisina ifo loʻu afu mai i aʻu toleniga na ou faapea  atu iā i latou, “Ou te lē iloa ma se mea o le Tusi Paia.” Na lilo i oʻu manatu o lea feiloaʻiga o le a suia ai loʻu olaga.

Na faasino mai e Molimau a Ieova iā te aʻu mai i le Tusi Paia le māfuaaga e lē mafai ai e tagata ona aveesea faiga lē tonu ma faiga sauā. Na la faamalamalama mai o Satani le Tiapolo o le pogai o faafitauli. (Faaaliga 12:12) Na ou maofa i le filemu ma le lagona mautinoa na faaalia e Molimau a Ieova. Na pāʻia loʻu loto ina ua la aʻoaʻo mai le suafa o le Atua. (Salamo 83:18) Sa la faitau mai foʻi le 1 Timoteo 4:8: “Auā e itiiti le aogā o le faamalositino, a o le faamaoni i le Atua e aogā lea i mea uma lava, auā o loo folafola mai ai le ola i le taimi nei ma le lumanaʻi.” Na iai se aafiaga o lenā mau i loʻu olaga.

Ae pagā lea, na lē toe maua sa matou fesootaʻiga ma Molimau a Ieova ona na faasā e le matou aiga ona toe ō mai. Peitaʻi, na ou filifili loa e tuu le karate ae suʻesuʻe le Tusi Paia. E leʻi fiafia oʻu uso i laʻu faaiʻuga, ae na ou maumauaʻi lava e toe saʻilia Molimau a Ieova ma suʻesuʻe le Tusi Paia ma i latou.

Sa ou saʻilia Molimau a Ieova ae ou te leʻi mauaina i latou. O le taimi lea, sa ou mafatia ai ona o le maliu faafuaseʻi o loʻu tamā ma isi lava faafitauli i loʻu aiga. Sa ou faigaluega i se kamupani faufale, ma i se tasi aso na fesili mai ai se tasi e ma te faigaluega faatasi o Adel pe aiseā ou te faanoanoa ai. Na amata ona ia faamatala mai iā te aʻu le faamoemoe o le toetū o loo i le Tusi Paia. Na onosaʻi lenei Molimau alofa ma agalelei e ma te suʻesuʻeina le Tusi Paia mo le iva masina.

A o faagasolo la ma suʻesuʻega, na ou iloa ai e manaʻomia ona ou faia ni suiga i oʻu uiga. E leʻi faigofie auā ou te itaitagofie. Peitaʻi o le fesoasoani a le Tusi Paia na mafai ona pulea ai loʻu ita. O se faataʻitaʻiga i le Mataio 5:44 o loo iai le fautuaga a Iesu: “Ia alolofa atu pea i o outou fili ma tatalo pea mo ē ua sauāina outou.” O loo lapataʻi mai foʻi le Roma 12:19: “Aua tou te tauimasui . . . auā ua tusia: ʻO aʻu e faia le tauimasui; ou te taui atu lava, ua fetalai mai ai Ieova.’” O nisi na o mau na fesoasoani iā te aʻu e maua ai le filemu o le mafaufau ma le loto.

E ui sa tetee mai loʻu aiga ina ua ou faatoʻā suʻesuʻe ma Molimau a Ieova, ae i le taimi lenei ua latou faaalia le faaaloalo i Molimau a Ieova. Ua avea se tasi o oʻu uso laʻitiiti ma Molimau a Ieova, ma e oo lava ina maliu Tinā o loo ia lagolagoina pea o ma talitonuga pe a faitio mai isi.

Ua faamanuiaina foʻi aʻu i se avā lelei ma faamaoni o Anita, o si aʻu paga faapelepele i le auaunaga faataimi atoa i le galuega talaʻi. O le tausaga e 2000 na ma siitia ai ma Anita i Eskilstuna i Suetena, e aʻoaʻo tagata e tautatala i le gagana Arapi i le Tusi Paia.

Ou te lagona le faanoanoa pe a ou vaai atu o mafatia tagata i faiga sauā. Ae o le iloa o le pogai moni ua māfua ai na faiga, ma ua toeitiiti ona aveesea lea e le Atua, ua mafai ona ou maua ai le olioli ma le filemu.​—Salamo 37:29.