Ua faailoa mai e lenei tusitala o le Tusi Paia, le matuā puupuu o le soifuaga faaletagata pe a fua atu i le mausalī o faavae na faia ai le lalolagi. Ua faitau afe tausaga o fotuaʻi mai lea tupulaga ma toe mou atu, a o le Lalolagi paneta ua faamaonia le faaauau ma tumau o lona malosi e faatumauina ai pea le ola seʻia oo mai le asō.

Ua sili atu ona televave le soifuaga talu mai le Taua Lona Lua a le Lalolagi, nai lo o se isi lava taimi. Pe ā ma le 70 tausaga pe sili atu, ua mātauina ai le alualu i luma o le atamai i auala tau femalagaaʻiga, fesootaʻiga, ma isi lava tomai faatekinolosi lea ua faaleleia ai le tamaoaiga, o se mea e leʻi ausia muamua. Ua olioli le toʻatele i se tulaga maualuga ua iai le soifuaga lea na manatu nisi e lē taitai ona ausia. I le taimi e tasi, ua toetoe faatoluina le faitau aofaʻi o tagata i le lalolagi.

Peitaʻi, e ō mai faatasi nei suiga ma ona aafiaga. O gaoioiga a tagata, ua faaleagaina ai le lalolagi ma tauau ina faaitiitia ai malosiaga faalenatura lea e faatumauina ai le ola. Ua faapea mai le ʻausaienitisi, ua tatou ulu atu nei i se vaitaimi iloga o le talafaasolopito o le lalolagi paneta e taʻua o le Anthropocene, o se vaitau iloga o le matuā faaleagaina o le paneta ona o gaoioiga a tagata.

Na folafola mai e le Tusi Paia se taimi o le a ʻfaaleagaina ai le laueleele’ e tagata. (Faaaliga 11:18)  Ua taumānatu nisi pe e lē o le taimi tonu lenei ua tatou ola ai. Po o le a faateteleina le leaga o le lalolagi ona o gaoioiga a tagata? Po o le a faaleagaina atoatoa le lalolagi?

Po o agaʻi atu le lalolagi i se tulaga e lē mafai ona toe faaleleia? Ua faigatā ona iloa e saienitisi le mea o le a tupu i le lalolagi ona o mea leaga o loo faia e tagata. O lea, ua latou popole ai ina neʻi oo mai ni mala mataʻutia ona o suiga faafuaseʻi i le tau.

O se faaaʻoaʻoga, sei mafaufau foʻi i le West Antarctic Ice Sheet. E talitonu nisi afai e faaauau ona faateteleina le vevela o le lalolagi, e iʻu ina liusuavai ai le aisa. E māfua ona tupu lenei mea ona e mitiia e le aisa le vevela o ave o le lā. E apoia foʻi e le aisa le māfanafana mai i le moana sausau, ma liusuavai ai ma e lē toe mafai ona taofia lenā tulaga. A o faasolo ina liusuavai le aisa, o le a siisii ai i luga le suāsami. O le iʻuga, o le a aafia ai le faitau miliona i ni mala mataʻutia.

E tele taumafaiga ua faia ina ia faafetaiaʻia ai le tulaga leaga ua iai le siʻosiʻomaga. O se tasi o na taumafaiga, o le fuafua lea o a tatou atinaʻe i le tulaga o le siʻosiʻomaga o le lalolagi. O le ā le iʻuga?

O le mea e faanoanoa ai, ona ua soona faaaogā e tagata punaʻoa o lo tatou paneta, ae ua tuai ona toe faaleleia. O le ā se gaoioiga e mafai ona fai i ai? Ua faapea mai se tasi o tagata suʻesuʻe: “E matuā lē iloa lava e le tagata le auala e faasoasoaina ai punaʻoa o le lalolagi.” Ua ōgatusa lenei manatu ma le faamatalaga a le Tusi Paia: “E lē o i le tagata foʻi e savali, ona faatonuina le mea e ui ai o ia.”​—Ieremia 10:23.

I le isi itu, ua faamautinoa mai e le Tusi Paia o le a lē faatagaina e le Atua o Lē na Foafoaina mea uma, le tagata e na te faaleagaina atoatoa le siʻosiʻomaga. Ua taʻua i le Salamo 115:16: “A ua tuuina mai e [le Atua] le lalolagi i le fanau a tagata.” Ioe o le lalolagi o se “meaalofa lelei” mai i lo tatou Tamā i le lagi. (Iakopo 1:17) Pe e tatou te faatalitalia la le Atua e na te foaʻi mai se meaalofa e aogā  mo na o sina taimi? E leai! E faamaonia lea i le auala na foafoaina ai lo tatou lalolagi paneta.

Ua faamatala auʻiliʻili mai e le Tusi Paia i le tusi o Kenese le auala na foafoaina ai ma le faaeteete e le Atua le lalolagi. I le taimi muamua, na “gaogao ma soona nunumi le lalolagi, na ufitia . . . i le pōuliuli.” Ae na taʻua patino mai na iai “vai” i luga o le fogāeleele lea e tāua mo le ola. (Kenese 1:2) Ona fetalai mai lea o le Atua: “Ia iai le malamalama.” (Kenese 1:3) Na susulu mai ave o le lā, ma malamalama ai le lalolagi mo le uluaʻi taimi, ona sosoo lea ma le faia o le eleele mātūtū ma le sami. (Kenese 1:9, 10) O le isi mea na vaaia o ʻvao, o laau ʻaina e iai fatu e taʻitasi e tusa ma lona ituaiga ma laau ʻaina e fua mai.’ (Kenese 1: 12) Ua saunia e Ieova mea uma e manaʻomia mo faataamilosaga eseese o mea i le natura lea e mafai ona faatumauina ai le ola, e pei o le photosynthesis (le auala e gaosi ai meaʻai a le laau e faaaogā ai le malamalama mai i le lā). O le ā le fuafuaga na faia ai nei mau sauniuniga?

Na faamatalaina e le perofeta o Isaia le Atua “o le Mataisau o Lē na faia le lalolagi, o Ia o Lē na faatumauina, na ia lē foafoaina fua ae na ia faia ina ia ʻainā.” (Isaia 45:18) E manino mai, e finagalo le Atua ina ia ʻainā e tagata le lalolagi e faavavau.

E faanoanoa ona ua faaaogā sesē e le tagata le meaalofa matagofie a le Atua ma oo ina matuā faaleagaina ai. Peitaʻi, e lē o suia lava le finagalo o le Atua. O loo taʻua i le Numera 23:19, “E lē o se tagata le Atua e tala pepelo ai o ia, e lē o se atalii foʻi o se tagata e salamō ai. Pe na fetalai ea o ia i se mea ae na te lē faia, pe na fetalai foʻi o ia i se mea ae na te lē faataunuuina?” O lea, nai lo le faataga e le Atua o le lalolagi e faaauau ona faaleagaina, ua toeitiiti oo mai le taimi e na te “faafanoina ai i latou o loo faaleagaina le laueleele.”​—Faaaliga 11:18.

Na fetalai Iesu Keriso i lana lauga taʻutaʻua i le mauga: “E fiafia o ē e agamalu, auā e fai mo latou  tofi le lalolagi.” (Mataio 5:5) Mulimuli ane, na faailoa mai ai e Iesu le auala o le a faasaoina mai ai le lalolagi mai le faatamaʻiaina. Na ia faatonuina ona soo e tatalo faapea: “Ia oo mai lou malo. Ia faia lou finagalo i le lalolagi, e pei ona faia i le lagi.” Ioe, o le a faataunuuina le finagalo o le Atua mo le lalolagi, e ala mai i lona Malo.​—Mataio 6:10.

E tusa ai o suiga mataʻina o le a faia e lenei Malo, na fetalai mai le Atua: “Faauta! Ou te faia ia fou mea uma lava.” (Faaaliga 21:5) Po o le uiga ea o le a faia e le Atua se isi lalolagi e sui ai le lalolagi lenei? E leai, auā e leai se mea na sesē i le foafoaina o le tatou paneta. Nai lo lea, o le a tafiesea e le Atua i latou o loo faapogaia le ʻfaaleagaina o le laueleele,’ po o le faiga o mea a tagata o loo iai nei ma ona pulega. Ae o le a suia i le “lagi fou ma le lalolagi fou” po o le Malo o le Atua i le lagi, lea o le a pule mai i le lalolagi fou o tagata.​—Faaaliga 21:1.

O le a toe faafoʻisia e le Atua punaʻoa faalenatura o le lalolagi ina ia faatumauina ai pea le ola. Na faamatala e le faisalamo le gaoioiga o le a faia e le Atua: “Ua e liuliualo mai i le laueleele, ina ia e foaʻiina mai i ai mea e tele lava.” O lea, pe a lē toe leaga le tau ma faamanuiaina e le Atua le lalolagi, ona avea loa lea o le laueleele o se parataiso e mau i meaʻai.​—Salamo 65:9-13.

Na taʻua e Pyarelal, o le failautusi a Mohandas Gandhi o lē na avea ma taʻitaʻi faaleagaga o Initia: “Ua lava ma totoe mea ua saunia e le lalolagi e faamalieina ai manaʻoga o tagata taʻitoʻatasi, ae lē ina ia faamalie ai le matapeʻapeʻa o tagata.” O le a foʻia e le Malo o le Atua le pogai o faatamaʻiaga ua faia i le lalolagi, e ala i le suia o loto o tagata. Ua valoia mai e Isaia e faapea i le pulega o le Malo o le Atua, o le a lē faia e tagata “se mea e lamatia ai pe faaleagaina” ai e le tasi le isi po o le lalolagi. (Isaia 11:9) O le mea moni, e faitau miliona tagata i aso nei mai i so o se talaaga ua aʻoaʻoina i tapulaa maualuluga a le Atua. Ua aʻoaʻoina i latou ina ia alolofa i le Atua ma tuaoi, ia lotofaafetai, tausia lelei le siʻosiʻomaga, faaaogā fuafua punaʻoa faalenatura, ma ola e tusa ai ma le finagalo o le Atua mo tagata ma le lalolagi. Ua saunia i latou mo le ola i le lalolagi parataiso.​—Failauga 12:13; Mataio 22:37-39; Kolose 3:15.

Ua faaiʻu mai le tala o le foafoaga i le Kenese e faapea: “Ua silasila atu le Atua i mea uma na ia faia, tagaʻi foʻi! ua matuā lelei lava.” (Kenese 1:31) E mautinoa e lē faatagaina e le Atua le lalolagi matagofie e faaleagaina atoatoa. Ua faamāfanafanaina i tatou i le iloa o le a malupuipuia lo tatou lalolagi paneta i aao alofa o Lē na Foafoaina mea. Ua ia folafola mai: “E fai lava le lalolagi mo ē e amiotonu, e nonofo ai pea i latou e oo i le faavavau.” (Salamo 37:29) E faamoemoe o le a avea oe ma se tasi o “ē amiotonu” o le a mau i le lalolagi e faavavau.