O le maliu o Iesu o se mea e sili ona tāua na tupu i le talafaasolopito. Sa maliu o ia ina ia toe faafoʻisia le ola o tagata i le tulaga e tatau ona iai. E leʻi faia le tagata ma se faanaunauga ia faia mea leaga, ia mamaʻi pe feoti. (Kenese 1:31) Peitaʻi, ua oo mai le agasala i le lalolagi ona o le uluaʻi tagata o Atamu. Ua foaʻiina mai e Iesu lona ola ina ia laveaʻiina i tatou mai i le agasala ma le oti.​—Faitau le Mataio 20:28; Roma 6:23.

E mataʻina le alofa na faaalia e le Atua i le auina mai o lona Alo i le lalolagi ina ia maliu mo i tatou. (1 Ioane 4:9, 10) Na fetalai Iesu i ona soo ia manatua lona maliu, e ala i le faia o se sauniga faigofie e faaaogā ai le areto ma le uaina. O le faia faapea i tausaga taʻitasi, e faaalia ai lo tatou lotofaafetai i le alofa na faaalia e le Atua ma Iesu.​—Faitau le Luka 22:19, 20.

Ina ua faapea atu Iesu i ona soo ia manatua lona maliu, sa fetalai o ia e faatatau i se feagaiga po o se maliega. (Mataio 26:26-28) O lenā feagaiga ua maua ai e i latou ma se isi vaega toʻaitiiti, le faamoemoe o le avea ma tupu ma ositaulaga faatasi ma Iesu i le lagi. E ui lava e faitau miliona i latou e faamanatuina le maliu o Iesu, ae e na o ē ua iai i lenā feagaiga e taumafaina le areto ma le uaina.​—Faitau le Faaaliga 5:10.

Ua toetoe 2,000 tausaga talu ona amata filifilia e Ieova i latou o le a avea ma tupu i le lagi. (Luka 12:32) E matuā toʻaitiiti lo latou aofaʻi pe a faatusa atu i le aofaʻi o ē o le a ola e faavavau i le lalolagi.​—Faitau le Faaaliga 7:4, 9, 17.