O le a faaauau ona agaʻigaʻi i luma le malamalamaga o tagata i mataupu faasaienisi. Ae po o le a mafai ona latou faia aʻe se sosaiete o tagata e manatu mamafa le tasi i le isi? E leai. Ua tumu le lalolagi i aso nei i le manatu faapito ma le matapeʻapeʻa. Peitaʻi, e iai se mea e sili atu ua finagalo i ai le Atua mo le fanauga a tagata.​—Faitau le 2 Peteru 3:13.

O loo faamatala i le Afioga a le Atua se sosaiete o tagata i le lalolagi aoao i le lumanaʻi, o le a alofa le tasi i le isi. O le a ola saogalemu tagata, ma e leai se tasi e toe faamataʻu iā i latou.​—Faitau le Mika 4:3, 4.

Sa faia e le Atua le tagata e aunoa ma se faanaunauga manatu faapito na tuu i ai. Ae talu ai na filifili le uluaʻi tagata e lē usitaʻi i le Atua, o lea na lē toe lelei atoatoa ai o ia. Ua ia tuufaasolo mai iā i tatou le faanaunauga manatu faapito. E ui i lea, o le a faaaogā e le Atua Iesu ina ia toe faafoʻisia tagata i le lelei atoatoa.​—Faitau le Roma 7:21, 24, 25.

Ina ia ōgatusa ma le finagalo o le Atua, na maliu Iesu e fai ma taulaga ma aveesea ai aafiaga o le lē usitaʻi o le uluaʻi tagata. (Roma 5:19) O lea, o Iesu ua mafai ai ona tatou maua se lumanaʻi matagofie, e lē toe iai i tagata se faanaunauga manatu faapito e fai le mea sesē.​—Faitau le Salamo 37:9-11.