“AISEĀ ua tupu ai lenei mea iā te aʻu? Aiseā na lē taofia ai e le Atua lenei mea e tupu?” O fesili na sa atugalu ai le talavou o Sidnei e 24 tausaga mai i Pasili. Na aafia o ia i se faalavelave a o faasee i le vai, ma iʻu ai ina alu i se nofoa faataavalevale.

O mafatiaga e māfua mai i faalavelave faafuaseʻi, maʻi, le maliu o sē e pele, mala faalenatura ma taua, e faigofie ai i nisi tagata ona lagona le lē fiafia i le Atua. E lē o se tulaga lenei e faateʻia ai. I aso anamua, na aafia le augātamā o Iopu i le tele o mala, ma na ia tuuaʻia sesē ai le Atua e faapea: “Na ou alaga atu iā te oe mo se fesoasoani, ae e te leʻi tali mai iā te aʻu; na ou tū foʻi, ina ia e uaʻi mai ai iā te aʻu. Ua e liua oe ma e agaleaga mai ai iā te aʻu; ua e taia aʻu i lou aao malosi ona o lou ʻinoʻino mai iā te aʻu.”—Iopu 30:20, 21.

E leʻi iloa e Iopu le pogai o ona puapuaga ma le māfuaaga na oo ai nei mea iā te ia. Ae o le mea e fiafia ai, ona ua faailoa mai i le Tusi Paia le māfuaaga e oo mai ai na tulaga, ma le auala e ao ona tatou tali atu ai.

Ua faapea mai le Tusi Paia e uiga i le Atua: “E atoatoa ona lelei ana gaoioiga, auā e tonu ona ala uma. O le Atua faamaoni, e lē o iā te ia se faiga lē tonu; e amiotonu ma amio saʻo o ia.” (Teuteronome 32:4) Pe e talafeagai la i se Atua e “amiotonu ma amio saʻo,” ona finagalo ia mafatia tagata pe e faaaogā mala e faasala pe faamamāina ai i latou?

E leai, auā ua taʻua i le Iakopo 1:13: “Pe a faaosoosoina se tasi, aua neʻi manatu: ʻUa faaosoosoina aʻu e le Atua.’ E lē mafai ona faaosoosoina le Atua i mea leaga. E lē faaosooso atu foʻi o ia i se tasi.” Ua tatou iloa mai i le Tusi Paia, na tuuina mai e le Atua i tagata se olaga lelei atoatoa i le amataga. Na ia tuuina mai iā Atamu ma Eva se siʻomaga matagofie, mea uma e manaʻomia mo le ola, ma ni galuega e faamalieloto. Na fetalai le Atua iā i laʻua: “Ia fanafanau ma ia matuā faatoʻateleina, ia tumu ai le lalolagi ma ia galueaʻiina.” E leai la se māfuaaga na tatau ai ona lē fiafia Atamu ma Eva i le Atua.—Kenese 1:28.

Peitaʻi ua mātua leaga le tulaga o mea i nei aso. I le faagasologa o le talafaasolopito o tagata, ua iloa ai le matuā faateteleina o le leaga o le tulaga o mea mo tagata. Ua moni ai le Roma 8:22: “O loo ōi faatasi pea ma tigā faatasi foafoaga uma e oo mai i aso nei.” Aiseā?

Ina ia malamalama i le pogai o puapuaga, e lelei ona toe tomānatu i le amataga. E iai se agelu fouvale na mulimuli ane faaigoa o Satani le Tiapolo, na faasesēina Atamu ma Eva. Na iʻu ina teena ai e Atamu ma Eva tapulaa a le Atua mo le saʻo ma le sesē, e pei ona atagia mai i lana faatonuga iā i laʻua, ia aua neʻi aai i “le laau e iloa ai le lelei ma le leaga.” Na fai atu le Tiapolo iā Eva e la te lē feoti pe afai e lē usiusitaʻi i le Atua. Na tuuaʻia e le Tiapolo le Atua e pepelo, ma e na te lē tuuina mai le saʻolotoga i tagata e filifili ai le mea e saʻo ma le mea e sesē. (Kenese 2:17; 3:1-6) I se isi faaupuga, na faapea mai Satani e mafai lava e tagata ona taulau manuia e aunoa ma le pule a le Atua. O nei manatu, ua lāgā ai se finauga tāua—Pe e tonu le pule a le Atua?

Na tuuaʻia foʻi e le Tiapolo tagata e māfua ona auauna i le Atua ona o ni māfuaaga manatu faapito. Na faapea atu le Tiapolo i le Atua e faatatau iā Iopu: ʻPo ua e lē siʻosiʻomia ea o ia i le pā, ma lona fale, atoa ma ana mea uma? Ae peitaʻi, ia aapa atu lou aao faamolemole, ma tago i mea uma ua iā te ia, pe e lē faifai ai o ia i ou lava luma.’ (Iopu 1:10, 11) E ui na faatatau atu upu a Satani iā Iopu, ae ua atagia mai i ana upu lona tuuaʻia o tagata uma i le auauna i le Atua ona o ni uunaʻiga manatu faapito.

O le ā le auala sili e foʻia atoatoa ai nei tuuaʻiga uma? O Ieova le Atua o le puna o le atamai uma, ma ua ia saunia mai se vaifofō sili e faamalieina ai i tatou. (Roma 11:33) Ua faataga e le Atua tagata e pulea i latou lava mo se vaitaimi, ma o iʻuga o a latou  pulega o le a faamaonia mai ai po o ai e sili atu lana pulega.

O tulaga pagatia ua tutupu i le lalolagi i aso nei, o faamaoniga maumaututū ia o le lē taulau o pulega faaletagata. E latou te lē o taulau i le aumaia o le filemu, saogalemu ma le fiafia, ae ua latou faaleagaina le lalolagi. O nei tulaga ua faamaonia atili ai le moni o le Ieremia 10:23: “E lē o i le tagata foʻi e savali, ona faatonuina le mea e ui ai o ia.” E na o le pulega a le Atua e mautinoa o le a maua ai e tagata le taulau manuia, filemu ma le fiafia e tumau, auā o lona finagalo lea.—Isaia 45:18.

O le a faapefea la ona faataunuu e le Atua lona finagalo mo tagata? Ia manatua, na aʻoaʻo e Iesu ona soo ia tatalo: “Ia oo mai lou malo. Ia faia lou finagalo i le lalolagi, e pei ona faia i le lagi.” (Mataio 6:10) O lea, i le taimi atofaina a le Atua, o le a ia faaaogā ai lona Malo ina ia tafiesea pogai o puapuaga uma. (Tanielu 2:44) O le a lē toe iai ni maʻi, le oti ma le mativa, auā ua faailoa mai i le Tusi Paia o le a ʻlaveaʻi e le Atua le tagata mativa o loo tagi atu mo se fesoasoani.’ (Salamo 72:12-14) Ua folafola mai i le Isaia 33:24: “E lē fai mai foʻi se tasi ua nofo ai: ʻOu te maʻi.’” E oo lava i ē ua maliliu ma o loo manatua e le Atua, ua taʻua e Iesu: “E oo mai le itula e faalogo ai i latou uma o loo i tuugamau i lona leo, ma latou ō mai ai.” (Ioane 5:28, 29) Maʻeu ni folafolaga faamāfanafanaloto!

I le pe tusa o le 17 tausaga talu ona tupu le faalavelave na aafia ai Sidnei lea e taʻua i le amataga, na faapea mai o ia: “Ou te leʻi tuuaʻia lava Ieova le Atua i le mea na tupu, ae ou te taʻutino atu na ou lē fiafia iā te ia i le taimi na faatoʻā tupu ai le faalavelave. E iai aso ou te lagona ai le matuā faanoanoa, ma ou te tagi pe a ou mafaufau i le lē atoatoa o loʻu malosi. Peitaʻi, ua ou iloa mai i le Tusi Paia, o le mea na tupu e lē o se faasalaga mai i le Atua, auā ʻe tutupu faafuaseʻi mea iā i tatou uma i le taimi e leʻi faatalitalia.’ O le tatalo iā Ieova ma le faitau i nisi o mau patino o le Tusi Paia, ua fesoasoani iā te aʻu e malosi faaleagaga ai ma maua pea le fiafia.”—Failauga 9:11; Salamo 145:18; 2 Korinito 4:8, 9, 16.

E tāua ona tāmau i mafaufau māfuaaga ua lē taofia ai e le Atua mafatiaga, ma le auala ua toeitiiti ona ia tafiesea ai lea o nei mea uma. O le faia faapea o le a fesoasoani iā i tatou e foʻia ai ni lagona lē fiafia o loo iai e faatatau i le Atua. Ua faamautinoa mai iā i tatou o le Atua o lē “e na te tauia ē e matuā saʻili iā te ia.” O so o se tasi e faatuatua iā te ia ma lona Alo, e mautinoa o le a faafiafiaina.—Eperu 11:6; Roma 10:11.