Sa ou fanau i Acul, o se nuu maotua i atumauga i sisifo o Kuatemala. O loʻu aiga e tupuga mai i tagata Ixil, o se ituaiga e tupuga mai i tagata Maya. Ou te tautala i le gagana Sipaniolo faapea le gagana a lo matou lava ituaiga. Na fetaui lelei uluaʻi tausaga o loʻu olaga ma le vaitaimi o fetauaʻiga i le va o ituaiga i Kuatemala lava ia, lea sa iai mo le 36 tausaga ma na tele ai faiga sauā. E toʻatele tagata Ixil na maliliu ai i lenā taimi.

I le fā o oʻu tausaga, na ou tauaso ai ina ua pa faafuaseʻi se tamaʻi pomu na taaloalo ai loʻu uso e fitu tausaga. E faanoanoa ona na uma ai le ola o si oʻu uso. Mulimuli ane, sa ou auai i se aʻoga mo tamaiti tauaso i le taulaga o Kuatemala, ma na ou aʻoaʻoina ai le gagana Patupatu (Braille). I le aʻoga, ou te leʻi iloa le māfuaaga na faasā ai e faiaʻoga ona ou talanoa i isi tamaiti, ma sa ʻalofia aʻu e tamaiti. Sa ou lagona i taimi uma le tuua toʻatasi, ma sa ou tulimataʻia masina e lua o tausaga taʻitasi ia e mafai ai ona ou alu i le fale e mafuta ma loʻu tinā, o sē e agalelei ma alofa i taimi uma. E faanoanoa ona na maliu o ia i le sefulu o oʻu tausaga. Sa ou matuā mafatia, ona sa ou manatu e na o le pau lea o le tagata i le lalolagi e alofa iā te aʻu.

I le 11 o oʻu tausaga, na ou toe foʻi ai i loʻu nuu ma nonofo faatasi ma loʻu ʻafa uso ma lona aiga. Sa latou tausia oʻu manaʻoga faaletino, ae e leʻi mafai ona fesoasoani mai iā te aʻu i le itu tau faalogona. O nisi taimi sa ou tagi atu i le Atua: “Aiseā ua oti ai loʻu tinā? Aiseā ua ou tauaso ai?” Sa fai mai tagata ua māfua nei mala ona o le finagalo o le Atua, ma na ou manatu ai e lē alofa mai le Atua ma e faaituʻau. Sa ou fia pule i loʻu ola, ae na pau le māfuaaga ou te leʻi pule ai i loʻu ola ona ou te leʻi maua se auala e faia ai faapea.

Sa ou mafatia i le itu i le tino ma tau faalogona ona o loʻu tulaga o se tauaso. O nisi taimi sa faileagaina aʻu e tagata i le itu taufeusuaʻiga. Ou te leʻi lipotiina nei faiga faasolitulafono ona na ou manatu e leai se isi e amanaʻia aʻu. Sa seāseā talanoa mai tagata iā te aʻu, ma ou te leʻi talanoa foʻi i se tasi. Sa ou mafatia ma ʻalofia le auaufaatasi ma tagata, ma ou te leʻi maufaatuatuaina se tasi.

I le 13 o oʻu tausaga, na ō mai ai se ulugalii Molimau a Ieova ma talanoa mai iā te aʻu a o fai se mālōlōga i le aʻoga. Sa iai se faiaʻoga i laʻu aʻoga na manatu mamafa i loʻu tulaga, ma na ia talosagaina lea ulugalii ina ia asiasi mai iā te aʻu. Sa faailoa mai e le ulugalii le folafolaga a le Tusi Paia e faapea o  le a toetutū mai ē ua maliliu, ma e iai le aso e toe pupula ai ē tauaso. (Isaia 35:5; Ioane 5:28, 29) Sa ou fiafia i mea na la aʻoaʻoina mai, ae sa faigatā ona ou talanoa atu iā i laʻua, ona ou te leʻi masani i le talanoa ma tagata. Peitaʻi, sa la maumauaʻi pea ma le agalelei ma le onosaʻi e asiasi mai ina ia aʻoaʻo aʻu i le Tusi Paia. E silia i le ono maila (10 km) na savavali mai ai lenei ulugalii ma aʻea atumauga ina ia oo mai i le nuu na ou nofo ai.

Sa faamatala mai e loʻu ʻafa uso, o lenei ulugalii e mamā ma lelei o la ofu ae e lē mauʻoa. Peitaʻi, sa la faaalia mai pea le naunau moni iā te aʻu, ma aumai ni nai meaalofa mo aʻu. Sa ou manatu e na o Kerisiano moni lava e faaalia lea ituaiga uiga faataulagaina.

Sa ou suʻesuʻeina le Tusi Paia e ala i le fesoasoani a lomiga i le gagana Patupatu. E ui lava i le itu faalemafaufau sa ou malamalama i mea na ou aʻoaʻoina, ae i le itu taufaalogona, sa iai nisi mea na faigatā ona ou taliaina. O se faaaʻoaʻoga, sa faigatā ona ou talitonu o loo manatu mai le Atua iā te aʻu, pe e mafai e isi ona faaalia mai faalogona o le Atua iā te aʻu. Sa ou malamalama i māfuaaga ua lē taofia ai e Ieova mafatiaga mo se taimi lē tumau, ae sa faigatā ona ou manatu iā te ia o se Tamā e alofa moni. *

O mea na ou aʻoaʻoina mai i le Tusi Paia, sa faasolosolo ona fesoasoani e suia ai oʻu manatu i mea. O se faaaʻoaʻoga, sa ou aʻoaʻoina o loo matuā tigā alofa mai le Atua i ē o loo mafatia. Na fetalai le Atua e faatatau i ona tagata tapuaʻi na sauāina: “Ua ou iloa lava le sauāina o loʻu nuu . . . ua ou iloa puapuaga o loo mafatia ai i latou.” (Esoto 3:7) Ina ua ou talisapaia uiga agaalofa o Ieova, sa uunaʻia ai aʻu e tuuina atu loʻu ola iā te ia. I le 1998, sa ou papatiso ai loa o se Molimau a Ieova.

Pe tusa o le tausaga talu ona ou papatiso, na ou auai ai i se aʻoga mo tagata tauaso, sa faia e lata i le taulaga o Escuintla. Sa iloa e se toeaina i le faapotopotoga i lea vaipanoa, faigatā na feagai ma aʻu i le auai i sauniga a o oʻu nofo ai i lo matou nuu. O le faapotopotoga pito i sili ona lata mai e i le isi itu o atumauga ia sa uia e le ulugalii Molimau lea na faia laʻu suʻesuʻega, ma sa matuā faigatā ona ou oo atu i inā. Ina ia fesoasoani iā te aʻu, na maua e le toeaina se aiga Molimau i Escuintla na malilie ou te alu atu e matou te nonofo faatasi, ma fesoasoani iā te aʻu ina ia auai i sauniga a le faapotopotoga. E oo mai i le asō o loo latou tausia pea aʻu e pei o se tagata o lo latou lava aiga.

E tele faaaʻoaʻoga e mafai ona ou faamatala atu e faatatau i le alofa moni na faaalia mai e tagata o le faapotopotoga iā te aʻu. O nei mea uma ua faamautinoa mai ai, i le avea ai ma Molimau a Ieova, o loo ou aufaatasi ma Kerisiano moni lava.—Ioane 13:34, 35.

Ou te lē o toe lagona le lē aogā ma le leai o se faamoemoe, ae ua tele fuafuaga aogā o loʻu olaga. I le avea ai ma tagata talaʻi faataimi atoa i le galuega tau aʻoaʻoga o le Tusi Paia a Molimau a Ieova, ua ou taulaʻi atu i le aʻoaʻoina o isi i upu moni tāua o le Tusi Paia, nai lo o le taulaʻi atu i mea ua lē mafai ona ou faia. Ua ou maua le faaeaga e auauna o se toeaina i le faapotopotoga, ma faia lauga faale-Tusi Paia i faapotopotoga i le vaipanoa o loo oʻu nofo ai. Ua ou maua foʻi le faaeaga e faia lauga faale-Tusi Paia i tauaofiaga itumalo a Molimau a Ieova, lea e faitau afe tagata e auai ai.

I le 2010, na ou faauu ai mai i le Aʻoga mo Toleniga i le Faiva (lea ua taʻua nei o le Aʻoga mo Tagata Talaʻi o le Malo), sa faia i El Salvador. O lenei aʻoga na sauniunia ai aʻu ina ia faaleleia atili le auala e faatino ai oʻu tiute tauave i le faapotopotoga. O lenei toleniga ua ou lagona ai le matuā tāua ma le alofagia o aʻu e Ieova, o lē e mafai ona faaagavaaina so o se tasi e faia lana galuega.

Na fetalai Iesu: “E sili le fiafia e maua i le foaʻi atu i lo o le talia mai.” (Galuega 20:35) I aso nei, e mafai moni ona ou faapea atu ua ou maua le fiafia. Ua ou iloa nei e mafai ona ou fesoasoani i isi tagata, e ui lava sa ou manatu muamua e lē mafai ona ou faia faapea.