O le Tusi Muamua a Ioane 2:1-29
2 Si aʻu fanau e, ua ou tusi atu nei mea iā te outou ina neʻi outou faia se agasala. Ae afai e faia e se tasi se agasala, ua iā i tatou le fesoasoani* faatasi ma le Tamā, o Iesu Keriso lea,+ o lē e amiotonu.+
2 O ia o le taulaga o le leleiga ma le Atua*+ mo a tatou agasala,+ e lē na o a tatou agasala, ae atoa foʻi ma le lalolagi uma.+
3 O le mea lenei e iloa ai ua tatou iloa o ia, pe afai e faaauau ona tatou tausi i ana poloaʻiga.
4 O lē e faapea ane: “Ua ou iloa o ia,” ae e lē tausi i ana poloaʻiga, o le pepelo o ia, ma e lē o iai le upu moni i totonu o lenā tagata.
5 A o sē e tausi i lana afioga, ua faaalia moni e lea tagata le alofa lelei atoatoa o le Atua.+ O le mea lea e tatou te iloa ai, ua tatou autasi ma ia.+
6 O lē e faapea mai o loo autasi pea ma ia, e tatau foʻi ona faaauau pea ona savali e faapei ona savali o Iesu.+
7 Le ʻaupele e, ou te lē o tusi atu iā te outou i se poloaʻiga fou, a o le poloaʻiga tuai lea na iā te outou mai i le amataga.+ O lenei poloaʻiga tuai, o le upu lea na outou faalogo i ai.
8 Ae ua ou toe tusi atu se poloaʻiga fou iā te outou, o se poloaʻiga na ia mulimuli i ai ma e faapena foʻi ma outou, auā o loo mavae atu le pōuliuli, ae ua susulu mai le malamalama moni.+
9 O lē e faapea mai o loo iai o ia i le malamalama ae ʻinoʻino+ i lona uso, o loo iai pea o ia i le pōuliuli.+
10 O lē e alofa i lona uso e tumau o ia i le malamalama,+ ma e leai se mea o iā te ia e tausuai ai.
11 A o lē e ʻinoʻino i lona uso, o loo iai o ia i le pōuliuli ma o loo savali foʻi i le pōuliuli,+ e lē iloa e ia le mea e alu i ai,+ auā ua faatauasoina ona mata e le pōuliuli.
12 Le fanau e, ua ou tusi atu iā te outou auā ua faamagaloina a outou agasala ona o lona suafa.+
13 O outou tamā e, ua ou tusi atu iā te outou auā ua outou iloa o ia o lē e mai i le amataga. Tauleleʻa e, ua ou tusi atu iā te outou auā ua outou faatoʻilaloina lē o loo leaga.+ Le fanau e, ua ou tusi atu foʻi iā te outou auā ua outou iloa le Tamā.+
14 Ua ou tusi atu iā te outou tamā, auā ua outou iloa o ia, o lē e mai le amataga. Ua ou tusi atu iā te outou tauleleʻa, auā tou te malolosi+ ma ua tumau le afioga a le Atua i totonu iā te outou,+ ma ua outou faatoʻilaloina lē o loo leaga.+
15 Aua le manaʻo i le lalolagi po o mea o iai i le lalolagi.+ Afai e manaʻo se tasi i le lalolagi, e lē o i totonu iā te ia le alofa o le Tamā;+
16 auā o mea uma o i le lalolagi, o tuʻinanauga o le tino,+ ma tuʻinanauga o mata,+ ma le faalialiavale o* meafaitino a se tasi, e lē mai i le Tamā ae e mai i le lalolagi.
17 E mavae atu foʻi le lalolagi faapea ma ona tuʻinanauga,+ a o lē e faia le finagalo o le Atua e tumau e faavavau.+
18 Le fanau e, o le itula mulimuli lenei, ma e pei lava ona outou faalogo e oo mai le anetikeriso,*+ e oo lava i le taimi nei ua toʻatele anetikeriso,*+ o le mea lea ua tatou iloa ai o le itula mulimuli lenei.
19 Na latou ō ese mai iā i tatou, auā e lē o i latou o ni o tatou tagata;+ auā ana o i latou o ni o tatou tagata, semanū e faatasi pea ma i tatou. Ae na ō ese i latou, ina ia faaalia ai e lē o tagata uma o ni o tatou tagata.+
20 Ua faauuina foʻi outou e lē e paia,+ ma ua iloa e outou uma le upu moni.
21 Ua ou tusi atu iā te outou, e lē ona ua outou lē iloa le upu moni,+ ae ona ua outou iloa, ma ona e leai foʻi se pepelo e mai i le upu moni.+
22 O ai le tagata pepelo? Pe e lē o le tagata ea lea ua tetee i le mea moni, o Iesu o le Keriso lea?+ O le anetikeriso* lenei,+ o lē e tetee i le Tamā ma le Alo.
23 O lē e tetee i le Alo e lē autasi o ia ma le Tamā.+ A o lē e taʻutino atu e faatuatua i le Alo,+ ua autasi o ia ma le Tamā.+
24 A o outou, ia tumau pea iā te outou mea na outou faalogo ai mai i le amataga.+ Auā afai e tumau iā te outou mea na outou faalogo ai mai i le amataga, e tou te autasi ai pea ma le Alo, atoa foʻi ma le Tamā.
25 O le mea foʻi lenei na ia folafola mai iā i tatou, o le ola lea e faavavau.+
26 Ua ou tusi atu nei mea iā te outou e faatatau i ē o loo taumafai e taʻitaʻisesēina outou.
27 A o outou, ua faauuina outou e le Atua i lona agaga+ ma ua tumau iā te outou lenā agaga, e tou te lē o toe manaʻomia ai se tasi e aʻoaʻo atu iā te outou; a o le faauuina o outou e ia o loo aʻoaʻoina outou i mea uma,+ e moni ma e lē pepelo lava. E pei ona aʻoaʻoina outou, ia tumau ai ona outou autasi ma ia.+
28 Le fanau e, ia autasi pea ma ia, ina ia tatou saʻoloto e tautatala atu+ pe a faaali mai o ia, ma ia lē ō ese ai ma le māsiasi mai iā te ia i lona faatasi mai.
29 Afai ua outou iloa e amiotonu o ia, ua outou iloa foʻi ua fananau mai iā te ia o ē uma ua faia le amiotonu.+
Faamatalaga Pito i Lalo
^ Po o le “faufautua.”
^ Po o le “taulaga o le togisala.”
^ Po o le “gugutu e faatatau i.”
^ E faasino atu i lē e tetee iā Keriso.
^ E faasino atu i ē e tetee iā Keriso.
^ E faasino atu i lē e tetee iā Keriso.
