O le Tusi Muamua o Samuelu 23:1-29
23 Mulimuli ane, ua latou taʻu atu iā Tavita e faapea: “Ua ō mai Filisitia e tau ma Kaila,+ ma ua latou faoa saito mai i le mea e soli ai saito.”
2 Ona fesili atu lea o Tavita iā Ieova:+ “Po ou te alu atu ea e fasia na Filisitia?” Ua tali mai Ieova iā Tavita: “Inā alu ia e fasi Filisitia, ma e lavea‘i iā Kaila.”
3 Ua fai mai tagata o Tavita iā te ia: “Faauta! Ua tatou fefefe a o iai i nei i Iuta,+ e sili atu la ona tatou fefefe pe a tatou ō atu i Kaila, e tau ma itu taua a Filisitia!”+
4 Ua toe fesili atu foʻi Tavita iā Ieova.+ Ona tali mai lea o Ieova iā te ia e faapea: “Inā tulaʻi ia ma alu ifo i Kaila, auā ou te tuuina atu Filisitia i lou lima.”+
5 Ua ō atu Tavita ma ona tagata i Kaila, ua tau ma Filisitia, ua ia faoa foʻi a latou lafumanu ma fasia i latou i le fasiga tele, ma ua lavea‘ia e Tavita ē o loo nonofo i Kaila.+
6 Ina ua sola atu Aviata+ le atalii o Aimeleka iā Tavita i Kaila, sa iai se efota i lona lima.
7 Ua taʻu atu iā Saulo e faapea: “Ua alu atu Tavita i Kaila.” Ona faapea lea o Saulo: “Ua tuuina mai e le Atua o ia iā te a‘u,*+ auā ua ia maileia o ia lava i lona alu atu i se aai e iai faitotoʻa ma faamaufaalava.”
8 Ona aami lea e Saulo o le nuu uma ina ia ō e tau, ia ō ifo i Kaila e osofaʻia Tavita ma ona tagata.
9 Ina ua iloa e Tavita o loo faufau Saulo e faia se mea leaga iā te ia, ona ia fai atu lea iā Aviata le ositaulaga: “Aumai i inei le efota.”+
10 Ona fai atu lea o Tavita: “Ieova e, le Atua o Isaraelu, ua faalogo lava lau auauna ua fuafua Saulo e sau i Kaila, e faaumatia le aai ona o aʻu.+
11 Pe e tuuina atu ea aʻu e taʻitaʻi* o Kaila i lona lima? Pe e alu ifo ea Saulo e pei ona faalogo i ai lau auauna? Ieova e, le Atua o Isaraelu, ia taʻu mai i lau auauna faamolemole.” Ona fetalai mai lea o Ieova: “E alu ifo lava o ia.”
12 Ua fai atu Tavita: “Pe e tuuina atu ea aʻu ma oʻu tagata e taʻitaʻi o Kaila i lima o Saulo?” Ona fetalai mai lea o Ieova: “E latou te tuuina atu lava outou.”
13 Ona tulaʻi loa lea o Tavita ma ona tagata e tusa ma le toʻa 600 tane,+ ma ō ese mai i Kaila, ua latou ō atu i so o se mea e mafai ona oo i ai. Ina ua taʻu atu iā Saulo ua sola ese Tavita mai i Kaila, ona ia lē toe alu atu ai lea.
14 Ua nofo Tavita i le toafa i nofoaga e faigatā ona sao i ai se tasi, i le vaega maugā o le toafa o Sifi.+ Ua faaauau ona saʻili Saulo iā te ia,+ ae e leʻi tuuina atu o ia e Ieova i lona lima.
15 Ua iloa e Tavita* ua saʻili Saulo e fasiotia o ia, a o iai Tavita i le toafa o Sifi i Horesa.
16 Ua tulaʻi Ionatana le atalii o Saulo ma alu atu iā Tavita i Horesa, ma fesoasoani iā te ia ina ia faamalosia lona maufaatuatuaina o Ieova.+
17 Ua fai mai Ionatana iā te ia: “Aua e te fefe; auā e lē maua oe e loʻu tamā o Saulo, e avea lava oe ma tupu o Isaraelu,+ o aʻu foʻi ou te pito atu iā te oe; ua iloa lava e Saulo loʻu tamā lenā mea.”+
18 Ona la osia lea o se feagaiga i luma+ o Ieova, ma ua nofo pea Tavita i Horesa, ae ua alu Ionatana i lona fale.
19 Mulimuli ane, ona ō aʻe ai lea o tagata o Sifi iā Saulo i Kipea,+ ua faapea atu: “Pe e lē o lafi ea Tavita e latalata ane iā i matou,+ i nofoaga e faigatā ona sao i ai se tasi i Horesa,+ i le aʻega o Hakila+ o loo i le itu i saute* o Iesimoni?*+
20 O lenei, le tupu e, po o le ā lava le taimi e te finagalo e te maliu ifo ai, ona e maliu ifo lea ma e matou te tuuina atu o ia i le lima o le tupu.”+
21 Ona fai mai lea o Saulo: “Ia faamanuia Ieova iā te outou, auā ua outou alolofa mutimutivale iā te aʻu.
22 Faamolemole, inā ō ia ma taumafai e faamautinoa le mea tonu o loo iai o ia, ma po o ai na vaai iā te ia i inā, auā ua faailoa mai iā te aʻu, o ia o se tagata e faitogafiti poto.
23 Ia faamautinoa lelei nofoaga uma e lafi ai o ia; ona outou foʻi mai lea iā te aʻu ma faamaoniga, ona tatou ō faatasi lea; afai e iai o ia i le nuu, ou te matuā saʻili iā te ia i le faitau afe o tagata o Iuta.”
24 Ona latou tutulaʻi lea ma ō atu i Sifi+ e muamua atu iā Saulo, a o Tavita ma ona tagata, o loo iai i le toafa o Meona+ i Arapa,*+ i le itu i saute o Iesimoni.
25 Ua ō atu Saulo ma ona tagata e saʻili iā te ia.+ Ina ua latou taʻu atu iā Tavita, ona alu ifo vave ai lea o ia i le papa+ ma nofo ai pea i le toafa o Meona. Ina ua faalogo i ai Saulo, ona alu atu lea o ia e tuliloa iā Tavita i le toafa o Meona.
26 Ua alu atu Saulo i le tasi itu o le mauga, a o iai Tavita ma ona tagata i le isi itu o le mauga. Ona alu ese faavave lea+ o Tavita ona o Saulo; a o le taimi lenā ua lalata atu Saulo ma ona tagata iā Tavita ma ona tagata, ina ia pu‘ea i latou.+
27 Ae ua sau se avefeʻau iā Saulo, ua faapea mai: “Ia e vave sau, auā ua osofaʻia e Filisitia le nuu!”
28 Ona toe foʻi lea o Saulo mai i le tuliloaina o Tavita,+ ae ua alu atu e faafetaiaʻi iā Filisitia. O le mea lea ua faaigoa ai lea nofoaga, o le Papa o le Tuueseesega.
29 Ua alu aʻe Tavita mai i inā, ma nofo i nofoaga e faigatā ona sao i ai se tasi i Enokati.+
Faamatalaga Pito i Lalo
^ Epe., “Ua faatauina mai o ia e le Atua i loʻu lima.”
^ Pe atonu “ē e ona fanua.”
^ Pe atonu “Ua fefe Tavita auā.”
^ Epe., “itu taumatau.”
^ Pe atonu “o le toafa.”
^ Po o “i le fanua laugatasi o le toafa.”
