O le Tusi Muamua o Tupu 17:1-24
17 Ua fai atu Elia*+ le tagata Tisepi, o sē e mai i Kiliata,+ iā Aapo: “Ou te tautō iā Ieova le Atua soifua o Isaraelu, o lē o loo ou auauna ai,* o le a leai se sau po o se timu i nei tausaga, seʻi vaganā lava ua ou fai atu ai!”+
2 Ona oo mai lea o le afioga a Ieova iā Elia, e faapea:
3 “Inā alu ia, ma e agaʻi atu i le itu i sasaʻe ma lafi ai i le vanu o Kirita,* i le itu i sasaʻe o Ioritana.
4 E te inu mai i le vaitafe, ma ou te poloaʻi atu foʻi i manulele o oreva e avatu meaʻai iā te oe i inā.”+
5 Ona alu loa lea o ia ma faia e tusa ma le afioga a Ieova, ua ia alu ma nofo i le vanu o Kirita,* i le itu i sasaʻe o Ioritana.
6 Ua aumai e oreva iā te ia o falaoa ma aano o manu i le taeao, o falaoa ma aano o manu i le afiafi, ma ua inu foʻi o ia mai i le vaitafe.+
7 Ae ina ua mavae ni nai aso, ona mātūtū ai lea o le vaitafe,+ auā e leʻi iai se timu i le laueleele.
8 Ua oo mai le afioga a Ieova iā te ia, e faapea:
9 “Inā tulaʻi ia, ma alu atu i Sarefata o le aai o Saitonu, ma e nofo ai i inā. Faauta! ou te poloaʻi atu i se fafine ua oti lana tane o i inā, e saunia meaʻai mo oe.”+
10 Ona tulaʻi lea o ia ma alu atu i Sarefata. Ina ua oo atu i le faitotoʻa o le aai, o loo iai se fafine ua oti lana tane, o loo fai fafie. Ua valaau atu o ia i le fafine, ma faapea atu: “Faamolemole, inā aumai ia sina ipu vai seʻi oʻu inu ai.”+
11 Ae ina ua alu o ia e aumai se ipu vai, ona valaau atu lea o Elia iā te ia: “Faamolemole, seʻi uu mai lava ma se fasi falaoa ma aʻu.”
12 Ona ia faapea mai lea: “Ou te tautō iā Ieova le Atua soifua, e leai saʻu falaoa, ua na o se luuga o falaoamata o loo i le fagu lapoʻa, ma sina suāuu o loo i le fagu laʻitiiti.+ O lea ou te sau e fai atu ni nai fafie, e sauni ai se mea mo i maʻua ma laʻu tama. Pe a uma ona ma aai, ona ma feoti ai lea.”
13 Ona fai atu lea o Elia iā te ia: “Aua e te fefe. Inā alu ia ma fai e tusa ma lau upu. Ae muamua lava, ia e faia se tamaʻi falaoa lapotopoto mo aʻu i mea o iai, ma aumai iā te aʻu. Ona e faia lea o se mea mo oe ma lau tama.
14 Auā o le mea lenei ua fetalai mai ai Ieova le Atua o Isaraelu: ‘E lē uma le falaoamata i le fagu lapoʻa, e lē faaitiitia foʻi le suāuu i le fagu laʻitiiti, seʻia oo i le aso e faatotō ifo ai e Ieova le timu i le laueleele.’”+
15 Ona alu lea o ia ma faia e tusa ma upu a Elia, ma ua aai o ia faatasi ma Elia, ma lona aiga, mo aso e tele.+
16 E leʻi uma lava le falaoamata i le fagu lapoʻa, e leʻi faaitiitia foʻi le suāuu i le fagu laʻitiiti, e tusa ai ma le afioga a Ieova na ia fetalai atu ai e ala iā Elia.
17 Ina ua mavae nei mea, ona maʻi ai lea o le tama a le fafine e ana le fale, ua matuā tigāina lava lona maʻi, ma ua oti ai.*+
18 Ona ia fai mai lea iā Elia: “Le tagata e, o le Atua moni, o le ā sa‘u mea ua fai iā te oe? Po ua e sau ea e faamanatu mai aʻu mea sesē, ma faaoo le oti i laʻu tama?”+
19 Ae ua ia fai atu iā te ia: “Aumai lau tama iā te aʻu.” Ona aumai lea e Elia o le tama mai i le fatafata o le fafine, ma ave aʻe o ia i le potu pito i luga lea e nofo ai, ma ua ia faataoto i lona moega le tama.+
20 Ona ia valaau atu lea iā Ieova e faapea: “Ieova e, loʻu Atua,+ po ua e faatigā ea foʻi i lenei fafine ua oti lana tane, o lē o loo ou aumau ai, e ala i le faaoo o le oti i lana tama?”
21 Ona ia faō faatolu lea i luga o le tamaitiiti ma valaau atu iā Ieova e faapea: “Ieova e, loʻu Atua, faamolemole ia e toe faafoʻisia mai le ola o lenei tamaitiiti.”
22 Ua faafofoga Ieova i le talosaga a Elia,+ ma ua toe faafoʻisia ai le ola o le tamaitiiti, ma ua ola ai.+
23 Ona ave ifo lea e Elia o le tamaitiiti mai i le potu pito i luga o le fale ma tuu atu o ia i lona tinā; ua faapea atu Elia: “Vaai, ua ola lau tama.”+
24 Ua fai mai le fafine iā Elia: “O lenei, ua ou iloa o oe lava o le tagata o le Atua,+ ma e moni foʻi le afioga a Ieova ua e fai mai ai.”
Faamatalaga Pito i Lalo
^ Lona uiga “O Ieova o Loʻu Atua.”
^ Epe., “o loo ou tū ai i ona luma.”
^ Po o le “ālia o Kirita.”
^ Po o le “ālia o Kirita.”
^ Epe., “ua lē toe iai se mānava iā te ia.”
