O le Tusi Muamua o Tupu 9:1-28
9 Ina ua uma ona faia e Solomona le fale o Ieova ma le fale o le tupu,+ ma mea uma na finagalo Solomona e fai,+
2 ona faaali mai lea o Ieova iā Solomona i le taimi lona lua, e pei foʻi ona ia faaali mai iā Solomona i Kipeona.+
3 Ua fetalai mai Ieova iā te ia: “Ua ou faalogo i lau tatalo ma lau talosaga na e ʻaiʻoi mai ai i oʻu luma. Ua ou faapaiaina lenei fale na e faia, i le tuuina i ai o loʻu igoa i inā+ i aso uma lava, ma e lē aunoa ona faasaga i ai oʻu mata ma loʻu loto i inā.+
4 Afai foʻi e te savali i oʻu luma e pei ona savali o Tavita lou tamā,+ ma le lotofaamaoni,+ ma le amio saʻo+ i le faia e tusa ma mea uma na ou poloaʻi atu ai iā te oe,+ ma e tausia aʻu tulafono ma iʻuga o aʻu faamasinoga,+
5 ona ou faatumauina lea o le nofoālii o lou malo o Isaraelu e faavavau, e pei ona ou folafola atu iā Tavita lou tamā, e faapea, ‘E lē motu lou gafa mai i le nofoālii o Isaraelu.’+
6 Ae afai tou te liliuese ma lau fanau mai i le mulimuli mai iā te aʻu, ma outou lē tausia aʻu poloaʻiga ma aʻu tulafono na ou tuu atu i o outou luma, ma outou ō atu ma auauna i isi atua ma ifo atu i ai,+
7 o le a ou faaumatia Isaraelu mai i le laueleele na ou foaʻi atu iā i latou.+ Ou te lafoa‘ia ese foʻi mai i o‘u luma le fale na ou faapaiaina mo loʻu igoa,+ ma e avea Isaraelu o se mea e inosia* ma e tauemu i ai nuu uma lava.+
8 E avea foʻi lenei fale ma faaputuga o mea ua faatafunaina.+ O i latou uma e ui ane ai o le a taufaiofo ma faaʻamuʻamu, ma faapea ane, ‘Aiseā ua faia ai faapea e Ieova lenei laueleele ma lenei fale?’+
9 Ona latou faapea ane lea, ‘Auā ua latou tuua Ieova lo latou Atua, o lē na aumaia o latou augātamā mai i le nuu o Aikupito, ma ua latou pipii atu i isi atua, ua ifo atu i ai ma auauna i ai. O le mea lea ua aumaia ai e Ieova nei mala uma iā i latou.’”+
10 E 20 tausaga na faia ai e Solomona fale e lua, o le fale o Ieova ma le fale o le tupu.+
11 Na aumaia e Hiramo+ le tupu o Turo iā Solomona o laupapa arasi, o laupapa perosi, ma le matuā tele o le auro e tusa ma le mea na finagalo i ai Solomona.+ Ina ua uma, ona avatu lea e le tupu o Solomona iā Hiramo, o aai e 20 i le nuu o Kalilaia.
12 Ona sau ai lea o Hiramo mai i Turo e vaavaai i aai na avatu e Solomona iā te ia, ae e leʻi faamalieina ai o ia.*
13 Ua ia faapea mai: “Loʻu uso e, o ā nei ituaiga aai ua e aumaia iā te aʻu?” Ona faaigoa lea o nei aai, o le Nuu o Kapula* e oo mai i aso nei.
14 Ua aumai foʻi e Hiramo i le tupu o taleni* auro+ e 120.
15 O le tala lenei iā i latou na faatonuina e le tupu o Solomona e faia galuega mamafa+ i le fausiaina o le fale o Ieova,+ o lona fale, o le Mea Maupuʻepuʻe,*+ o le pā o Ierusalema, o Hasora,+ o Mekito,+ ma Kasera.+
16 (Ua alu aʻe Farao le tupu o Aikupito ma faoa Kasera, ma susunu i le afi, ua ia fasiotia foʻi tagata Kanana+ na nonofo i le aai. Ua ia foaʻi atu le aai e fai ma meaalofa e faamavae ai* i lona afafine,+ le avā a Solomona.)
17 Ua toe fausia e Solomona o Kasera, o Pete-orana i lalo,+
18 o Paalata,+ o Tamara i le toafa, i le nuu o Isaraelu,*
19 o aai uma o Solomona e teu ai oloa, o aai o kariota,+ o aai mo tagata tiʻetiʻe solofanua, o mea uma ua finagalo i ai Solomona e fausia i Ierusalema ma Lepanona, ma nuu uma na pule ai o ia.
20 A o tagata uma na totoe mai i tagata Amorī, o tagata Hetī, o tagata Perisē, o tagata Hivī, ma tagata Iepusē+ o ē e lē o ni fanauga a Isaraelu,+
21 o a latou fanau na totoe i le nuu, o ē e leʻi faaumatia e le fanauga a Isaraelu, na faatonuina e Solomona e faia galuega mamafa o ni pologa seʻia oo mai i le aso nei.+
22 Ae ua lē faia e Solomona se tasi o le fanauga a Isaraelu ma pologa,+ auā o i latou o ana tagata tau, o auauna, o alii sili, o alii ave ʻau, ma alii e pule i ana kariota ma tagata tiʻetiʻe solofanua.
23 E toʻa 550 alii na pule i pule lagolago na tofia e vaavaaia le galuega a Solomona, o fomeni na vaavaaia tagata na faia le galuega.+
24 Ae ua alu aʻe le afafine o Farao+ mai i le Aai a Tavita+ i lona lava fale, na faia e Solomona mo ia. O le taimi foʻi lenā na faia ai e Solomona le Mea Maupuʻepuʻe.*+
25 E faatolu i le tausaga+ ona faia e Solomona o taulaga mū ma taulaga faifaatasi, i luga o le fata faitaulaga na ia faia mo Ieova,+ ma faamū taulaga i le fata faitaulaga lea na i luma o Ieova; ua ia faaumaina foʻi le fale.+
26 Sa faia foʻi e le tupu o Solomona le tele o vaa i Esiokape,+ lea e lata ane i Elata, i le matafaga o le Sami Ulaula i le nuu o Etoma.+
27 Ua aauina atu e Hiramo ana auauna, o ni tautai e masani lelei i le sami, e auauna i vaa faatasi ma auauna a Solomona.+
28 Ua latou ō atu i Ofeira+ ma aumai mai i inā o taleni auro e 420, ma aumai i le tupu o Solomona.
Faamatalaga Pito i Lalo
^ Epe., “se upu faatusa.”
^ Epe., “e leʻi talafeagai aai i lana vaai.”
^ Pe atonu “le Laueleele e Leai se Aogā.”
^ Po o le “Milo.” O se upu Eperu o lona uiga o le “faatumu.”
^ Po o le “meaalofa o le faaipoipoga.”
^ Epe., “i le nuu.”
^ Po o le “Milo.” O se upu Eperu o lona uiga o le “faatumu.”
