O le Tusi Lona Lua i le Faapotopotoga i Korinito 5:1-21
5 Auā ua tatou iloa, pe a lepetia lo tatou fale i le lalolagi, o le faleʻie lea,+ o le a tatou maua se fale i le lagi e faavavau e mai le Atua, o se fale e leʻi fausiaina e lima.+
2 Auā o le mea moni ua tatou ōi i lenei fale, ma matuā naunau atu e oofu i lo tatou fale e mai i le lagi,*+
3 o lea la, pe a tatou oofu ai, e lē maua i tatou ua lē lavalavā.
4 O i tatou o loo i lenei faleʻie, ua feoi ma mafatia, auā tatou te lē fia toesea lenei ofu ae oofu i le isi,+ ina ia suia ai le tino e mafai ona oti i le ola.+
5 O lē ua saunia i tatou mo lenei mea o le Atua lea,+ o lē ua foaʻi mai iā i tatou le agaga e fai ma faamaoniga o le mea o le a oo mai.*+
6 O le mea lea ua lē aunoa ai ona tatou lototetele ma iloa, a o tatou nonofo i le tino,* e tatou te lē o faatasi ma le Alii,+
7 auā ua tatou savavali ona o le faatuatua, ae e lē o mea e vaaia.
8 O le mea lea ua tatou lototetele ai ma e sili atu iā i tatou le lē nonofo i lenei tino, ae ia nonofo faatasi ma le Alii.+
9 O lea la, e tusa pe e tatou te nonofo faatasi ma ia pe leai, ae e tatou te tausinio ina ia finagalo malie mai pea o ia iā i tatou.
10 Auā e tatau iā i tatou uma ona tutū* i luma o le nofoa faamasino o le Keriso, ina ia taʻitoʻatasi le tagata ma maua lona taui e tusa ma mea na ia faia a o iai i le tino, pe e lelei pe e leaga.+
11 O lea la, ona ua matou iloa le mataʻu i le Alii, ua matou taumafai ai pea e faatalitonu tagata iā i matou, ae ua silafia lelei i matou e le Atua.* Peitaʻi, ou te faamoemoe foʻi ua iloa lelei* i matou i o outou lotofuatiaifo.
12 E matou te lē o toe taʻuleleia i matou lava iā te outou, ae ua matou tuuina atu se mea tou te mitamita ai iā i matou, ina ia mafai ona outou tali atu i ē e mitamita ona o foliga vaaia o mea,+ ae e lē o le loto.
13 Auā afai ua matou vālea,+ ua faia faapea ona o le Atua; ae afai ua matou atamamai, ua faia faapea ona o outou.
14 Auā ua uunaʻia i matou ona o le alofa o le Keriso, ma o lo matou manatu lenei: e toʻatasi lē na maliu mo tagata uma,+ talu ai ua feoti uma.
15 Na maliu foʻi o ia mo tagata uma, ina ia lē toe ola i latou mo i latou lava,+ ae ia ola mo ia o lē na maliu mo i latou ma toe faatūina mai.
16 E amata atu nei ona matou lē toe iloaina se tagata e tusa ai ma le vaaiga faaletagata.*+ E tusa foʻi pe na matou iloaina Keriso i la le tino, ae o le mea moni matou te lē toe iloa o ia faapena.+
17 O lea, afai e autasi se tasi ma Keriso, o ia o le foafoaga fou;+ ua mavae atu mea tuai; faauta! ua oo mai mea fou.
18 Ae e mai i le Atua mea uma lava, o lē na toe faaleleia i matou ma ia e ala iā Keriso,+ ma ua ia tuuina mai iā i matou le faiva o le leleiga,+
19 o lona uiga, ua toe faaleleia e le Atua le lalolagi ma ia e ala iā Keriso,+ ua lē taʻua iā i latou a latou agasala,+ ae ua ia tuuina mai iā i matou le feʻau o le leleiga.+
20 O lea la, o i matou o sāvali+ o sui o Keriso,+ e peiseaʻī o loo ʻaiʻoi mai le Atua e ala iā i matou. O i matou o ē ua fai ma sui o Keriso, ua matou ōle atu: “Ia outou toe lelei ma le Atua.”
21 O lē na lē iloa le agasala,+ na fai o ia ma agasala* mo i tatou, ina ia avea ai i tatou ma amiotonu a le Atua e ala iā te ia.+
Faamatalaga Pito i Lalo
^ Po o le “e oofu i le mea e tatou te nonofo ai i le lagi.”
^ Po o le “uluaʻi totogi.”
^ Ele., “a o tatou nonofo i le fale i o tatou tino.”
^ Po o le “faailoa atu.”
^ Po o le “faailoa atu i matou i le Atua.”
^ Po o le “faailoa atu.”
^ Ele., “se tagata i la le tino.”
^ Po o le “taulaga o agasala.”
