O le Tusi Lona Lua o Samuelu 15:1-37
15 Ua mavae ia mea, ona faia lea e Apisaloma o se kariota mo ia, atoa ma solofanua, ma tagata e toʻa 50 e taufetuli i ona luma.+
2 E usupō Apisaloma ma tū i le tasi itu o le auala e agaʻi i le faitotoʻa o le aai.+ O so o se tagata e sau i le tupu e faia sana faamasinoga,+ e valaau atu Apisaloma iā te ia ma faapea atu: “O fea le aai e te sau ai?” Ona tali mai lea o ia: “E sau lau auauna mai i se tasi o ituaiga o Isaraelu.”
3 Ona fai atu lea o Apisaloma iā te ia: “Vaai, e lelei ma tonu lau mataupu; ae e leʻi tofia e le tupu se tasi ina ia faalogologo i lau mataupu.”
4 E faapea atu Apisaloma: “Maʻimau pe ana tofia aʻu e fai ma faamasino i le nuu. Ona sau ai lea iā te aʻu o so o se tasi e iai sana mataupu po o se faamasinoga, ma ou te faamautinoa e faamasinoina ma le tonu o ia.”
5 Pe a faalatalata mai foʻi se tagata e ifo iā Apisaloma, ona aapa atu lea o lona lima, ua tago atu ma sogi iā te ia.+
6 Sa faia pea e Apisaloma o lenei mea i tagata uma o Isaraelu, o ē na ō ane i le tupu mo se faamasinoga; ua faaauau foʻi ona faaliliuina atu e Apisaloma iā te ia o loto o tagata Isaraelu.+
7 Ua mavae tausaga e fā,* ona fai mai lea o Apisaloma i le tupu: “Seʻi tuu mai aʻu ou te alu i Heperona+ e faataunuu laʻu tautoga, na ou tautō ai iā Ieova.
8 Auā na faia e lau auauna se tautoga+ a o oʻu nofo i Kasuri+ i Suria, e faapea: ‘Afai e toe faafoʻi aʻu e Ieova i Ierusalema, o le a ou ofoina atu se taulaga* iā Ieova.’”
9 Ua faapea atu le tupu iā te ia: “Inā alu ia ma le filemu.” Ona tulaʻi lea o ia ma alu atu i Heperona.
10 Ona aauina atu lea e Apisaloma o sipai i ituaiga uma o Isaraelu, ua faapea atu: “A outou faalogo loa i le leo o le pū, ia outou faapea ane, ‘Ua fai Apisaloma ma tupu i Heperona!’”+
11 Ua ō faatasi Apisaloma ma tagata e toʻa 200 mai i Ierusalema; na valaauliaina i latou, ma ua ō ma le faamaoni e aunoa ma le iloaina o se mea.
12 A o ia ofoina atu taulaga, na aami e Apisaloma o Aitofele+ le tagata Kilo, o le faufautua a Tavita,+ mai i lona aai o Kilo.+ Ua faateteleina le fouvalega, ua faaauau foʻi ona toʻatele+ o ē ua ʻau iā Apisaloma.
13 Mulimuli ane, ua alu atu se tagata ma taʻu atu iā Tavita, e faapea: “Ua liliu atu iā Apisaloma loto o tagata o Isaraelu.”
14 Ona fai atu lea o Tavita i ana auauna uma sa iā te ia i Ierusalema: “Inā tulaʻi ia ma tatou sosola ese;+ auā o le a leai se mea e tatou te ʻalo i ai ona o Apisaloma! Ia faavave, ina neʻi vave mai o ia ma maua mai i tatou, ma faaoo mai se mea leaga iā i tatou, ma fasia le aai i le pelu!”+
15 Ua fai mai auauna a le tupu iā te ia: “O mea uma lava e finagalo i ai lo matou alii le tupu, e faia lava e au auauna.”+
16 Ona ō lea o le tupu ma lona aiga uma o loo mulimuli atu iā te ia, ae ua tuua e le tupu o palake e toʻasefulu+ e leoleoina le fale.
17 Ua ō atu le tupu i lona ala ma tagata uma o loo mulimuli atu iā te ia; ua latou mālōlō i Pete-meaka.
18 O ana auauna uma na ō ma ia, faapea ma tagata Kereti uma, o tagata Peleti+ uma, ma tagata Kata+ uma e toʻa 600 na mulimuli atu iā te ia mai i Kata,+ na latou ui ane uma i luma o le tupu a o vaavaai atu o ia po o iai se isi e lē o iai.
19 Ona fai atu lea o le tupu iā Itai+ le tagata Kata: “Aiseā e te alu ai ma i matou? Toe foʻi ia ma nonofo ma le tupu fou; auā o oe o le tagata ese, na e sola ese foʻi mai i lou nuu.
20 Na e sau ananafi, ae po o le a e fealuaʻi solo ea faatasi ma i matou, ma alu atu i le mea ou te alu i ai i le asō? Inā toe foʻi ia ma ave ou uso faatasi ma oe, ia alofa faamaoni ma maufaatuatuaina oe e Ieova!”+
21 Ae ua tali mai Itai i le tupu: “Ou te tautō iā Ieova le Atua soifua ma loʻu alii le tupu o lē o loo soifua, po o fea lava e iai loʻu alii le tupu, po o le oti po o le ola, o i inā lava e iai lau auauna!”+
22 Ona fai atu lea o Tavita iā Itai:+ “Inā alu ia ma sopoʻia le vanu.” Ona sopo atu lea o Itai le tagata Kata, faapea ma ona tagata uma ma tamaiti uma.
23 Ua fetagisi leotetele le toʻatele o tagata, a o sopo atu tagata uma o le tupu. Ua tū foʻi le tupu i tafatafa o le vanu o Ketarono,+ ma ua sopo atu ona tagata uma i le auala e agaʻi atu i le toafa.
24 Na iai foʻi i inā Satoka,+ ma sa faatasi ma ia o sa Levī+ uma o loo aveina le atolaau+ o le feagaiga a le Atua moni;+ ua latou tuu foʻi i lalo le Atolaau a le Atua moni; sa iai foʻi i inā Aviata,+ a o sopo atu tagata uma mai i le aai.
25 Ae ua fai mai le tupu iā Satoka: “Inā toe ave ia le Atolaau a le Atua moni i le aai.+ Afai e finagalo malie Ieova iā te aʻu, e na te toe aumaia lava aʻu, ma ou vaai i ai, atoa ma le mea e tuu ai.+
26 Ae afai e faapea mai o ia, ‘Ou te lē fiafia iā te oe,’ ona ia faia lea iā te aʻu e faapei ona finagalo i ai o ia.”
27 Ua faapea mai le tupu iā Satoka le ositaulaga: “Pe e lē o oe ea o le tagata e iloa faaaliga?+ Inā toe foʻi atu ia ma le filemu i le aai faatasi ma Aviata, atoa foʻi ma Aimaasu lou atalii, ma Ionatana+ le atalii o Aviata.
28 Vaai, ou te faatalitali pea i tala ane o vaega e sopoʻia ai le vaitafe* o Ioritana, seʻia oo mai se tala mai iā te outou e faailoa mai ai iā te aʻu.”+
29 Ona toe ave lea e Satoka ma Aviata le Atolaau a le Atua moni i Ierusalema, ma la nonofo ai pea i inā.
30 Ua alu aʻe Tavita i le mauga* o Olive,+ o loo alu aʻe ma tagi, ua ufiufi lona ulu, ma ua savali e leai ni ona seevae. O tagata uma foʻi na iā te ia, ua taʻitasi ma ufiufi i lona ulu, ua ō aʻe ma fetagisi.
31 Ua oo mai le tala iā Tavita e faapea: “Ua ʻau faatasi Aitofele ma i latou ua fouvale+ ma Apisaloma.”+ Ona faapea atu lea o Tavita: “Faamolemole Ieova e,+ ia faalēaogāina le fautuaga+ a Aitofele!”
32 Ina ua alu atu Tavita i le tumutumu o le mauga i le mea na masani ona ifo ai tagata i le Atua, ona fetaiaʻi ai lea o ia ma Usai+ le tagata Araki,+ ua saeia lona ofu talaloa, ma o loo iai foʻi efuefu i lona ulu.
33 Ae ua fai atu Tavita iā te ia: “Afai e ta te ō faatasi, o le a fai oe ma avega mamafa iā te aʻu.
34 Ae afai e te foʻi atu i le aai, ma fai atu iā Apisaloma, ‘Le tupu e, o aʻu o lau auauna. Sa ou auauna i lou tamā i aso ua mavae, a o lenei, ou te auauna iā te oe.’+ Ona e faalēaogāina ai lea o le fautuaga a Aitofele mo aʻu.+
35 Pe e lē o iā te oe ea ositaulaga o Satoka ma Aviata? O mea uma e te faalogo i ai mai i le aiga o le tupu,+ ia e taʻu atu i ositaulaga o Satoka ma Aviata.
36 Faauta! O loo iā i laʻua o la atalii e toʻalua, o Aimaasu+ le atalii o Satoka, ma Ionatana+ le atalii o Aviata; ia outou aauina mai iā te aʻu e ala iā i laʻua, o tala uma tou te faalogo i ai.”
37 Ona alu lea o Usai le uō a Tavita+ i le aai, ma o le taimi lea ua alu atu ai foʻi Apisaloma i Ierusalema.
Faamatalaga Pito i Lalo
^ Pe atonu “tausaga e 40.” Atonu o le 40 tausaga talu ona faauuina Tavita, e pei ona ta‘ua i le 1Sa 16:13.
^ Po o le “tapuaʻi.” Epe., “faia se auaunaga.”
^ Po o le “o asaga.”
^ Po o le “aʻega.”
