O le Tusi Lona Lua o Tupu 25:1-30
25 O le tausaga lona iva o le nofoaiga a Setekaia, i le masina lona sefulu, o le aso lona sefulu o le masina, na ō mai ai Nepukanesa+ le tupu o Papelonia ma lana ʻautau uma e siitaua iā Ierusalema.+ Ua tolauapi o ia ma ati se pā e siʻo faataamilo ai le aai,+
2 ma ua siʻomia pea le aai seʻia oo i le tausaga lona 11 o le nofoaiga a le tupu o Setekaia.
3 O le aso lona iva o le masina lona fā, na matuā tetele ai le oge+ i le aai, ua leai foʻi ni meaʻai mo tagata o le nuu.+
4 Ua faaleagaina le pā o le aai,+ ona sosola ai lea o fitafita uma i le pō e ui atu i le faitotoʻa, i le vā o pā e lua e lata i le togālaau a le tupu, a o siʻomia faataamilo e ʻau a Kaletaia le aai; ua alu atu foʻi le tupu o Setekaia i le ala i Arapa.*+
5 Ua tuliloa e le ʻautau a Kaletaia le tupu, ma ua latou maua atu o ia i fanua laugatasi o le toafa o Ieriko, ua taapeape foʻi lana ʻautau uma sa iā te ia.
6 Ua latou puʻeina le tupu+ ma avatu o ia i le tupu o Papelonia i Ripelu, ona latou faamasinoina lea o ia.
7 Ua latou fasiotia foʻi atalii o Setekaia i ona luma. Ona faatauasoina lea e Nepukanesa o Setekaia, ua saisai o ia i faamau ʻapamemea ma ave i Papelonia.+
8 O le masina lona lima i le aso lona fitu o le masina, o le tausaga lona 19 lea o le nofoaiga a le tupu o Nepukanesa le tupu o Papelonia, na sau ai i Ierusalema+ Nepusatana+ le taʻitaʻi o leoleo, o le auauna a le tupu o Papelonia.
9 Ua ia susunu le fale o Ieova,+ o le fale o le tupu,+ ma fale uma o Ierusalema;+ ua ia susunu foʻi fale o tagata sili uma.+
10 Ua faaleagaina foʻi pā na siʻomia ai Ierusalema e le ʻautau uma a Kaletaia, o ē na faatasi ma le taʻitaʻi o leoleo.+
11 A o isi o le nuu na totoe i le aai, o ē na sosola atu i le tupu o Papelonia, ma isi tagata uma, na ave faapagota i latou e Nepusatana le taʻitaʻi o leoleo.+
12 A o nisi o ē e sili ona matitiva o le nuu, na tuu pea e le taʻitaʻi o leoleo ina ia galulue i vine, ma faia galuega mamafa.+
13 Na nutililiia foʻi e ʻautau a Kaletaia poutū ʻapamemea+ sa i le fale o Ieova, o taavale toso,+ ma le faatanoa vai ʻapamemea+ sa i le fale o Ieova, ma latou ave ʻapamemea i Papelonia.+
14 Na latou ave foʻi ʻapa, o suō, o seleulu, o ipu tī, ma ipu ʻapamemea uma na faaaogā i le auaunaga i le malumalu.
15 Na ave foʻi e le taʻitaʻi o leoleo o salefu,* ma ipu faaofuofu ua faia i le auro māoʻi+ ma le siliva+ māoʻi.
16 A o poutū e lua, o le faatanoa vai telē,* ma taavale toso na faia e Solomona mo le fale o Ieova, e leʻi mafai ona fuatia le mamafa o le ʻapamemea o nei mea uma.+
17 E 18 kupita* le maualuga o poutū taʻitasi,+ ma sa faia i le ʻapamemea le ulupou; o le maualuga o le ulupou e tolu kupita; o le mea valavala ma rimoni na faataamilo i le ulupou, sa faia foʻi i le ʻapamemea;+ e faapena foʻi le poutū lona lua ma mea valavala sa iai.
18 Na ave foʻi e le taʻitaʻi o leoleo le ositaulaga sili o Seraia,+ ma Sefanaia+ le ositaulaga lona lua, ma leoleo faitotoʻa e toʻatolu.+
19 Na ia ave foʻi mai i le aai le tagata aloaʻia e toʻatasi o lē na pule i fitafita, o tagata e toʻalima sa iai i le aai o ē na vavalalata i le tupu, faapea le failautusi a le taʻitaʻiʻau, o lē e faapotopotoina tagata o le nuu, ma tagata lautele e toʻa 60 na maua i le aai.
20 Ua ave i latou e Nepusatana+ le taʻitaʻi o leoleo ma avatu i le tupu o Papelonia i Ripelu.+
21 Ua fasiotia e le tupu o Papelonia i latou i Ripelu i le nuu o Amato.+ O lea, ua ave faapagota ai Iuta mai i lona laueleele.+
22 A o tagata na totoe i le nuu o Iuta,+ o ē na tuua e Nepukanesa le tupu o Papelonia, na ia tofia Ketalia+ le atalii o Aikamo+ le atalii o Safana+ e pule iā i latou.
23 Ina ua faalogo taʻitaʻiʻau uma ua tofia Ketalia e le tupu o Papelonia, ona latou ō mai loa lea iā Ketalia i Mesepa. O i latou nei o Isamaeli le atalii o Netanaia, o Ioanano le atalii o Karea, o Seraia le atalii o Tanumeta le tagata Netopa, ma Iaasenaia le atalii o le tagata Maakati, o i latou ma o latou tagata.+
24 Ua tautō Ketalia iā i latou ma o latou tagata, ma ua faapea atu: “Aua le fefefe e avea o ni auauna a le ʻau Kaletaia. Ia nonofo i le nuu ma auauna i le tupu o Papelonia, ona manuia ai lea o outou.”+
25 I le masina lona fitu, na ō mai ai Isamaeli+ le atalii o Netanaia le atalii o Elisama, o lē na tupuga mai i le aigātupu, faatasi ai ma isi tagata e toʻasefulu, ua latou fasia Ketalia ma ua oti ai, atoa foʻi ma tagata Iutaia ma tagata Kaletaia na faatasi ma ia i Mesepa.+
26 Mulimuli ane, ona tulaʻi lea o le nuu uma e mai i ē e iti e oo i ē e matutua, ma taʻitaʻi o ʻautau, ua ō atu i Aikupito,+ auā ua latou fefefe ona o le ʻau Kaletaia.+
27 I le tausaga lona 37 talu ona ave faapagota Ioakina+ le tupu o Iuta, i le masina lona 12 i le aso lona 27 o le masina, na faasa‘oloto ai* Ioakina le tupu o Iuta mai i le falepuipui, e Evile-marota le tupu o Papelonia i le tausaga na avea ai o ia ma tupu.+
28 Ua ia tautala atu ma le agalelei iā Ioakina, ua ia faasili foʻi le nofoālii o Ioakina nai lo o nofoālii o isi tupu na ave faapagota faatasi ma ia i Papelonia.
29 Ona aveesea lea e Ioakina o ona ofu na faafalepuipui ai, ma ua ʻai foʻi e lē aunoa i luma o le tupu i aso uma o lona ola.
30 Ua tuuina atu fo‘i e lē aunoa iā te ia o meaʻai mai i le tupu i aso taʻitasi, i aso uma o lona ola.
Faamatalaga Pito i Lalo
^ Po o “i le fanua laugatasi o le toafa.”
^ O se mea e pei o se tamaʻi suō e aveese ai malala mai i le afi.
^ Epe., “Sami.”
^ Epe., “na faaeaina ai le ulu o.”
