O le Tusi Lona Lua o Tupu 6:1-33
6 Ua fai mai atalii o le ʻauperofeta+ iā Elisaia: “Faauta! E laʻitiiti tele le mea o loo tatou nonofo faatasi ai.
2 Faamolemole, seʻi tuu mai i matou e ō i Ioritana, e taʻitasi ma tā se laau, ma faia ai mo i matou se mea e nonofo ai i inā.” Ona ia fai atu lea: “Inā ō ia.”
3 Ua fai mai se tasi tagata: “Faamolemole, inā sau ia faatasi ma au auauna.” Ona fai atu lea o ia: “Ou te alu lava.”
4 Ona ō lea o ia ma i latou, ma ua latou taunuu i Ioritana, ona tā lea i lalo o laau.
5 Ua tā e le tasi tagata se laau, ma ua paʻū ai le ulu o le toʻi i le vai. Ona ia alaga lea e faapea: “Auē loʻu matai e, o le toʻi na faanoi mai!”
6 Ua fai atu le tagata o le Atua moni: “O fea na paʻū i ai?” Ua ia faasino mai iā te ia, ona ia tipi lea o se fasilaau ma lafo i le mea na paʻū i ai, ma ua opeopea ai le ulu o le toʻi.
7 Ona ia fai atu lea: “Tago loa i ai e ave aʻe.” Ona tago atu lea o lona lima ma ave aʻe.
8 Ua siitaua mai le tupu o Suria iā Isaraelu.+ Ua talatalanoa o ia ma ana auauna, ma faapea atu: “O le nofoaga lea ma le nofoaga lea o le a ou tolauapi ai faatasi ma outou.”
9 Ona auina atu lea e le tagata o le Atua moni+ se feʻau i le tupu o Isaraelu, ua faapea atu: “Ia faaeteete ina neʻi e ui ane i le nofoaga lenei, auā o i inā e ō ifo i ai Suria.”
10 Ona aauina atu lea e le tupu o Isaraelu se feʻau i ona tagata o loo i le nofoaga, na fai mai ai le tagata o le Atua moni iā te ia. Ua lapataʻia pea e Elisaia le tupu o Isaraelu, ma ua ia faamamao ese mai pea i inā.+
11 Ua ita le loto o le tupu o Suria i lenei mea, ona ia valaau lea o ana auauna ma faapea atu iā i latou: “Ia taʻu mai po o ai o i tatou o loo ʻau faatasi ma le tupu o Isaraelu?”
12 Ona fai mai lea o se tasi o ana auauna: “Loʻu alii e, le tupu, e leai se tasi. Ae o le perofeta o Elisaia o loo iai i Isaraelu, o ia lenā o loo faailoa atu i le tupu o Isaraelu mea e te fetalai ai i lou potumoe.”+
13 Ona ia fai atu lea: “Ia outou ō ma vaai po o fea o iai o ia, ina ia ou aauina atu nisi e puʻe o ia.” Mulimuli ane, ua oo mai le tala iā te ia e faapea: “O loo iai o ia i Totana.”+
14 Ona ia aauina atu loa lea o solofanua, o kariota tau, ma se ʻautau e toʻatele i inā; ua latou ō atu i le pō ma siʻomia le aai.
15 Ina ua tulaʻi le auauna a le tagata o le Atua moni i le taeaopō ma alu atu i fafo, vaai! ua siʻomia le aai i ʻautau, o solofanua ma kariota tau. Ona fai mai lea o lana auauna iā te ia: “Auē, loʻu matai e! O le ā se mea e ta te faia?”
16 Ae ua ia fai atu: “Aua e te fefe,+ auā e sili atu ona toʻatele o ē ua iā i taʻua i lo o ē ua iā i latou.”+
17 Ona tatalo lea o Elisaia, ua faapea atu: “Ieova e, ia e faapupula i ona mata ina ia ona iloaina atu.”+ Ona faapupula lea e Ieova o mata o le auauna, ma ua ia iloa atu; faauta! ua tumu le vaega maugā i solofanua ma kariota afi o le taua,+ ua siʻosiʻomia ai Elisaia.+
18 Ina ua ō ifo ʻautau a Suria iā te ia, ona tatalo lea o Elisaia iā Ieova, ua faapea atu: “Faamolemole, ia e faatauasoina lenei nuu.”+ Ona ia faatauasoina lea o i latou, e tusa ai ma le talosaga a Elisaia.
19 Ua fai atu Elisaia iā i latou: “E lē o le auala lenei, e lē o le aai foʻi lenei. Inā mulimuli mai ia iā te aʻu, ou te taʻitaʻi outou i le tagata o loo outou saʻilia.” Peitaʻi, ua ia taʻitaʻi i latou i Samaria.+
20 Ina ua latou taunuu i Samaria, ona faapea atu lea o Elisaia: “Ieova e, ia e faapupula mata o i latou nei, ina ia o latou iloaina atu.” Ona faapupula lea e Ieova o o latou mata, ma ua latou iloa ai o loo iai i latou i le ogatotonu o Samaria.
21 Ina ua iloa mai e le tupu o Isaraelu i latou, ona ia fai mai lea iā Elisaia: “Loʻu tamā e, po ou te fasiotia loa i latou, po ou te fasiotia loa i latou?”
22 Ae ua ia fai atu: “Aua e te fasiotia i latou. Pe e te fasiotia ea i latou na e aumaia faapagota i lau pelu ma lau ʻaufana? Ia laulau atu ni meaʻai ma ni vai iā i latou, ina ia latou aai ma feinu ai,+ ona toe foʻi ai lea i lo latou alii.”
23 Ona ia saunia lea o se faigaʻai tele mo i latou; ua latou aai ma feinu, ona ia aauina atu lea o i latou e toe foʻi i lo latou alii. E leʻi toe ō mai foʻi ʻautau a Suria+ e faoa mea i le nuu o Isaraelu.
24 Mulimuli ane, ona faapotopoto faatasi lea e Peniata le tupu o Suria o lana ʻautau uma, ma ō aʻe e osofaʻia Samaria.+
25 Ua iai se oge tele+ i Samaria, ma ua latou si‘omia le aai, ua iʻu ina faatauina atu le ulu o se asini+ i tupe siliva e 80, ae 5 tupe siliva na faatauina atu ai le tasi vaefā o le fua o le kape* o otaota o le lupe.
26 A o savali ane le tupu o Isaraelu i luga o le pā, ona alaga atu lea o se fafine iā te ia, ua faapea atu: “Loʻu alii e, le tupu, ia e fesoasoani mai!”
27 Ua fai mai le tupu: “Afai e lē fesoasoani atu Ieova iā te oe, o fea la ou te alu e aumai ai se fesoasoani mo oe? Po o iai ea ni mea o totoe i le mea e soli ai saito, ma le mea e soli ai vine ma olive?”
28 Ua fesili mai le tupu i le fafine: “O le ā le mea ua tupu iā te oe?” Ua tali atu o ia: “Na fai mai lenei fafine iā te aʻu, ‘Aumai lau tama ta te ʻaina i le aso nei, ona avatu lea o laʻu tama e ta te ʻaina taeao.’+
29 Ona ma tunuina lea o laʻu tama ma ʻai.+ Ona ou fai atu lea iā te ia i le aso na sosoo ai, ‘Inā aumai ia lau tama seʻi o ta ʻaina.’ Ae ua ia nanā i lana tama.”
30 Ina ua faalogo le tupu i upu a le fafine, ona ia saeia lea o ona ofu.+ A o ui ane o ia i luga o le pā, ua iloa atu e le nuu o loo ofu i totonu o ona ofu le ʻie talatala.
31 Ona ia fai atu lea: “Ia matuā faasalaina aʻu e le Atua,* pe afai e tumau pea le ulu o Elisaia le atalii o Safata iā te ia i le asō!”+
32 Ua nofo Elisaia i lona fale, ua nonofo foʻi faatasi ma ia o toeaina. Ua auina mai e le tupu se avefe‘au e muamua mai i ona luma, ae a o leʻi oo mai le avefeʻau, ua fai atu Elisaia i toeaina: “Po ua outou iloa ea ua auina mai e lenei atalii o le fasioti tagata+ se tasi e vavaeese loʻu ulu? Vaai, pe a oo mai le avefeʻau, ia tapuni le faitotoʻa ma ia outou taofimau o ia i le faitotoʻa. Pe e lē o le paʻō ea lenā o vae o lona alii o loo mulimuli mai iā te ia?”
33 A o ia tautala atu pea iā i latou, ae oo mai loa le avefeʻau iā te ia. Ona sau lea o le tupu ua faapea atu: “O le puapuaga lenei mai iā Ieova. Aiseā ou te saga faatalitali ai pea mo le fesoasoani a Ieova?”
Faamatalaga Pito i Lalo
^ Epe., “Ia faia e le Atua iā te aʻu, ma ia faaopoopo i ai.”
