Esekielu 10:1-22
10 A o oʻu vaavaai atu pea, na ou iloa ai i luga aʻe o le fola lea o loo i luga o ulu o kerupi, ua iai se mea e foliga mai e pei o le maa safaira, lea e pei o se nofoālii ua tū mai i luga aʻe o i latou.+
2 Ona ia fetalai atu lea i le tamāloa ua ofu i le ʻie lino e faapea:+ “Inā ulu atu ia i le vā o uili taavavale,+ i lalo ifo o kerupi, ia faatumu ou lima i malala ola+ mai i le vā o kerupi, ma faasalalau solo i luga o le aai.”+ Ona ia ulu atu lea a o oʻu vaai i ai.
3 Ua tutū kerupi i le itu taumatau o le fale a o ulu atu le tamāloa, ma ua faatumulia le lotoā pito i totonu i le ao.
4 Ona alu aʻe lea o le mamalu o Ieova+ mai i luga o kerupi ua oo atu i le faitotoʻa o le fale, ma ua faasolosolo ona tumu le fale i le ao,+ ua faatumulia foʻi le lotoā i le pupula o le mamalu o Ieova.
5 Ua lagona foʻi le taalili o apaʻau o kerupi i le lotoā pito i fafo, e pei o le siʻufofoga o le Atua o Lē e ona le malosi uma lava pe a fetalai mai o ia.+
6 Ona ia faatonuina lea o le tamāloa o loo ofu i le ʻie lino, e faapea: “Ia ave se afi mai i le vā o uili taavavale, mai i le vā o kerupi.” Ona ia ulu atu lea ma tū i autafa o le uili.
7 Ona aapa atu lea o le lima o se tasi o kerupi agaʻi i le afi o loo i le vā o kerupi,+ ua ia ave malala ola ma tuu i lima o lē o loo ofu i le ʻie lino,+ ona ave loa lea e ia ma alu.
8 Ua iai foʻi i kerupi se mea ua foliga mai e pei o lima o se tagata i lalo ifo o o latou apaʻau.+
9 A o oʻu vaavaai atu pea, na ou iloa ai uili e fā i autafa o kerupi, e tasi le uili i autafa o le kerupi e tasi, ma o foliga o uili ua pei o le pupula o le maa tasesa.+
10 A o foliga o ia uili, e tutusa uma foliga o uili e fā, e pei ua faalava le isi uili i totonu o le isi uili.
11 Pe a taavavale uili, e mafai ona taavavale atu i itu uma e fā e aunoa ma le liliu i se isi itu, auā o le itu e faasaga i ai le ulu, e taavavale atu foʻi i ai e aunoa ma le liliu i se isi itu.
12 O tino uma o kerupi, o o latou papatua, o o latou lima ma o latou apaʻau, ua soo i mata. Ua tofu i latou e toʻafā ma le uili i autafa, ua soo foʻi i mata.+
13 E tusa ai ma uili, ua ou faalogo i se leo o valaau atu i ai, “Uili e!”
14 Ua taʻitasi i latou* ma ona foliga e fā. O le foliga muamua o foliga o le kerupi, o le foliga lona lua o foliga o le tagata, o le foliga lona tolu o foliga o le leona, ma le foliga lona fā o foliga o le aeto.+
15 Ua ō aʻe foʻi kerupi i luga, o foafoaga agaga ia* na ou vaaia i le vaitafe o Kepara.+
16 Pe a ō atu kerupi, e taavavale atu ai foʻi ma uili i o latou autafa; ma pe a sii i luga e kerupi o latou apaʻau ina ia maualuga aʻe i le lalolagi, e lē liliu pe ō ese uili mai i o latou autafa.+
17 Pe a tutū i latou, e tutū foʻi uili; pe a ō aʻe i latou, e ō aʻe foʻi ma uili, auā o le agaga lea o loo uunaʻia ai foafoaga agaga, ua iai foʻi i uili.
18 Ona alu ese lea o le mamalu o Ieova+ mai i luga o le faitotoʻa o le fale ma tū i luga aʻe o kerupi.+
19 Ona sii aʻe lea e kerupi o o latou apaʻau ma ō aʻe mai i le lalolagi, a o oʻu vaai atu i ai. Ina ua latou ō atu, ua iai foʻi uili i o latou autafa. Ua latou tutū i le faitotoʻa o le pā i le itu i sasaʻe o le fale o Ieova, ma ua i luga aʻe o i latou le mamalu o le Atua o Isaraelu.+
20 O foafoaga agaga ia* na ou vaaia i lalo o le nofoālii o le Atua o Isaraelu i le vaitafe o Kepara,+ ona ou iloa ai lea o i latou o kerupi.
21 Ua iai iā i latou uma e toʻafā o foliga e fā, o apaʻau e fā, ma ua i lalo ifo o o latou apaʻau mea e pei o lima o le tagata.+
22 A o o latou foliga, e pei o foliga na ou vaaia i autafa o le vaitafe o Kepara.+ E taʻitasi i latou ma alu saʻo i luma.+
Faamatalaga Pito i Lalo
^ E faasino atu i kerupi taʻitasi.
^ Epe., “o le foafoaga agaga lea.”
^ Epe., “O le foafoaga agaga lea.”
