Esekielu 13:1-23
13 Ua toe oo mai le afioga a Ieova iā te aʻu e faapea:
2 “Le atalii e o le tagata, ia e fai atu valoaga e faasaga i perofeta o Isaraelu,+ ma ia fai atu iā i latou o loo fafau aʻe a latou lava valoaga,*+ ‘Inā faalogo mai ia i le afioga a Ieova.
3 O le fetalaiga lenei a le Alii Pule Silisili Ese o Ieova: “Oi talofa i perofeta vālea, o ē e savavali e tusa ma o latou loto, ae e latou te leʻi vāai i se mea!+
4 Isaraelu e, ua pei ou perofeta o alope* i mea ua faatafunaina.
5 O le a outou lē ō atu i vaega ua lepetia o le pā maa, ina ia toe fausia mo le aiga o Isaraelu.+ O le mea lea, o le a lē tumau ai pea Isaraelu i le taua i le aso o Ieova.”+
6 “Ua latou vaaia faaaliga pepelo ma faia valovaloga pepelo, o ē ua faapea mai, ‘O le fetalaiga lenei a Ieova,’ ae e leʻi aauina mai i latou e Ieova, ma ua latou faatalitali ina ia taunuu ia upu.+
7 Pe e lē o se faaaliga pepelo ea na outou vāai i ai, ma o se valovaloga pepelo na outou fai mai ai ina ua outou faapea mai, ‘O le fetalaiga lenei a Ieova,’ ae ou te leʻi fai atu lava se tala?”’
8 “‘O lea, o le fetalaiga lenei a le Alii Pule Silisili Ese o Ieova: “‘Talu ai ua outou tautatala i upu pepelo ma ua pepelo foʻi a outou faaaliga, o lea, ou te tetee atu ai iā te outou,’ ua fetalai mai ai le Alii Pule Silisili Ese o Ieova.”+
9 O le a aapa atu loʻu lima ma faasala perofeta ua vaaia faaaliga pepelo ma faia valovaloga pepelo.+ O le a lē iai i latou faatasi ma le nuu ou te faapelepele i ai; e lē lesitalaina o latou igoa faatasi ma le aiga o Isaraelu; e lē toe foʻi atu i latou i le laueleele o Isaraelu; ma o le a outou iloa ai o aʻu lava o le Alii Pule Silisili Ese o Ieova.+
10 Ua tutupu nei mea uma ona ua latou taʻitaʻisesēina loʻu nuu e faapea, “Ua iai le filemu!” ae e leai se filemu.+ Pe a fausia se pā e faigofie ona faaleagaina, e latou te valiina i le vali paʻepaʻe.’*+
11 “Ia fai atu iā i latou o loo valiina le pā i le vali paʻepaʻe, o le a soloia lava le pā. O le a oo mai timuga tetele, o le a totō ifo foʻi uatoʻa, ma o le a agi mai matagi malolosi ma lepetia ai le pā.+
12 Pe a soloia le pā, o le a fesiligia outou, ‘O fea la outou vali paʻepaʻe na valiina ai le pā?’+
13 “O lea, o le fetalaiga lenei a le Alii Pule Silisili Ese o Ieova, ‘O le a ou faapogaia matagi malolosi e agi atu ma faatotō ifo timuga tetele ona o loʻu ita tele. O le a ou faatotō ifo uatoʻa e faaumatia ai le pā ona o loʻu matuā ita tele.
14 O le a ou lepetia i lalo le pā na outou valiina i le vali paʻepaʻe ma soloia i le palapala, e aliali mai foʻi lona faavae. Pe a paʻū le aai, o le a faaumatia ai outou i le aai; ma o le a outou iloa ai o aʻu lava o Ieova.’
15 “‘Pe a ou matuā faaoo atu loʻu ita tele i le pā ma i latou na valiina i le vali paʻepaʻe, o le a ou faapea atu iā te outou: “Ua lē toe iai se pā, faapea ma i latou na valiina.+
16 Ua lē toe iai perofeta o Isaraelu, o ē ua faia valoaga e faatatau iā Ierusalema ma ua vaaia faaaliga o le filemu mo le aai, ae e lē o iai se filemu,”’+ ua fetalai mai ai le Alii Pule Silisili Ese o Ieova.
17 “A o oe le atalii e o le tagata, ia e faasaga atu i afafine o lou nuu, o ē ua fafau a latou lava valoaga, ma ia e faia valoaga faasaga iā i latou.
18 Ia e fai atu, ‘O le fetalaiga lenei a le Alii Pule Silisili Ese o Ieova: “Oi talofa i fafine ua suʻi fusi mo lima* uma ma fai veli mo ulu o tagata e fuaitino eseese, ina ia maileia ai ola o tagata! Po o outou maileia ea ola o oʻu tagata, ae taumafai e faasao o outou lava ola?
19 Po o le a outou faaleagaina ea aʻu i loʻu lava nuu, ina ia maua ai luuga o karite ma ni fasi falaoa,+ ma fasiotia tagata e lē tatau ona feoti, ae faaolaina tagata e lē tatau ona feola, e ala i lo outou tala pepelo atu i loʻu nuu, o ē e faalogo atu i a outou pepelo?”’+
20 “O lea, o le fetalaiga lenei a le Alii Pule Silisili Ese o Ieova, ‘O outou fafine e, ou te tetee atu i a outou fusi o loo tou faaaogā e maileia ai tagata, e peiseaʻī o i latou o ni manufelelei, ma o le a ou saeia fusi mai i o outou lima ma faasaʻoloto tagata o loo outou maileia e pei o ni manufelelei.
21 O le a ou saeia o outou veli ma laveaʻiina loʻu nuu mai i o outou lima, e lē toe avea foʻi i latou e pei o se mea e tou te maileia; ma o le a outou iloa ai o aʻu lava o Ieova.+
22 Auā ua outou faavaivaia le loto o le tagata amiotonu i a outou tala pepelo,+ ae ou te leʻi faatigā iā te ia, ma ua outou faamalosia lima o lē e amioleaga+ ina ia lē liliuese mai ai i lona ala leaga ma faaolaina ai.+
23 O le mea lea, e lē toe vaaia ai e outou fafine ni faaaliga pepelo ma faia valovaloga faataulāitu;+ ou te laveaʻiina foʻi loʻu nuu mai i o outou lima, ma o le a outou iloa ai o aʻu lava o Ieova.’”
Faamatalaga Pito i Lalo
^ Po o le “o loo faia valoaga mai i o latou lava loto.”
^ Tagaʻi i le Uiga o Upu.
^ E faasino atu i le fausia o se puipui i totonu e lē malosi, ae ua vali paʻepaʻe ina ia foliga mai ai e malosi.
^ E faasino atu i se fusi e faaaogā i faiga faataulāitu, lea e fusi i le tulilima po o le tapulima.
