Esekielu 20:1-49
20 O le tausaga lona fitu, i le masina lona lima, i le aso sefulu o le masina, na ō mai ai nisi o toeaina o Isaraelu ma nonofo i oʻu luma, ina ia fesili atu iā Ieova.
2 Ona oo mai lea o le afioga a Ieova iā te aʻu e faapea:
3 “Le atalii e o le tagata, ia e talanoa atu i toeaina o Isaraelu ma faapea atu iā i latou, ‘O le fetalaiga lenei a le Alii Pule Silisili Ese o Ieova: “Pe e tou te ō mai ea ina ia fesili mai iā te aʻu? ‘Ou te tautō iā te aʻu lava, ou te lē tali atu lava i la outou fesili,’+ ua fetalai mai ai le Alii Pule Silisili Ese o Ieova le Atua soifua.”’
4 “Po ua e sauni e faamasino i latou?* Le atalii e o le tagata, po ua e sauni e faamasino i latou? Ia faailoa atu iā i latou mea inosia na faia e o latou augātamā.+
5 Ia fai atu iā i latou, ‘O le fetalaiga lenei a le Alii Pule Silisili Ese o Ieova: “I le aso na ou filifilia ai Isaraelu,+ na ou tautō ai foʻi* i le fanauga a le aiga o Iakopo, ma faailoa atu aʻu lava iā i latou i le nuu o Aikupito.+ E moni, na ou tautō iā i latou ma faapea atu, ‘O aʻu o Ieova lo outou Atua.’
6 I lenā aso, na ou tautō ai ou te aumaia i latou mai i le nuu o Aikupito ma avatu i se nuu na ou saʻilia mo i latou, lea e tafe ai le suāsusu ma le meli.+ Na sili ona matagofie lenā nuu i lo o nuu uma.
7 Na ou toe fai atu iā i latou, ‘Ia taʻitasi outou ma lafoaʻi ese mea inosia o loo i ona luma; aua neʻi faaleagaina outou i tupua inosia* a Aikupito.+ O aʻu o Ieova lo outou Atua.’+
8 “ʻ“Ae na latou fouvale mai iā te aʻu ma e leʻi fia faalogo mai iā te aʻu. E latou te leʻi lafoaʻi ese mea inosia na iai i o latou luma, ma e latou te leʻi tuulafoaʻia foʻi tupua inosia a Aikupito.+ O lea, na ou folafola atu ai ou te liligi ifo loʻu ita tele iā i latou, ma matuā faaoo atu loʻu ita iā i latou i le nuu o Aikupito.
9 Peitaʻi, na ou tali atu i se auala e lē faaleagaina ai loʻu igoa i luma o nuu na latou iai.+ Auā na ou faailoa atu aʻu lava iā i latou* i luma o nei nuu, ina ua ou aumaia i latou* mai i le nuu o Aikupito.+
10 O lea na ou aumaia ai i latou mai i le atunuu o Aikupito ma taʻitaʻi atu i le toafa.+
11 “ʻ“Ona ou tuu atu lea iā i latou o aʻu tulafono ma faailoa atu iā i latou iʻuga o aʻu faamasinoga,+ ina ia maua ai e le tagata le ola pe afai e na te tausia.+
12 Na ou avatu foʻi iā i latou oʻu sapati+ e fai ma faailoga iā te aʻu ma i latou,+ ina ia latou iloa ai o aʻu o Ieova o lē ua faapaiaina i latou.
13 “ʻ“Peitaʻi, na fouvale mai le aiga o Isaraelu iā te aʻu i le toafa.+ E leʻi savavali i latou i aʻu tulafono, ma na latou teena iʻuga o aʻu faamasinoga, ia e mafai ona maua ai e se tagata le ola pe afai e na te tausia. Na latou matuā solia oʻu sapati. O lea, na ou folafola atu ai ou te liligi ifo loʻu ita tele iā i latou i le toafa, ina ia faaumatia ai i latou.+
14 Peitaʻi, na ou tali atu i se auala e lē faaleagaina ai loʻu igoa i luma o nuu, o ē na ou aumaia ai i latou* mai i o latou luma.+
15 Na ou tautō foʻi iā i latou i le toafa, ou te lē aumaia i latou i le nuu na ou tuuina atu iā i latou,+ lea e tafe ai le suāsusu ma le meli+ ma e sili ona matagofie i lo o nuu uma,
16 talu ai na latou teena iʻuga o aʻu faamasinoga, e latou te leʻi savavali i aʻu tulafono, ma na latou solia oʻu sapati, auā na mulimuli o latou loto i a latou tupua inosia.+
17 “ʻ“Peitaʻi na ou toe alofa iā i latou ma ou lē faaumatia ai i latou; ou te leʻi faafanoina i latou i le toafa.
18 Na ou fai atu i a latou fanau i le toafa,+ ‘Aua tou te savavali i tuutuuga a o outou augātamā,+ pe tausia a latou faamasinoga, pe faaleagaina outou i a latou tupua inosia.
19 O aʻu o Ieova lo outou Atua. Ia savavali i aʻu tulafono, ia tausi i iʻuga o aʻu faamasinoga ma faia ia mea.+
20 Ia faapaiaina oʻu sapati,+ ma o le a fai ma faailoga iā te aʻu ma outou, ina ia outou iloa ai o aʻu lava o Ieova lo outou Atua.’+
21 “ʻ“Ae na fouvale mai le fanau iā te aʻu.+ E leʻi savavali i latou i aʻu tulafono, e latou te leʻi tausia foʻi iʻuga o aʻu faamasinoga ma faia ia mea, ia e mafai ona maua ai e se tagata le ola pe afai e na te tausia. Na latou solia oʻu sapati. O lea, na ou folafola atu ai ou te liligi ifo loʻu ita tele iā i latou, ma matuā faaoo atu loʻu ita iā i latou i le toafa.+
22 Peitaʻi, ou te leʻi faia faapea+ ma na ou tali atu i se auala e lē faaleagaina ai loʻu igoa+ i luma o nuu, o ē na ou aumaia ai i latou* mai i o latou luma.
23 Na ou tautō foʻi iā i latou i le toafa o le a ou faataapeapeina i latou i nuu, ma faasalalauina i latou i atunuu,+
24 ona latou te leʻi tausia iʻuga o aʻu faamasinoga, na latou teena aʻu tulafono,+ na latou solia foʻi oʻu sapati, ma latou mulimuli* i tupua inosia a o latou augātamā.+
25 Na ou tuua foʻi i latou e mulimuli i tuutuuga lē lelei ma iʻuga o faamasinoga e lē mafai ona latou maua ai le ola.+
26 Ina ua latou faaui ane i le afi ulumatua uma,+ na ou tuua i latou ia faaleagaina i a latou lava taulaga, ina ia faatafunaina ai i latou, ma latou iloa ai o aʻu lava o Ieova.”’
27 “O lea, le atalii e o le tagata, ia talanoa atu i le aiga o Isaraelu ma ia faapea atu, ‘O le fetalaiga lenei a le Alii Pule Silisili Ese o Ieova: “Na upuleaga foʻi o outou augātamā iā te aʻu, e ala i lo latou lē faamaoni mai iā te aʻu.
28 Na ou avatu i latou i le nuu lea na ou tautō e avatu iā i latou.+ Ina ua latou vāai i aʻega maualuluga uma ma laau lauolaola uma,+ ona amata ai lea ona latou ofo atu a latou taulaga ma a latou taulaga inosia. Na latou faamū mea manogi lelei o a latou taulaga, ma liligi atu i inā a latou taulaga i meainu.
29 Ona ou fesili atu lea iā i latou, ‘O le ā le māfuaaga e tou te ō atu ai i lenei mea maualuga? (O loo taʻua pea o le Mea Maualuga seʻia oo mai i le asō.)’”’+
30 “O lea, ia fai atu i le aiga o Isaraelu, ‘O le fetalaiga lenei a le Alii Pule Silisili Ese o Ieova: “Po ua outou faaleagaina ea outou lava e pei ona faia e o outou augātamā, e ala i le mulimuli i a latou tupua inosia ina ia faia faiga faatalitane faaleagaga ma nei tupua?+
31 Po ua outou faaleagaina pea foʻi outou lava e oo mai i le asō, i le ofoina o taulaga i a outou tupua inosia uma, e ala i le faaui ane o a outou fanau i le afi?+ Le aiga o Isaraelu e, pe e tatau foʻi la ona ou tali atu i le taimi e tasi i la outou fesili?”’+
“‘Ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘ou te lē tali atu lava i la outou fesili.+
32 O le a lē tupu foʻi le mea lea ua outou mafaufau i ai pe a outou faapea ane: “Seʻi avea i tatou e pei o isi nuu, e pei o aiga o isi atunuu, o ē e tapuaʻi* atu i laau ma maa.”’”+
33 “‘Ou te tautō iā te aʻu lava,’ ua fetalai mai ai le Alii Pule Silisili Ese o Ieova le Atua soifua, ‘o le a ou pule o se tupu iā te outou ma le lima malosi, o le lima faaloaloa, ma le sasaa atu o loʻu ita tele.+
34 O le a ou aumaia outou mai i nuu ma faapotopoto outou mai i atunuu na faataapeape ai outou ma le lima malosi, o le lima faaloaloa, ma le sasaa atu o loʻu ita tele.+
35 Ou te avatu outou i le toafa o nuu, ma tatou faafesagaʻi ai ma faia la tatou faamasinoga.+
36 “‘E pei lava ona faia la matou faamasinoga ma o outou augātamā i le toafa o Aikupito, e faapena foʻi ona faia la tatou faamasinoga,’ ua fetalai mai ai le Alii Pule Silisili Ese o Ieova.
37 ‘Ou te faaui ane foʻi outou i lalo o le tootoo+ a le leoleo mamoe, ma faatalitalia outou e tausia* le feagaiga.
38 Ae o le a ou aveesea mai iā te outou o ē e fouvale ma ē e solitulafono faasaga iā te aʻu.+ Auā o le a ou aumaia i latou mai i le nuu na latou aumau ai o ni tagata ese, ae e latou te lē ulu atu i le laueleele o Isaraelu;+ ma o le a outou iloa ai o aʻu lava o Ieova.’
39 “O outou foʻi, le aiga e o Isaraelu, o le fetalaiga lenei a le Alii Pule Silisili Ese o Ieova: ‘Ia outou ō ma taʻitasi ma auauna i ana lava tupua inosia.+ Ae ia outou iloa le mea lenei: pe afai tou te lē faalogo mai iā te aʻu, o le a iai le taimi o le a outou lē toe faaleagaina ai loʻu igoa paia i a outou taulaga ma a outou tupua inosia.’+
40 “‘Auā i loʻu mauga paia, i se mauga maualuga o Isaraelu,’+ ua fetalai mai ai le Alii Pule Silisili Ese o Ieova, ‘o i inā e auauna mai ai iā te aʻu le aiga atoa o Isaraelu, o i latou uma i le atunuu.+ O i inā ou te fiafia ai iā te outou, ma o le a ou tāpā ai a outou foaʻi ma uluaʻi fua o a outou taulaga, mai i a outou mea paia uma.+
41 Ona o manogi lelei,* o le a ou fiafia ai iā te outou pe a ou aumaia outou mai i nuu, ma aoaoina faatasi outou mai i atunuu na faataapeape i ai outou;+ ma o le a ou faailoa atu loʻu paia iā te outou, o le a iloa foʻi e nuu lenei mea.’+
42 “‘O le a outou iloa ai o aʻu lava o Ieova,+ pe a ou avatu outou i le laueleele o Isaraelu,+ i le atunuu na ou tautō e avatu i o outou augātamā.
43 Ona outou manatua ai lea i inā o a outou amioga ma mea uma na outou faia ia na faaleagaina ai outou,+ ma o le a outou ʻinoʻino iā te outou lava* ona o mea leaga uma na outou faia.+
44 Ona outou iloa ai lea o aʻu lava o Ieova, pe a ou feutagaʻi ma outou ona o loʻu igoa,+ ae e lē tusa ma a outou amioga leaga, po o a outou gaoioiga faapiʻopiʻo, le aiga o Isaraelu e,’ ua fetalai mai ai le Alii Pule Silisili Ese o Ieova.”
45 Ua toe oo mai le afioga a Ieova iā te aʻu e faapea:
46 “Le atalii e o le tagata, ia faasaga ou mata i le itu i saute ma folafola atu i le itu i saute, ma faia valoaga i le vaomatua o le laufanua o le itu i saute.
47 Ia fai atu i le vaomatua o le itu i saute, ‘Inā faalogo mai ia i le afioga a Ieova. O le fetalaiga lenei a le Alii Pule Silisili Ese o Ieova: “Ou te tutu le afi faasaga iā te oe,+ ma o le a faatamaʻia ai laau lanu meamata ma laau mamago uma lava ua iā te oe. O le a lē tineia le afi ua mumū,+ ma o le a lagonaina e tagata uma le vevela o le afi mai i le itu i saute e oo atu i le itu i mātū.
48 Ona iloa ai lea e tagata uma, o aʻu lava o Ieova ua ou susunuina lea mea, ina ia lē tineia ai.”’”+
49 Ona ou fai atu lea: “Oi auē, Ieova e le Alii Pule Silisili Ese! Ua latou faapea mai e uiga iā te aʻu, ‘Ua na o ni tupua* o loo ia faamatalaina!’”
Faamatalaga Pito i Lalo
^ Po o le “e faailoa atu iʻuga faafaamasinoga iā i latou?”
^ Epe., “na sii ai loʻu lima.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ E faasino atu iā Isaraelu.
^ E faasino atu iā Isaraelu.
^ E faasino atu iā Isaraelu.
^ E faasino atu iā Isaraelu.
^ Epe., “ma faasaga o latou mata.”
^ Po o le “auauna.”
^ Epe., “ma aumaia outou i le noataga o.”
^ Po o le “manogi ua faamalieina ai.”
^ Epe., “ʻinoʻino foʻi i o outou lava foliga.”
^ Po o “faaupuga masani.”
