Esekielu 24:1-27
24 Ua toe oo mai le afioga a Ieova iā te aʻu i le tausaga lona iva, i le masina lona sefulu, i le aso sefulu o le masina e faapea:
2 “Le atalii e o le tagata, ia e faamauina lenei aso,* o le aso lava lenei. Ua osofaʻia e le tupu o Papelonia Ierusalema i lenei lava aso.+
3 Ia e taʻu atu se faaupuga masani e uiga i le aiga fouvale, ma fai atu iā i latou:
“‘O le fetalaiga lenei a le Alii Pule Silisili Ese o Ieova:
“Ia tuu i luga o le afi le ulo* ma sasaa i ai vai.+
4 Ia tuu i ai aano o manu,+ o tufaaga lelei uma,O le alagavae ma le alagalima; ia faatumu i ponaivi e sili ona lelei.
5 Ia aumai le mamoe e sili ona lelei o le lafu,+ ma ia tuu faataamilo ogālaau i lalo o le ulo.
Ia tunu tufaaga, ma ia faavela ponaivi o i totonu o le ulo.”’
6 “O lea, o le fetalaiga lenei a le Alii Pule Silisili Ese o Ieova:
‘Oi talofa i le aai faamasaatoto,+ o le ulo ʻelea, lea e leʻi aveesea mai ai le ʻele!
Ia auauaʻi ona aumai i fafo tufaaga;+ aua neʻi fai ai se vili.*
7 Auā o loo iai i totonu o le aai le toto na faamasaaina e le aai;+ ua sasaaina e ia* le toto i luga o le papa e leai se mea o iai.
E na te leʻi sasaaina i le eleele, ina ia ufitia ai e le pefu.+
8 Ina ia faatupu le ita tele ma faaoo i ai le tauimasui,Ua ou tuu ai lona toto i luga o le papa e iila,Ina ia lē ufitia ai.’+
9 “O lea, o le fetalaiga lenei a le Alii Pule Silisili Ese o Ieova:
‘Oi talofa i le aai faamasaatoto!+
O le a ou faaputuina fafie ia maualuga.
10 Ia faaputu ogālaau ma tutu le afi,Ia faavela lelei le aano, ia sasaa le sua, ma ia faamū ponaivi.
11 Ia tuu le ulo e leai se mea o iai, i luga o malala ina ia faavevela ai,Ina ia matuā vevela ai ona ʻapamemea.
O le a liusuāvai lona lē mamā o loo i totonu,+ ma o le a faaumatia ai lona ʻelea i le afi.
12 Ua lagona le fiu ma le lē lavā,Auā ua lē mafai ona alu ese le mafiafia o le ʻele.+
Ia lafo i le afi faatasi ma ona ʻele!’
13 “‘Ua e lē mamā ona o au amioga matagā.+ Na ou taumafai e faamamā iā te oe, ae ua lē mamā lava oe mai i au faiga lē mamā. O le a lē mafai ona e mamā seʻi vaganā ua teʻa loʻu ita tele iā te oe.+
14 O aʻu o Ieova ua ou fai atu ai. O le a oo mai lava. O le a ou gaoioi e aunoa ma le faatalatū, pe faanoanoa pe suia foʻi loʻu manatu.+ O le a latou faamasinoina oe e tusa ma ou ala ma au mea na fai,’ ua fetalai mai ai le Alii Pule Silisili Ese o Ieova.”
15 Ua oo mai foʻi le afioga a Ieova iā te aʻu e faapea:
16 “Le atalii e o le tagata, o le a faafuaseʻi ona ou aveesea mai iā te oe lē ua pele iā te oe.+ Aua neʻi e faavauvau;* aua foʻi e te tagi pe maligi ou loimata.
17 Ia e ōi e aunoa ma le tautala, ma aua neʻi e faia tū masani o le faavauvau mo ē ua feoti.+ Ia e sai lou pulou ʻie i lou ulu,+ ma fai ou seevae.+ Aua neʻi e ufitia le ʻavaaluga+ ma aua e te ʻai i meaʻai mai i tagata.”*+
18 Ona ou tautala atu lea i le nuu i le taeao, ae ua oti laʻu avā i le afiafi. Ona ou faia lea i le taeao e pei ona poloaʻiina ai aʻu.
19 Ua fesili mai le nuu iā te aʻu: “Pe e te lē taʻu mai ea iā i matou pe e faapefea ona aafia i matou i ia mea o loo e faia?”
20 Ona ou fai atu lea iā i latou: “Ua oo mai le afioga a Ieova iā te aʻu e faapea,
21 ‘Ia fai atu i le aiga o Isaraelu: “O le fetalaiga lenei a le Alii Pule Silisili Ese o Ieova, ‘Ua toeitiiti ona ou faaleagaina lea o loʻu malumalu,+ o le mea lea o loo outou matuā mitamita ai, o le mea ua outou faapelepele i ai, ma e naunau i ai o outou loto. O le a fasiotia foʻi i le pelu a outou lava fanau tama ma fanau teine na outou tuua.+
22 Ona outou faia lea e pei lava ona ou faia. Tou te lē ufitia a outou ʻavaaluga, tou te lē aai foʻi i meaʻai mai i tagata.+
23 O le a iai o outou pulou ʻie i o outou ulu, ma o outou seevae i o outou vae. O le a outou lē faavauvau pe fetagisi. Nai lo o lea, o le a outou mafatia ona o a outou mea sesē,+ ma o le a outou feoi iā te outou lava.
24 E fai Esekielu ma faailoga iā te outou.+ E tou te faia e tusa ma mea na ia faia. Pe a tupu lenei mea, ona outou iloa ai lea o aʻu o le Alii Pule Silisili Ese o Ieova.’”’”
25 “A o oe le atalii e o le tagata, i le aso ou te aveesea mai ai iā i latou lo latou nofoaga malupuipuia, o le mea matagofie o loo latou olioli ai, o le mea e latou te faapelepele i ai, ma e naunau i ai o latou loto, ma aveesea foʻi a latou fanau tama ma fanau teine,+
26 o le a faailoa atu lava iā te oe e se tasi o le a sao mai ai.+
27 I lea aso, o le a tautala ai lou gutu ma e talanoa atu i lē ua sao mai, e te lē toe gūgū foʻi.+ O le a fai oe ma faailoga iā i latou, ona latou iloa ai lea o aʻu lava o Ieova.”
Faamatalaga Pito i Lalo
^ Epe., “le igoa o le aso.”
^ Po o le “ulo e telē le gutu.”
^ Tagaʻi i le Uiga o Upu.
^ Po o “le aai.”
^ Po o le “Aua e te tatuʻi i lou fatafata.”
^ Epe., “le falaoa a tagata.”
