Esekielu 30:1-26
30 Ua toe oo mai le afioga a Ieova iā te aʻu e faapea:
2 “Le atalii e o le tagata, ia e faia valoaga ma faapea atu, ‘O le fetalaiga lenei a le Alii Pule Silisili Ese o Ieova:
“Ia uiō, ‘Oi auē o le a oo mai le aso!’
3 Auā ua latalata mai le aso, ioe, ua lata mai le aso o Ieova.+
O le a avea o se aso faamalumalu,+ o le taimi e oo mai ai le faasalaga i nuu.+
4 O le a oo mai le pelu e faasaga iā Aikupito, o le a faatumulia foʻi Aitiope i le gatete pe a paʻuʻū tagata ua fasiotia i Aikupito;E faoa lona tamaoaiga ma lepetia i lalo ona faavae.+
5 O Aitiope,+ o Futu,+ o Luti ma tagata uma mai i isi nuu,O Kupu ma fanau o le nuu o le feagaiga,*O le a fasiotia i latou uma i le pelu.”’
6 O le fetalaiga lenei a Ieova:
‘O le a paʻuʻū foʻi ē e lagolagoina Aikupito,Ma o le a faaitiitia lona malosi lea o loo mitamita ai.’+
“‘O le a paʻuʻū i latou i le pelu i le laueleele e mai i Mekatala+ e oo atu i Seveni,’+ ua fetalai mai ai le Alii Pule Silisili Ese o Ieova.
7 ‘O le a avea i latou ma atunuu e sili ona faatafunaina nai lo o isi atunuu, ma o le a avea ona lava aai ma aai e sili ona faagaogaoina.+
8 O le a latou iloa ai o aʻu lava o Ieova pe a ou tutuina se afi i Aikupito, ma faaumatia i latou uma ua ʻau faatasi ma ia.
9 O lea aso, o le a ou aauina atu ai avefeʻau i vaa ina ia gatete ai Aitiope lea e soona mautinoa naʻuā; o le a atuatuvale i latou i le aso lea o le a oo mai iā Aikupito, auā o le a oo mai lava.’
10 “O le fetalaiga lenei a le Alii Pule Silisili Ese o Ieova: ‘O le a ou faaumatia le motu o tagata o Aikupito e ala i le lima o Nepukanesa le tupu o Papelonia.+
11 O le a aumaia o ia ma ana ʻautau, o pule sauā mai i nuu, ina ia faafanoina le laueleele.+ O le a latou seʻi aʻe a latou pelu e faasagatau atu ai iā Aikupito, ma faatumuina le laueleele i tagata ua fasiotia.+
12 O le a ou liua alāvai o le Naila+ e avea ma eleele mātūtū, ma faatau atu le laueleele i lima o tagata amioleaga. O le a ou faatafunaina le laueleele ma mea uma o loo iai e ala i lima o tagata ese.+ O aʻu o Ieova ua ou fai atu ai.’
13 “O le fetalaiga lenei a le Alii Pule Silisili Ese o Ieova: ‘O le a ou faatamaʻia foʻi tupua inosia* ma faaiʻuina atua lē aogā o Nafi.*+ O le a lē toe iai se taʻitaʻi mai i le atunuu o Aikupito, ma o le a ou faatupuina le mataʻu i le atunuu o Aikupito.+
14 O le a ou faatafunaina Patoro+ ma tutu se afi i Soana ma faaoo atu le faasalaga i No.*+
15 O le a ou sasaa atu loʻu ita tele iā Sina, le nofoaga malupuipuia o Aikupito, ma fasiotia tagata o No.
16 O le a ou tutuina se afi i Aikupito; o le a oo le mataʻu iā Sina, o le a lepetia pā o No, ma o le a osofaʻia Nafi* i le ao teatea!
17 O le a fasiotia i le pelu tauleleʻa o Onu* ma Pepeseta, ma o le a ave faapagota tagata o ia aai.
18 O le a pogisa le aso i Tapenesa pe a ou gausia amo a Aikupito i inā.+ O le a faaiʻuina lona malosi lea o loo mitamita ai,+ o le a ufitia o ia i ao, ma o le a ave faapagota tagata o ona aai.+
19 O le a ou faaoo le faasalaga iā Aikupito, ona latou iloa ai lea o aʻu lava o Ieova.’”
20 I le tausaga lona 11, i le masina muamua, i le aso lona fitu o le masina, na oo mai ai le afioga a Ieova iā te aʻu e faapea:
21 “Le atalii e o le tagata, ua ou gausia le lima o Farao le tupu o Aikupito; o le a lē fusifusia ina ia mālōlō ai, pe fusiina i se ʻie ina ia maua ai sina malosi e uu ai le pelu.”
22 “O lea, o le fetalaiga lenei a le Alii Pule Silisili Ese o Ieova: ‘Ou te faasagatau atu iā Farao le tupu o Aikupito,+ ma o le a ou gagauina ona lima, o le lima malosi ma le lima ua gau,+ o le a ou faapogaia foʻi le paʻū ese o le pelu mai i lona lima.+
23 Ona ou faataapeapeina lea o tagata Aikupito i nuu ma faasalalau atu i latou i atunuu.+
24 O le a ou faamalosia lima* o le tupu o Papelonia+ ma tuuina atu laʻu pelu i lona lima,+ o le a ou gagauina foʻi lima o Farao ma o le a ōi leotele o ia i ona luma,* e pei o se tagata ua toeitiiti oti.
25 O le a ou faamalosia lima o le tupu o Papelonia, ae o le a tautau i lalo lima o Farao; ma o le a latou iloa ai o aʻu lava o Ieova pe a ou tuuina atu laʻu pelu i le lima o le tupu o Papelonia, ma ia faaaogāina e faasagatau atu ai i le atunuu o Aikupito.+
26 O le a ou faataapeapeina tagata o Aikupito i nuu ma faasalalau atu i latou i atunuu,+ ona latou iloa ai lea o aʻu lava o Ieova.’”
Faamatalaga Pito i Lalo
^ Atonu e faasino atu i tagata Isaraelu na ʻau faatasi ma Aikupito.
^ Po o “Mafi.”
^ O le faaupuga Eperu atonu e fesootaʻi atu i le upu mo le “otaotavale,” ma o se faaupuga e faaalia ai le ʻinoʻino.
^ E faasino atu iā Tese.
^ Po o “Mafi.”
^ E faasino atu iā Eliopoli.
^ Po o le “faateleina le malosi.”
^ E faasino atu i luma o le tupu o Papelonia.
