Esekielu 40:1-49
40 O le tausaga lona 25 talu ona ave faapagota i matou,+ i le amataga o le tausaga, i le aso lona sefulu o le masina, i le tausaga lona 14 talu ona faaumatia le aai,+ o lea lava aso ua iai le aao o Ieova i oʻu luga, ma ua ia aveina ai aʻu i le aai.+
2 E ala i faaaliga mai i le Atua, ua ia aumaia ai aʻu i le laueleele o Isaraelu ma tuu aʻu i se mauga e matuā maualuga,+ lea e iai se fausaga e pei o se aai i le itu i saute.
3 Ina ua ia avatu aʻu i inā, ona ou vaaia ai lea o se tagata ua pei ona foliga o le ʻapamemea.+ Ua iai i lona lima se maea ua faia i le laau o le lino ma se ū e fua ai,*+ ma o loo tū o ia i le faitotoʻa.
4 Ua faapea mai le tagata iā te aʻu: “Le atalii e o le tagata, ia vaavaai totoʻa, ia faalogologo lelei, ma ia uaʻi mai* i mea uma ou te faaali atu iā te oe, auā o le māfuaaga lenā na aumaia ai oe i inei. Ia e taʻu atu i le aiga o Isaraelu mea uma e te vaai i ai.”+
5 Ua ou vaaia se pā ua siʻomia ai itu uma o le malumalu.* Ua iai foʻi i le lima o le tagata se ū e fua ai, e ono kupita le umi (e faaopoopo i le kupita e tasi, le lautele o le alofilima).* Ona ia fuaina lea o le pā, ma o lona mafiafia e tasi le ū, o lona maualuga e tasi foʻi le ū.
6 Ua alu atu o ia i le faitotoʻa o loo faasaga i le itu i sasaʻe,+ ma alu atu i luga o ona faasitepu. Ina ua ia fuaina le mea e ulu atu ai o le faitotoʻa, e tasi le ū le lautele, ma o le lautele o le isi mea e ulu atu ai, e tasi foʻi le ū.
7 O potu taʻitasi o leoleo e tasi le ū le umi ma lona lautele e tasi le ū, ma e lima kupita le vā o potu taʻitasi o leoleo.+ O le mea e ulu atu ai o le faitotoʻa, i tala ane o le faapaologa o le faitotoʻa o loo faasaga agaʻi i le malumalu, e tasi le ū.
8 Ua ia fua le faapaologa o le faitotoʻa o loo faasaga i le malumalu, e tasi le ū.
9 Ona ia fuaina lea o le faapaologa o le faitotoʻa, e valu kupita; ma na ia fuaina ona poutū i autafa, e lua kupita; ma o le faapaologa o le faitotoʻa, sa iai i le itu o loo faasaga agaʻi i le malumalu.
10 E taʻitolu potu o leoleo na iai i itu e lua o le faitotoʻa i sasaʻe. E tutusa le fua o ia potu e tolu, ma e tutusa foʻi fua o poutū i autafa i itu uma e lua.
11 Ona ia fuaina lea o le lautele o le mea e ulu atu ai i le faitotoʻa, e 10 kupita; a o le umi o le faitotoʻa e 13 kupita.
12 O vaega o loo iai se puipui i luma o potu o leoleo lea o loo i itu uma e lua, e tasi le kupita. O potu o leoleo i itu uma e lua, e taʻiono kupita.
13 Ona ia fuaina lea o le faitotoʻa mai i le taualuga o le tasi potu o leoleo e oo i le taualuga o le isi potu o leoleo, e 25 kupita le lautele; e faafesagaʻi faitotoʻa.+
14 Ona ia fua lea o poutū i autafa e 60 kupita le maualuluga, ma na ia fuaina foʻi poutū i autafa o faitotoʻa i itu uma o le lotoā.
15 E amata mai i luma o le faitotoʻa i le mea e ulu atu ai, e oo atu i luma o le faapaologa o le faitotoʻa lea o loo faasaga agaʻi i le malumalu, e 50 kupita.
16 Ua iai faamalama e faasolo ina lauiti faavaa pe a agaʻi i tua,+ i potu o leoleo ma i poutū i autafa o loo i totonu o le faitotoʻa i itu uma e lua. I totonu o le faapaologa, na iai foʻi faamalama i ona itu uma, ma na iai ata o pama+ i poutū o loo i autafa.
17 Ona ia avatu lea o aʻu i le lotoā pito i fafo, ma ua ou vaaia ai potu ʻai*+ ma se paepae e faataamilo i le lotoā. E 30 potu ʻai na iai i le paepae.
18 E tutusa le lautele o le paepae i autafa o le faitotoʻa ma le umi o faitotoʻa, o le paepae lea e maulalo ifo nai lo o le lotoā pito i totonu.
19 Ona ia fuaina lea o le mamao* mai i luma o le faitotoʻa pito i lalo e oo atu i luma o le lotoā pito i totonu. E 100 kupita mai i le faitotoʻa i sasaʻe, ma e mai i le faitotoʻa i mātū.
20 I le lotoā pito i fafo, e iai le faitotoʻa e faasaga i le itu i mātū ma na ia fuaina lona umi ma lona lautele.
21 E taʻitolu potu o leoleo i itu uma e lua. O ona poutū i autafa ma lona faapaologa, ua tutusa ma le fua o le faitotoʻa muamua. E 50 kupita lona umi ae e 25 kupita lona lautele.
22 E tutusa foʻi le fua o ona faamalama, o lona faapaologa ma ona ata o pama,+ ma mea o loo i le faitotoʻa i sasaʻe. E mafai ona ō aʻe i ai tagata e ala i faasitepu e fitu, ma e iai lona faapaologa i luma o faasitepu.
23 Ua iai se faitotoʻa i le lotoā pito i totonu e faafesagaʻi ma le faitotoʻa i mātū, ma se isi faitotoʻa e faafesagaʻi ma le faitotoʻa i sasaʻe. Ua ia fua le mamao mai i le tasi faitotoʻa i le isi faitotoʻa, e 100 kupita.
24 Ua sosoo ai ma lona avatu o aʻu i le itu i saute, ma na ou vaaia ai se faitotoʻa i le itu i saute.+ Ua ia fuaina ona poutū i autafa ma lona faapaologa, ma ua tutusa fua ma isi faitotoʻa.
25 Ua iai faamalama i itu uma o le faitotoʻa ma lona faapaologa, e pei o isi faamalama. E 50 kupita le umi o le faitotoʻa, ae e 25 kupita lona lautele.
26 E fitu faasitepu e ui aʻe ai i le faitotoʻa,+ ma e iai lona faapaologa i luma o faasitepu. E iai foʻi ata o pama i ona poutū i autafa, e taʻitasi i itu uma e lua.
27 Ua iai i le lotoā pito i totonu se faitotoʻa e faasaga i le itu i saute; ua ia fua le mamao e agaʻi i saute mai i le tasi faitotoʻa i le isi faitotoʻa, e 100 kupita.
28 Ona ia avatu lea o aʻu i le lotoā pito i totonu e ala i le faitotoʻa i saute. Ua ia fuaina le faitotoʻa i saute ma ua tutusa le fua ma isi faitotoʻa.
29 Ua tutusa le fua o ona potu o leoleo, o ona poutū i autafa, ma lona faapaologa ma isi faitotoʻa. Ua iai i lea faitotoʻa ma lona faapaologa o faamalama i itu uma. E 50 kupita lona umi, ma e 25 kupita lona lautele.+
30 Ua iai faapaologa i faitotoʻa uma; e 25 kupita le umi, ma e 5 kupita le lautele.
31 E faasaga lona faapaologa i le lotoā pito i fafo, ma ua iai ata o pama i luga o ona poutū i autafa,+ ma e valu faasitepu e alu aʻe i ai.+
32 Ina ua ia avatu aʻu i le lotoā pito i totonu e ala i le itu i sasaʻe, na ia fuaina le faitotoʻa, ma ua tutusa le fua ma isi faitotoʻa.
33 Ua tutusa le fua o ona potu o leoleo, o ona poutū i autafa, ma lona faapaologa ma isi faitotoʻa. Ua iai i lea faitotoʻa ma lona faapaologa o faamalama i itu uma. E 50 kupita le umi, ae e 25 kupita le lautele.
34 E faasaga lona faapaologa i le lotoā pito i fafo, ma ua iai ata o pama i luga o ona poutū i autafa, ma e valu faasitepu e alu aʻe i ai.
35 Ona ia avatu lea o aʻu i le faitotoʻa i mātū+ ma ua ia fuaina; ua tutusa le fua ma isi faitotoʻa.
36 Ua tutusa le fua o ona potu o leoleo, o ona poutū i autafa, ma lona faapaologa ma isi faitotoʻa. Ua iai i lea faitotoʻa o faamalama i itu uma. E 50 kupita le umi, ae e 25 kupita le lautele.
37 O ona poutū i autafa, e faasasaga i le lotoā pito i fafo, ma ua iai ata o pama i luga o ona poutū i autafa, ma e valu faasitepu e alu aʻe i ai.
38 Ua iai foʻi se potu ʻai ma le mea e ulu atu ai, e lata ane i poutū i autafa o faitotoʻa. O i inā e faamamā ai taulaga mū i le vai.+
39 E taʻilua laulau i itu uma e lua o le faapaologa o le faitotoʻa, ina ia fasia ai manu mo taulaga mū,+ o taulaga o agasala,+ ma taulaga o le nofosala.+
40 Pe a alu aʻe se isi i le mea e ulu atu ai i le faitotoʻa i mātū, ua iai laulau i fafo i le mea e ulu atu ai. E taʻilua laulau i itu uma e lua o le faapaologa o le faitotoʻa.
41 E ta‘ifā laulau i itu uma e lua o le faitotoʻa, ma e valu le aofaʻi o laulau. O luga o ia laulau e fasi ai manu.
42 Na faia aʻe laulau e fā mo le taulaga mū, i maa na tipiina. O le umi e tasi ma le ʻafa kupita, o le lautele e tasi ma le ʻafa kupita, ma o le maualuga e tasi le kupita. O luga o ia laulau e tuu ai meafaigaluega e faaaogā mo le fasiga o taulaga mū ma taulaga.
43 Na iai ni fata na faapipii faataamilo i puipui i totonu, ma o lo latou lautele e tusa ma le lautele o le alofilima; ma na tuuina le aano o taulaga i luga o laulau.
44 Na iai potu ʻai a le ʻaufaipese e lata i le faitotoʻa i totonu;+ na iai nei potu ʻai i totonu o le lotoā pito i totonu, e lata i le faitotoʻa i mātū, e faasaga i le itu i saute. E iai le isi potu ʻai e lata i le faitotoʻa i sasaʻe, e faasaga i le itu i mātū.
45 Ua ia faapea mai iā te aʻu: “O le potu ʻai lenei o loo faasaga i le itu i saute, e mo le ʻauositaulaga o loo vaavaaia auaunaga i le malumalu.+
46 O le potu ʻai lea e faasaga i le itu i mātū, e mo le ʻauositaulaga o loo vaavaaia auaunaga o le fata faitaulaga.+ O i latou ia o atalii o Satoka,+ e mai i le ʻau sa Levī, o ē ua tofia e faalatalata atu iā Ieova ina ia auauna iā te ia.”+
47 Ona ia fuaina lea o le lotoā pito i totonu. E faatafafā, ma o le umi e 100 kupita, ma o le lautele e 100 kupita. Na iai le fata faitaulaga i luma o le malumalu.
48 Ona ia avatu lea o aʻu i le faapaologa o le malumalu,+ ua ia fua poutū i autafa o le faapaologa, e lima kupita i le tasi itu ma e lima foʻi kupita i le isi itu. O le lautele o le faitotoʻa, e tolu kupita i le tasi itu ma e tolu kupita i le isi itu.
49 O le umi o le faapaologa e 20 kupita, ma o lona lautele e 11* kupita. E mafai ona ō aʻe i ai tagata e ala i faasitepu. Ua iai poutū i tala ane o pou i autafa, e taʻitasi i itu uma e lua.+
Faamatalaga Pito i Lalo
^ Epe., “uaʻi lou loto.”
^ Epe., “se ū e fua ai e ono kupita, o le kupita ma le lautele o le alofilima.” E faasino atu i le kupita umī. Tagaʻi i le Faa. E14.
^ Epe., “fale.”
^ Po o “ma ua ou vaaia ai potu.”
^ Epe., “lautele.”
^ Pe atonu “12.”
