Esekielu 45:1-25
45 “‘Pe a outou vaevaeina le laueleele e fai ma tofi,+ e ao ona outou avatu se vaega paia mai i le laueleele, e fai ma foaʻi iā Ieova.+ E ao ona 25,000 kupita* lona umi, ma e 10,000 kupita lona lautele.+ O le a avea lenei vaega atoa* o se vaega paia.
2 I totonu o lea vaega, o le a iai se fasi fanua faatafafā e 500 kupita i le 500 kupita* mo le mea paia,+ ma e iai i ona itu uma ni fanua e 50 kupita, e aai ai lafumanu.+
3 Ona e fuaina lea mai i lenei laueleele o le umi e 25,000 ma le lautele e 10,000, ma e iai i totonu o lea mea le malumalu, o se mea e matuā paia.
4 E fai lea mea ma vaega paia o le laueleele mo ositaulaga,+ o auauna ia o le malumalu, o ē e faalatalata atu e auauna iā Ieova.+ O le a fai ma mea e fausia ai o latou fale ma o se mea paia e fausia ai le malumalu.
5 “‘O le a iai se fasi fanua e 25,000 kupita le umi ma le lautele e 10,000 kupita mo le ʻau sa Levī, o ē e auauna i le malumalu.+ E latou te maua foʻi potu ʻai e 20*+ e fai ma o latou tofi.
6 “‘E ao ona outou avatu mo le aai se fanua e 25,000 kupita le umi (e tutusa ma le foaʻi paia) ae 5,000 kupita le lautele.+ E fai foʻi lea mo le aiga uma o Isaraelu.
7 “‘E fai foʻi ma tofi o le taʻitaʻi, fanua o loo i itu e lua o le foaʻi paia ma le fanua ua avatu mo le aai. O le a iai lea fanua i tala ane o le foaʻi paia ma le fanua ua avatu mo le aai, i le itu i sisifo ma le itu i sasaʻe. O le umi o le fanua mai i le tuaoi i sisifo e oo atu i le tuaoi i sasaʻe, e tutusa lelei ma vaega a ituaiga e sosoo atu i ai.+
8 E fai lea fanua o Isaraelu ma ona tofi. E lē toe faasauā oʻu taʻitaʻi i loʻu nuu,+ ma e latou te avatu i le aiga o Isaraelu le laueleele e tusa ma o latou ituaiga.’+
9 “O le fetalaiga lenei a le Alii Pule Silisili Ese o Ieova: ‘Taʻitaʻi o Isaraelu e, ua lava ia mea ua outou faia!’
“‘Inā tuu ia lo outou faasauā ma le faasaunoa, ma ia faia le mea tonu ma le amiotonu.+ Aua tou te toe faoa le laueleele o loʻu nuu,’+ ua fetalai mai ai le Alii Pule Silisili Ese o Ieova.
10 ‘E ao ona outou faaaogā fua faatautau e saʻo lelei, ma ia saʻo lelei fua o le efa* ma le fua o le paita.*+
11 E ao ona tasi le fua o le efa ma le fua o le paita. O le fua o le paita o le tasi vaesefulu lea o le somera,* ma o le fua o le efa o le tasi vaesefulu lea o le somera. E ao ona faaaogā le fua o le somera e fua ai so o se mea e manaʻomia.
12 O le sekeli*+ e tusa ma le 20 kire.* Pe a faaopoopo le 20 sekeli, o le 25 sekeli, ma le 15 sekeli, ona outou maua ai lea o le mane* e tasi.’
13 “‘O le foaʻi lenei e ao ona outou avatu: o le tasi vaeono o le efa mai i somera taʻitasi o saito, ma le tasi vaeono o le efa mai i somera taʻitasi o karite.
14 O le tele o le suāuu e avatu, e tatau ona tusa ma le fua o le paita. O le paita o le tasi vaesefulu lea o le kori,* ma e sefulu paita ona maua ai lea o le somera e tasi, auā e tutusa le sefulu o paita ma le somera.
15 E ao foʻi ona avatu se mamoe e tasi mai i mamoe e taʻi 200 uma o lafumanu a Isaraelu. O nei mea e faaaogā mo taulaga i meaʻai,+ o taulaga mū,+ ma taulaga faifaatasi+ ina ia faia ai le togisala mo le nuu,’+ ua fetalai mai ai le Alii Pule Silisili Ese o Ieova.
16 “‘E ao i tagata uma o le atunuu ona faia lenei foaʻi+ i le taʻitaʻi o Isaraelu.
17 Ae e gafa le taʻitaʻi ma le vaavaaia o le taulaga mū,+ o taulaga i meaʻai+ ma le taulaga i meainu i aso o tausamiga,+ o masina faatoʻā vaaia, o Sapati,+ ma aso o tausamiga uma a le aiga o Isaraelu.+ O ia lea na te saunia le taulaga o agasala ma taulaga i meaʻai, o le taulaga mū, ma le taulaga faifaatasi, ina ia togisala ai le aiga o Isaraelu.’
18 “O le fetalaiga lenei a le Alii Pule Silisili Ese o Ieova: ‘I le masina muamua, i le aso muamua o le masina, ia e aumai se tamaʻi povi poʻa e matuā lelei lava mai le lafu, ma e ao ona e faamamāina le malumalu mai i le agasala.+
19 E ave e le ositaulaga sina toto o le taulaga o agasala ma tuu i le pou o le faitotoʻa o le malumalu,+ i luga foʻi o tulimanu e fā o vaega o loo siʻo ai le fata faitaulaga, ma luga o le pou o le faitotoʻa i le lotoā pito i totonu.
20 O le mea lenā e te faia i le aso lona fitu o le masina, ona o se tasi ua faia se mea sesē e leʻi fuafuaina pe faia foʻi ma le lē iloa.+ O le auala lea e tou te faia ai le togisala mo le malumalu.+
21 “‘I le masina muamua, i le aso 14 o le masina, e tou te tausia ai le Paseka.+ E fitu aso e tou te aai ai i falaoa e lē faafefeteina.+
22 O lea aso, o le a saunia ai e le taʻitaʻi se tamaʻi povi poʻa, e fai ma taulaga o agasala mo ia lava ma tagata uma o le atunuu.+
23 O aso e fitu o le faamanatuga, e na te saunia ai se taulaga mū iā Ieova i tamaʻi povi poʻa e fitu ma mamoe poʻa e fitu e matuā lelei lava, i aso taʻitasi mo aso e fitu,+ faapea se ʻoti poʻa i aso taʻitasi e fai ma taulaga o agasala.
24 E ao foʻi ona ia saunia mo le taulaga i meaʻai le fua o le efa e tasi mo tamaʻi povi poʻa taʻitasi, o le fua o le efa e tasi mo mamoe poʻa taʻitasi, faapea ma se sinu* o le suāuu mo efa taʻitasi.
25 “‘I le masina lona fitu, i le aso 15 o le masina, i aso e fitu a o faia le tausamiga,+ e ao ona ia saunia ai mea lava ia na ia saunia mo le taulaga o agasala, o le taulaga mū, o le taulaga i meaʻai ma le suāuu.’”
Faamatalaga Pito i Lalo
^ Po o “vaega uma i totonu o ona tuaoi.”
^ Epe., “500 i le 500.”
^ Po o “potu e 20.”
