Faamasino 16:1-31
16 I se tasi aso, na alu atu ai Samasoni i Kasa, sa ia vaaia ai se fafine talitane i inā, ona alu atu ai lea o ia i lona fale.
2 Ua taʻu atu le tala i tagata Kasa e faapea: “Ua sau Samasoni i inei.” Ona latou siʻosiʻomia lea o ia ma faatalitali iā te ia i le pō atoa i le faitotoʻa o le aai. Ua latou lē pisa i le pō atoa, ua faapea ane: “E malama aʻe loa le taeao, ona tatou fasiotia lea o ia.”
3 Peitaʻi, ua taoto pea Samasoni seʻia oo i le vaeluapō. Ona tulaʻi lea o ia ma tago atu i faitotoʻa o le pā o le aai ma pou e lua i autafa, ua fafa‘i mai faatasi ma le faamau. Ona amo lea i lona ua, ma ave aʻe i le tumutumu o le mauga e feagai ma Heperona.
4 Mulimuli ane, ua alofa o ia i se fafine i le vanu* o Soreka, o lona igoa o Talila.+
5 Ua ō aʻe alii o Filisitia iā te ia, ma faapea atu: “Ia e faaōleōle* iā te ia+ ma vaai po o le ā le pogai o lona malosi tele, ma pe e faapefea ona faato‘ilalo, saisai, ma manumalo iā te ia. Ona taʻitoʻatasi lea o i matou ma avatu iā te oe o tupe siliva e 1,100.”
6 Ua fai mai Talila iā Samasoni: “Faamolemole, seʻi taʻu mai iā te aʻu le pogai o lou malosi tele, ma o le ā se mea e saisai ai oe ina ia manumalo ai iā te oe.”
7 Ona fai atu lea o Samasoni iā te ia: “Afai e latou te saisaia aʻu i maea* fou e fitu e leʻi faamamagoina, ona ou vaivai ai lea e pei o isi tagata.”
8 Ona ave a‘e lea e alii o Filisitia iā te ia o maea fou e fitu e leʻi faamamagoina, ma ua ia saisai ai Samasoni.
9 O le taimi lea o loo latou lalafi ai i le potu, ona valaau mai lea o Talila iā te ia: “Samasoni e, ua ō mai Filisitia iā te oe!” Ona ia motusi ai lea o maea e pei ona motusi o se manoa ua mū i le afi.+ Ua lē iloa lava le pogai o lona malosi.
10 Ona fai mai lea o Talila iā Samasoni: “Faauta! Ua e ʻolegia aʻu ma ua e pepelo mai iā te aʻu. Faamolemole seʻi taʻu mai lava iā te aʻu, po o le ā se mea e mafai ona saisai ai oe.”
11 Ona ia fai atu lea iā te ia: “Afai e latou te saisaia aʻu i ni maea fou e leʻi faaaogāina i se galuega, ona ou vaivai ai lea e pei o isi tagata.”
12 Ona ave lea e Talila o maea fou ma saisai ai o ia, ma ua valaau mai iā te ia: “Samasoni e, ua ō mai Filisitia iā te oe!” (O le taimi lenā o loo lalafi i le potu o ē na ō mai e puʻe o ia.) Ona ia motusi lea o maea mai i ona lima e pei o ni manoa.+
13 Ua mavae ia mea, ona fai mai lea o Talila iā Samasoni: “Ua e ʻolegia aʻu e oo mai i le aso nei ma ua e pepelo mai iā te aʻu.+ Seʻi taʻu mai iā te aʻu, po o le ā se mea e mafai ona saisai ai oe.” Ona ia fai atu lea iā te ia: “Pe afai e te lalaga fili e fitu o loʻu lauulu faatasi ma ni fasi ‘ie.”*
14 Ua faia faapea e Talila ma faamauina i le pine, ona ia fai mai lea iā te ia: “Samasoni e, ua ō mai Filisitia iā te oe!” Ua ala o ia na moe, ma lia‘i le pine atoa ma fasi ʻie.
15 Ona ia fai mai lea iā Samasoni: “E faapefea ona e fai mai ‘Ou te alofa iā te oe,’+ ae e lē o iai lou loto iā te aʻu? Ua faatolu ona e ʻolegia aʻu, ae e te leʻi taʻu mai lava iā te aʻu le pogai o lou malosi tele.”+
16 Talu ai ua ia faatigā iā te ia mai i lea aso i lea aso, ma faatauanau pea iā te ia, ona vaivai ai lea o le loto o Samasoni, toe a oti.+
17 Ua iʻu lava ina faamatala atu e ia o mea uma o i lona loto e faapea: “E leʻi oo lava se tafi i loʻu ulu, auā o aʻu o le Naseri i le Atua mai lava i lo‘u fanau mai.*+ Afai e tafi loʻu ulu, ona alu ese ai lea o loʻu malosi, ma ou vaivai ai, ma pei ai aʻu o isi tagata uma lava.”
18 Ina ua iloa e Talila ua ia faamatala atu iā te ia o mea uma i lona loto, ona ia aami loa lea o alii o Filisitia,+ ua faapea atu: “Inā ō mai ia, auā ua ia faamatala mai iā te aʻu o mea uma i lona loto.” Ona ō aʻe lea o alii o Filisitia iā te ia, ma avatu tupe iā te ia.
19 Ua ia faamoe Samasoni i ona vae, ona ia valaau atu lea i le tagata e sau e tafiese fili e fitu o lona ulu. Ona manumalo loa lea o Talila iā te ia, ma ua alu ese lona malosi mai iā te ia.
20 Ua valaau mai o ia: “Samasoni e, ua ō mai Filisitia iā te oe!” Ona ala lea o ia, ma faapea ifo: “Ou te alu atu e pei ona ou faia muamua,+ ma ou faasa‘oloto ai iā te aʻu.” Peitaʻi, e na te leʻi iloa ua tuua o ia e Ieova.
21 Ona puʻe lea o ia e Filisitia ma sali ese ona mata. Ua latou ave ifo iā te ia i Kasa ma saisai i faamau ʻapamemea e lua; ua olo foʻi e ia o saito i le falepuipui.
22 Ae ua amata ona toe tutupu o lauulu o lona ulu i le taimi na tafiese ai.+
23 Ua faapotopoto faatasi alii o Filisitia ina ia fai se taulaga tele i lo latou atua o Takono,+ ma fiafia ai, ua latou faapea atu: “Ua tuuina mai e lo tatou atua lo tatou fili o Samasoni i o tatou lima!”
24 Ina ua vāai tagata iā te ia, ona latou vivii ai lea i lo latou atua, ma faapea ane: “Ua tuuina mai e lo tatou atua lo tatou fili i o tatou lima, o lē na faaleagaina lo tatou laueleele,+ ma fasiotia le toʻatele o i tatou.”+
25 O le fiafia o o latou loto na latou faapea ane ai: “Ia valaau atu iā Samasoni e sau ina ia tatou toē i ai.” Ona latou aumai lea o Samasoni mai i le falepuipui ina ia latou toē i ai; ua latou faatū o ia i le vā o pou.
26 Ona fai atu lea o Samasoni i le tamaitiiti o loo uuina lona lima: “Seʻi oʻu tagotago atu i poutū o loo mau ai le fale, seʻi oʻu faalagolago atu i ai.”
27 (I le taimi lea, ua matuā tumu ai le fale i tane ma fafine. Na iai i inā alii uma o Filisitia, ma na iai i le taualuga pe e tusa ma le toʻa 3,000 o tane ma fafine, o ē na matamata ifo ma toē iā Samasoni.)
28 Ona valaau atu lea o Samasoni+ iā Ieova e faapea: “Ieova e, le Alii Pule Silisili Ese, faamolemole ia e manatua mai aʻu, ma ia e faamalosia aʻu+ faamolemole i lenei lava taimi, le Atua e, seʻi oʻu tauimasui i tagata Filisitia mo se tasi o oʻu mata e lua.”+
29 Ona faalagolago lea o Samasoni i poutū e lua o loo mau ai le fale, ma ua tago atu lona lima taumatau i le tasi, a o lona lima tauagavale i le isi.
30 Ona alaga atu lea o Samasoni: “Ia ou oti faatasi ma tagata Filisitia!” Ona ia uuna‘i lea o poutū i lona malosi uma, ua solofa ifo le fale i luga o alii ma tagata uma na iai.+ O lea, e toʻatele atu tagata na ia fasiotia i le taimi na oti ai, nai lo o ē na ia fasiotia a o ola o ia.+
31 Mulimuli ane, ona ō ifo lea o ona uso ma le aiga uma o lona tamā, ma ave o ia. Ua avatu o ia ma tanu i le tuugamau o Manoa+ lona tamā, i le vā o Soraa+ ma Esetaola. Na faamasino o ia iā Isaraelu i tausaga e 20.+
Faamatalaga Pito i Lalo
^ Po o le “ālia.”
^ Po o le “faatauanau.”
^ Po o “maea o ʻaufana.”
^ Po o “ma le ala o le ʻie.”
^ Epe., “mai i le faaautama o loʻu tinā.”
