Iopu 1:1-22
1 Sa i le nuu o Usa le tagata e igoa iā Iopu.*+ O ia o se tagata e amio saʻo ma faamaoni;*+ na mataʻu o ia i le Atua ma ʻaloʻalo ese i mea leaga.+
2 Na fanaua e ia o atalii e toʻafitu ma afafine e toʻatolu.
3 E 7,000 mamoe i lana lafu, ma kamela e 3,000, ma povi poʻa e 1,000,* ma asini* e 500, faatasi ai ma auauna e matuā toʻatele, ma na silisili o ia i tagata uma i Sasaʻe.
4 Na ta‘ito‘atasi ona atalii ma faia se faiga‘ai i lona fale, e tofu le tagata ma lona aso. Na latou valaaulia ai o latou tuafāfine e toʻatolu e aai ma inu faatasi ma i latou.
5 Ina ua soo aso o faiga‘ai, ona aami lea o i latou e Iopu ina ia faapaia i latou. Ona ala lea o Iopu i le taeaopō ma faia taulaga mū+ mo i latou ta‘ito‘atasi. Auā na faapea ifo Iopu: “Atonu na agasala oʻu atalii ma latou faifai i le Atua i o latou loto.” O le mea lenā sa masani ona faia e Iopu.+
6 Ua oo i le aso e ō mai ai atalii o le Atua moni*+ e tutū i luma o Ieova,+ ma na sau ai foʻi Satani+ faatasi ma i latou.+
7 Ona fetalai atu lea o Ieova iā Satani: “O fea e te sau ai?” Ua tali mai Satani iā Ieova: “Ua ou sau na ou fealualuaʻi i le lalolagi ma fesavaliaʻi ai.”+
8 Ona fetalai atu lea o Ieova iā Satani: “Po ua e mātauina ea* laʻu auauna o Iopu? E leai se tasi e pei o ia i le lalolagi. O ia o se tagata e amio saʻo ma faamaoni,*+ e mataʻu i le Atua ma ʻaloʻalo ese i mea leaga.”
9 Ona tali mai lea o Satani iā Ieova: “Po ua mataʻu fua ea Iopu i le Atua?+
10 Po ua e lē siʻosiʻomia ea o ia i le pā,+ ma lona fale, atoa ma ana mea uma? Ua e faamanuia foʻi galuega a ona lima,+ ma ua faateleina ana manu i le laueleele.
11 Peitaʻi, ia aapa atu lou aao ma tago i mea uma ua iā te ia, ma e mautinoa e faifai o ia i ou lava luma.”
12 Ona fetalai atu lea o Ieova iā Satani: “Faauta! Ua i ou lima mea uma lava ua iā te ia.* Tau o ia e aua e te faaoo i ai lou lima!” Ona alu ese ai lea o Satani mai i luma* o Ieova.+
13 Ua oo i le aso na aai ma inu uaina ai ona atalii ma ona afafine i le fale o lona atalii ulumatua,+
14 ona sau lea o se avefeʻau iā Iopu ma faapea mai: “Na suatia e povi le fanua, na aai ai foʻi ma asini i o latou tafatafa,
15 ona ō mai ai lea o tagata Seepa ma osofaʻi ma ave i latou, na latou fasiotia foʻi auauna i pelu. E na o aʻu lava na ou sao mai ai, e taʻu mai iā te oe.”
16 A o tautala mai o ia, ae sau le tasi ua faapea mai: “Na paʻū ifo le afi a le Atua* mai i le lagi ma susunu ai mamoe ma auauna, ma faaumatia ai i latou! E na o aʻu lava na ou sao mai ai, e taʻu mai iā te oe.”
17 A o tautala mai o ia, ae sau le isi ua faapea mai: “Na tofia e tagata Kaletaia+ ni ʻau se tolu ma osofaʻia kamela ma ave, na latou fasiotia foʻi auauna i pelu. E na o aʻu lava na ou sao mai ai, e taʻu mai iā te oe.”
18 A o tautala mai o ia, ae sau foʻi le isi ua faapea mai: “Na aai ma inu uaina ou atalii ma ou afafine i le fale o lou atalii ulumatua.
19 Ae ua faafuase‘i ona agi mai le matagi malosi mai i le toafa,* ma taia ai tulimanu e fā o le fale, ona paʻū ai lea i luga o lau fanau ma ua feoti ai. E na o aʻu lava na ou sao mai ai, e taʻu mai iā te oe.”
20 Ona tulaʻi lea o Iopu ma saei lona ofu ma ua ʻoti lona lauulu; ua faapaʻū faō fo‘i i le eleele ma ifo
21 ma faapea atu:
“Na ou sau lē lavalavā mai i le manava o loʻu tinā,Ou te toe foʻi lē lavalavā atu foʻi i ai.+
Na foaʻiina mai e Ieova,+ ma ua aveeseina foʻi e Ieova.
Ia viia pea le suafa o Ieova.”
22 E leʻi agasala Iopu i nei mea uma pe tuua‘ia fo‘i le Atua i le faia o se mea sesē.*
Faamatalaga Pito i Lalo
^ Atonu e uiga atu “Lē e Inosia e Isi.”
^ Po o “se tagata e lē taʻuleagaina ma amio saʻo.”
^ Epe., “povi poʻa taʻilua e 500.”
^ Epe., “asini fafine.”
^ O se faaupuga Eperu e faasino atu i atalii agelu o le Atua.
^ Po o “se tagata e lē taʻuleagaina ma amio saʻo.”
^ Epe., “ua uaʻi atu lou loto i.”
^ Po o le “Ua e pule i mea uma lava ua iā te ia.”
^ Epe., “fofoga.”
^ Pe atonu “Na paʻū ifo le uila.”
^ Tagaʻi i le Uiga o Upu.
^ Po o le “pe taʻuleagaina foʻi le Atua i se mea.”
