Iosua 16:1-10
16 O le laueleele na fai ma tofi*+ o le fanauga a Iosefa,+ e amata mai i le vaitafe o Ioritana lea e lata i Ieriko, e oo atu i vai i le itu i sasaʻe o Ieriko, e alu aʻe mai i le toafa i Ieriko, e oo atu i vaega maugā o Peteli.+
2 E alu atu mai i Peteli lea e latalata i Lusa, ma ui atu i le tuaoi o tagata Araki i Atarota,
3 e alu ifo i le itu i sisifo i le tuaoi o tagata Iafeleti, e oo atu i le tuaoi i Pete-orana i lalo+ ma Kasera,+ ma e gata mai i le sami.
4 Na maua foʻi e le ituaiga o Manase ma Efaraima, o le fanauga lea a Iosefa,+ lo latou tofi i le laueleele.+
5 O le tuaoi lenei o le fanauga a Efaraima e tusa ma o latou aiga: O le tuaoi o lo latou tofi e agaʻi i le itu i sasaʻe, o Atarota-atara lea,+ e oo atu i Pete-orana i luga,+
6 ma e oo atu le tuaoi i le sami. E amata mai le tuaoi i Mekemeta+ o loo i le itu i mātū, e faataamilo i le itu i sasaʻe e oo atu i Taana-sailo ma Ianoka.
7 Ona alu ifo lea mai i Ianoka e oo i Atarota ma Naara, ma oo atu i Ieriko+ ma alu atu ai i le vaitafe o Ioritana.
8 E alu atu le tuaoi mai i Tapua+ i le itu i sisifo i le ālia o Kana, ma e gata mai i le sami.+ O le tofi lea o le ituaiga o Efaraima e tusa ma o latou aiga.
9 Na iai fo‘i isi aai mo le fanauga a Efaraima i totonu o le tofi o le fanauga a Manase,+ o aai uma ma nuu e latou te nonofo ai.
10 Ae latou te leʻi tuliesea tagata Kanana o ē na nonofo i Kasera,+ ae sa nonofo ai pea tagata Kanana faatasi ma Efaraima e oo mai i aso nei,+ ma na faapologaina i latou i galuega mamafa.+
Faamatalaga Pito i Lalo
^ Po o le “na maua e ala i le faia o le vili.”
