Iosua 18:1-28
18 Ona faapotopoto ai lea o le faapotopotoga uma o le fanauga a Isaraelu i Sailo,+ ma latou faatū ai le faleʻie o le feiloa‘iga i inā,+ auā ua uma ona faatoʻilaloina le laueleele.+
2 Ae na totoe pea i le fanauga a Isaraelu i latou e leʻi iai ni tofi, o ituaiga ia e fitu.
3 Ona faapea atu lea o Iosua i le fanauga a Isaraelu: “O le ā ea le umi tou te faatuai ai ona ō atu e fai mo outou le laueleele, ua tuuina atu iā te outou e Ieova le Atua o o outou augātamā?+
4 Ia tofia ni tane e taʻitoʻatolu mai i le ituaiga ina ia ou aauina atu; e latou te ō atu ma feoaʻi solo i le laueleele, ma tusia se faafanua e tusa ma o latou tofi, ona latou ō mai ai lea iā te aʻu.
5 Ia latou vaevaeina le laueleele iā i latou i vaega e fitu.+ E tumau Iuta i lona laueleele i le itu i saute,+ ma e tumau foʻi le fanauga a Iosefa i lo latou laueleele i le itu i mātū.+
6 A o outou, ia outou tusia se faafanua o le laueleele ma vaevae i vaega e fitu, ma aumai iā te aʻu, ou te faia le vili+ mo outou i luma o Ieova lo tatou Atua.
7 A o sa Levī, e lē tuuina atu so latou tofi faatasi ma outou,+ auā o lo latou tofi le fai ma ositaulaga iā Ieova;+ ua maua foʻi e Kato, Reupena, ma le ʻafa o le ituaiga o Manase+ o latou tofi i le itu i sasaʻe o Ioritana, lea na tuuina atu e Mose le auauna a Ieova iā i latou.”
8 Ona sauni lea o tamāloloa e ō, ma ua poloaʻi atu Iosua iā i latou o le a ō atu e tusia le faafanua o le laueleele: “Inā ō ia ma feoaʻi solo i le laueleele, ma tusia se faafanua ma toe foʻi mai iā te aʻu, ma ou te faia ai le vili mo outou i luma o Ieova i inei i Sailo.”+
9 Ona ō atu lea o tamāloloa ma ui atu i le laueleele, ma tusia i le tusi se faafanua o ona aai i vaega e fitu. Ua latou toe foʻi mai iā Iosua i le togālauapi i Sailo.
10 Ona faia lea e Iosua o le vili mo i latou i luma o Ieova+ i Sailo. Ona vaevaeina lea i inā e Iosua o le laueleele mo le fanauga a Isaraelu e tusa ma o latou tofi.+
11 Ona maua lea e ala i le vili, o le tofi o le ituaiga o Peniamina e tusa ma o latou aiga, e ui atu foʻi le laueleele o lo latou tofi i le vā o le fanauga a Iuta+ ma le fanauga a Iosefa.+
12 O lo latou tuaoi i le itu i mātū e amata mai i Ioritana, ona ui atu lea o le tuaoi i le malifa o Ieriko+ i le itu i mātū ma alu aʻe i le mauga i le itu i sisifo, ma alu atu i le toafa o Petavene.+
13 Ua ui atu le tuaoi mai i inā i Lusa, i le malifa i saute o Lusa, o Peteli lea;+ ona alu ifo lea o le tuaoi i Atarota-atara+ o loo i le mauga i le itu i saute o Pete-orana i lalo.+
14 Na faailoga le tuaoi i le itu i sisifo ma faataamilo e oo atu i le itu i saute mai i le mauga e faafesaga‘i ma Pete-orana i le itu i saute; ma e gata mai i Kiriata-paala, o Kiriata-iarima lea,+ o se aai o Iuta. O le itu i sisifo lea.
15 O le itu i saute na amata mai i le faatausiʻusiʻuga o Kiriata-iarima, ma e alu atu le tuaoi i le itu i sisifo; e alu atu foʻi i vaipuna o Nafatoa.+
16 Ua alu ifo le tuaoi i le faatausiʻusiʻuga o le mauga o loo fesaga‘i ma le vanu o Hinoma,*+ lea e i le vanu* o Rafaimi+ i le itu i mātū, ma alu ifo i le vanu o Hinoma, ma oo atu ai i le malifa o tagata Iepusē+ i le itu i saute ma alu ifo ai i Ene-rokelu.+
17 E alu atu le tuaoi i le itu i mātū e oo atu i Ene-semesa ma alu atu foʻi i Kelilota, lea e i luma o le aʻega o Atumema;+ ma alu ifo i le maa+ o Poana+ le atalii o Reupena.
18 Ona ui atu lea i le malifa i le itu i mātū i luma o Arapa,* ma alu ifo ai i Arapa.
19 E ui atu foʻi le tuaoi e oo i le malifa i le itu i mātū o Pete-okelu,+ ma e gata mai le tuaoi i le itu i mātū o le vaifagaloa o le Sami Oona,*+ i le faatausiʻusiʻuga i saute o le vaitafe o Ioritana. O le tuaoi lea i le itu i saute.
20 Ua avea Ioritana ma ona tuaoi i le itu i sasaʻe. O le tofi lea o le fanauga a Peniamina e tusa ai ma o latou aiga, i ona tuaoi uma.
21 O aai nei o le ituaiga o Peniamina e tusa ma o latou aiga: o Ieriko, o Pete-okelu, o Emete-kisesa,
22 o Pete-arapa,+ o Semaraima, o Peteli,+
23 o Gavi, o Para, o Ofira,
24 o Kifa-amoni, o Ofini, ma Kepa;+ e 12 aai ma nuu e latou te nonofo ai.
25 O Kipeona,+ o Rama, o Perota,
26 o Mesepa, o Kafira, o Mosaa,
27 o Rekima, o Irefelu, o Taralu,
28 o Siela,+ o Elifa, o Iepuse, o Ierusalema lea,+ o Kipea,+ ma Kiriata; e 14 aai ma nuu e latou te nonofo ai.
O le tofi lea o le fanauga a Peniamina e tusa ma o latou aiga.
Faamatalaga Pito i Lalo
^ Epe., “le vanu o le atalii o Hinoma.”
^ Po o “le fanua laugatasi.”
^ Po o “le fanua laugatasi o le toafa.”
^ E faasino atu i le Sami Mate.
