Isaia 19:1-25
19 O le feʻau faasaga iā Aikupito:+
Faauta! O loo tiʻetiʻe Ieova i le ao saoasaoa ma o loo afio atu i Aikupito.
O le a gatete atua lē aogā o Aikupito ona o ia,+Ma o le a gatete loto o tagata Aikupito.
2 “Ou te faaoso tagata Aikupito e tetee i isi tagata Aikupito,O le a tau le tasi ma le isi,E taʻitoʻatasi ma faasagatau i lona uso ma lona tuaoi,E faasagatau le tasi aai i le isi aai, ma le tasi malo i le isi malo.
3 O le a lē mautonu Aikupito,Ma ou te faafenumiaʻia a latou fuafuaga.+
O le a latou saʻili atu i atua lē aogā,Ma ē e fai togafiti faataulāitu, o ē e saʻili i agaga, ma ē e vavalo i mea e tutupu.+
4 O le a ou tuuina atu Aikupito i le lima o se taʻitaʻi sauā,Ma o le a sauā le tupu e pule iā i latou,”+ ua fetalai mai ai le Alii moni, o Ieova o ʻau.
5 O le a pepē vai o le vaitafe,Ma e mate foʻi ma mātūtū le vaitafe.+
6 O le a elo vaitafe;O le a papaʻu ma mamate alāvai o le Naila i Aikupito.
O le a pala foʻi ū ma vao ʻutuʻutu.+
7 O le a mamago+ laau i tala ane o le vaitafe o le Naila, i le gutu o le vaitafe o le Naila,Ma laufanua uma ua totō ai mea i autafa o le vaitafe o le Naila.+
O le a faataapeape solo ia mea ma e lē toe iai lava.
8 E faanoanoa foʻi le ʻaufaifaiva,Ma e lauē i latou ua sasau a latou mātau i le vaitafe o le Naila,E mou atu foʻi i latou e lafo a latou upega i luga o le vai.
9 O le a faamāsiasiina i latou e faia ʻie mai i le lino;*+Atoa ma ē e lalagaina ʻie papaʻe.
10 O le a nutimomoia loto o tagata lalaga o Aikupito,E tigā foʻi loto o ē uma e faigaluega mo se totogi.
11 Ua vālea perenise o Soana.+
Ua faia e faufautua e sili ona atamamai a Farao ni fautuaga lē talafeagai.+
E faapefea ona outou fai atu iā Farao:
“O aʻu o sē e tupuga mai i ē e atamamai,Ma o sē e tupuga mai i tupu o aso anamua”?
12 O fea la o iai ou tagata atamamai?+
Ia latou taʻu atu iā te oe, pe afai ua latou iloa le faaiʻuga a Ieova o ʻau e faatatau iā Aikupito.
13 Ua gaoioi ma le valea perenise o Soana;Ua ʻolegia perenise o Nafi;*+Ua faasesēina Aikupito e alii sili o ona ituaiga.
14 Ua liligi ifo e Ieova i le atunuu o Aikupito le agaga o le fenuminumiaʻi;+Ma ua faasesēina e taʻitaʻi o Aikupito ana galuega uma,E pei ona tautevateva le tagata onā i ana puaʻiga.
15 E lē toe iai lava se galuega a Aikupito,E tusa po o se galuega e fai e le ulu po o le siʻusiʻu, o le tātupu po o le vao ʻutuʻutu.*
16 O lea aso, o le a pei ai Aikupito o ni fafine, ua gatete ma fefefe ona o le aao o Ieova ua faalālā atu e faasaga iā i latou.+
17 E avea le laueleele o Iuta ma mea e fefefe ai Aikupito. E latou te fefefe pe a taʻu atu i ai Iuta, ona o le faaiʻuga ua faia e Ieova o ʻau e faasaga iā Aikupito.+
18 O lea aso, o le a iai aai e lima i le laueleele o Aikupito e tautatala i le gagana a Kanana+ ma tautō e faamaoni iā Ieova o ʻau. E taʻua le tasi aai, o le Aai o le Malaia.
19 O lea aso, o le a iai le fata faitaulaga iā Ieova i le ogatotonu o le laueleele o Aikupito, ma le poutū i lona tuaoi e faamamaluina ai Ieova.
20 E fai ia mea ma faailoga ma molimau iā Ieova o ʻau i le atunuu o Aikupito; auā o le a latou alalaga atu iā Ieova ona o ē e faasauā ane, o le a auina atu foʻi e ia iā i latou se faaola, o lē ua sili, o le a laveaʻiina i latou.
21 O le a faailoa atu e Ieova o ia i tagata Aikupito, ma o le a iloa e tagata Aikupito Ieova i lea aso, e latou te avatu taulaga ma meaalofa, ma e faia foʻi se tautoga iā Ieova ma faataunuuina.
22 O le a taia lava Aikupito+ e Ieova. O le a taia e ia ma faamālōlōina; e latou te toe foʻi iā Ieova, ona ia talia lea o la latou ʻaiʻoi atu ma faamālōlō iā i latou.
23 O lea aso, o le a iai le auala tele+ mai i Aikupito e oo atu i Asuria. O le a ō atu Asuria i Aikupito, ma e ō mai Aikupito i Asuria, ma o le a auauna Aikupito faatasi ma Asuria i le Atua.
24 O lea aso, o le a avea ai Isaraelu ma vaega lona tolu faatasi ma Aikupito ma Asuria,+ o se faamanuiaga lea i totonu o le lalolagi,
25 auā o le a faamanuia e Ieova o ʻau i latou e faapea: “Ia manuia oʻu tagata o Aikupito, ma Asuria le galuega a oʻu lima, ma loʻu tofi o Isaraelu.”+
Faamatalaga Pito i Lalo
^ O le “lino” o se laau na totō i Aikupito e fai mai ai ofu lino.
^ Po o “Mafi.”
^ Pe atonu “o le lālā o le pama po o le ū.”
