Kenese 39:1-23
39 Ua ave ifo Iosefa i Aikupito,+ ma ua faatauina o ia mai i tagata Isamaeli+ na avatua o ia i lea mea, e se tagata Aikupito e igoa iā Potifara,+ o se tagata aloaʻia i le maota o Farao ma o le taʻitaʻi o leoleo.
2 Ae ua faatasi Ieova ma Iosefa.+ Ua iʻu ina taulau manuia o ia, ma ua ia vaavaaia nisi o mea i le maota o lona matai, o le tagata Aikupito.
3 Ua iloa e lona matai ua faatasi Ieova ma ia, ma ona o Ieova ua taulau manuia ai mea uma e na te faia.
4 Ua fiafia pea o ia iā Iosefa, ma ua avea o ia o se auauna e na te maufaatuatuaina. O lea, ua ia tofia ai Iosefa e pule i ana mea uma i lona fale, ma ua tuu atu iā te ia ana mea uma.
5 Talu mai le taimi na tofia ai o ia e pule i lona fale ma ana mea uma, ua faamanuia pea Ieova i le aiga o le tagata Aikupito ona o Iosefa, ma ua faamanuia e Ieova mea uma ua i lona fale atoa ma le fanua.+
6 Mulimuli ane, ua ia tuu atu ana mea uma e vaavaaia e Iosefa, ma e leʻi popole o ia i se mea e tasi seʻi vaganā ai le meaʻai ua ia ʻai ai. Ua oo fo‘i ina atili aulelei ma manaia le fuaitino o Iosefa.
7 Ua mavae ia mea, ona vaavaai ane lea o le faletua o lona matai iā Iosefa ma faapea mai: “Seʻi ta momoe.”
8 Ua teena e ia ma fai atu i le faletua o lona matai: “E te silafia e lē popole loʻu matai i mea ou te faia i le maota, ma ua ia tuuina mai iā te a‘u le pule i mea uma.
9 E leai se isi e sili atu i lenei maota nai lo o aʻu, ma ua iā te aʻu le pule i mea uma seʻi vaganā ai oe, auā o oe o lona faletua. Pe faapefea ona ou faia lenei mea leaga tele ma ou agasala ai i le Atua?”+
10 Ua fai ma ana masani le fai atu soo iā Iosefa i lea aso ma lea aso, ae e lē faalogo lava o ia iā te ia ina ia la momoe, pe faifaimea faatasi ma ia.
11 Ua oo i le isi aso, ua ia alu atu i le fale e fai ai ana galuega, ae ua leai ni auauna i le fale.
12 Ona tago atu lea o le fafine i lona ofu ma fai atu: “Inā ta momoe ia!” Ae ua sola Iosefa ma alu i fafo ae ua tiaʻi i ai lona ofu o loo uu i lona lima.
13 Ua ia iloa ua tiaʻi mai e Iosefa lona ofu lea o loo uu i lona lima ae sola i fafo,
14 ona ia eʻē atu lea i auauna o loo i lona fale ma faapea atu iā i latou: “Faauta! O lenei tagata Eperu na aumai e laʻu tane, ua manaʻo o ia e fai i tatou ma mea e ula ai tagata. Ua sau iā te aʻu ma te momoe ae ua ou eʻē leotele.
15 Ae ina ua faalogo o ia ua ou eʻē leotele ma tauvalaau atu, ona ia tuu lea o lona ofu i oʻu autafa ma sola i fafo.”
16 Ua ia faataatia lona ofu i ona autafa seʻia sau i le fale le matai o Iosefa.
17 Ona ia fai atu lea iā te ia o upu lava nei: “O le auauna Eperu na e aumaia, ua sau iā te aʻu ina ia fai aʻu ma mea e ula ai tagata.
18 Ae ina ua ou eʻē i luga ma tauvalaau, ona ia tuua lea o lona ofu i oʻu autafa ae sola i fafo.”
19 Ina ua faalogo le matai o Iosefa i upu a lana avā ua fai atu iā te ia: “O mea ia na faia e lau auauna iā te aʻu,” ona matuā ita ai lea o ia.
20 Ona ave lea e le matai o Iosefa o ia ma tuu i le falepuipui, i le mea o loo taofia ai pagota a le tupu, ma ua ia nofo ai pea i le falepuipui.+
21 Peita‘i, ua faatasi pea Ieova iā Iosefa ma faaalia pea le alofa faamaoni iā te ia, ma māfua ai ona fiafia le leoleo sili o le falepuipui iā te ia.+
22 Ua tuu atu e le leoleo sili o le falepuipui iā Iosefa le pule i pagota uma o loo i le falepuipui, o ia foʻi e faatonuina mea uma ua latou faia i inā.+
23 E le‘i popole lava le leoleo sili o le falepuipui i se mea e tasi ua i le pule a Iosefa, auā ua faatasi Ieova ma Iosefa ma ua taulau manuia mea uma ua ia faia ona o Ieova.+
